భారత రాజకీయాలపై సుష్మా స్వరాజ్ ముద్ర
కాశ్మీర్ సమస్య పరిష్కరించామని, కాశ్మీర్ ను దేశంలో అంతర్భాగం చేశామని బిజెపి శ్రేణులంతా సంబరాలు చేసుకుంటున్న వేళ సుష్మ స్వరాజ్ మరణ వార్త అందరినీ తీవ్ర దిగ్బ్రాంతి కి గురి చేసింది . అంచెలంచెలుగా ఎదుగుతూ ఒదిగి వున్న గొప్ప నాయకురాలు , జాతీయ భావాలు అణువణులో నింపుకున్న రాజకీయ నాయకురాలు . సుష్మ మరణించడానికి ముందు ఆర్టికల్ 370 రద్దు అయినట్టు తెలుసుకుని … “ఇంతకాలం ఇలాంటి వార్త కోసమే ఎదురు చూస్తున్నా … మోడీజీ ” అంటూ ట్విట్ చేసింది అంటే అంత అనారోగ్యంలో కూడా ఒక జాతీయ వాదిగా స్పందించిన తీరు అభినందనీయం .
సుష్మా స్వరాజ్ భౌతిక కాయాన్ని చూసిన భారతీయ జనతాపార్టీ సీనియర్ నాయకుడు ఎల్ .కె .అద్వానీ కన్నీరు ఆపుకోలేకపోయారు . సుష్మ తో అద్వానీజీ ప్రత్యేకమైన అనుబంధం . సుష్మ అద్వానీజీ ని గురువుగా భావిస్తుంది . ఆమె ప్రతి ఎదుగుదలలోను అద్వానీజీ ప్రోత్సాహం వుంది . ఆమెతో గత మధుర స్మృతులను గుర్తు చేసుకున్నారు . తన ప్రతి పుట్టిన రోజు నాడు తన కిష్టమైన చాకోలెట్ కేక్ తీసుక వచ్చేది ఆ విషయంలో ఆమె ఎప్పుడు కేక్ మర్చిపోవడం అన్నది జరగలేదు .. అంటూ కన్నీరు పెట్టుకున్నారు .
14 ఫిబ్రవరి 1952న హర్యానాలో హర్ దేవ్ శర్మ , లక్ష్మీదేవి దంపతులకు జన్మించారు . తండ్రి రాష్ట్రీయ స్వయం సేవక్ లో సభ్యుడు . అందుకే ఆమెపై ఆ ప్రభావం పడింది . నిజానికి సుష్మ తల్లితండ్రులు ది పాకిస్తాన్ లోని లాహోర్ . విభజన సమయంలో భారత దేశానికి వచ్చారు . సుష్మ డిగ్రీ తరువాత పంజాబ్ యూనివర్సిటీ లో లా చదివారు . 1973లో సుప్రీమ్ కోర్టు లో ప్రాక్టీస్ ప్రారంభించారు . 1975లో తన లా సహచరుడు స్వరాజ్ కౌశల్ ను వివాహం చేసుకున్నారు . 1977లో మొదటిసారి హర్యానాలో అంబాలా నియోజకవర్గం నుంచి శాసన సభ నుంచి ఎన్నికయ్యారు . అదే సంవత్సరం దేవీలాల్ మంత్రివర్గంలో సుష్మకు చోటు లభించింది . అప్పటికే ఆమె వయసు 25 సంవత్సరాలే . ఆ తరువాత రాష్ట్ర మంత్రిగా , కేంద్ర మంత్రిగా , పార్లమెంట్లో ప్రతిపక్ష నాయకురాలిగా , ఢిల్లీ ముఖ్యమంత్రిగా , విదేశాంగ శాఖ మంత్రిగా ఎన్నో పదవులను సమర్ధవంతంగా నిర్వహించారు . ఇందిరాగాంధీ తరువాత విదేశాంగ శాఖను చేపట్టింది సుష్మనే . ఢిల్లీ తొలి మహిళా ముఖ్యమంత్రి కూడా సుష్మా స్వరాజ్ . అనుక్షణం దేశ సేవలో శ్రమించిన ఉత్తమోత్తమ రాజకీయ నాయకురాలు సుష్మ .