శీతాకాలం వచ్చిందంటే వాతావరణంలో చలి మాత్రమే కాదు.. మన శరీరం, మానసిక స్థితి, భావోద్వేగాల్లోనూ స్పష్టమైన మార్పులు మొదలవుతాయి. ఈ కాలంలో చాలామందిలో సహజంగానే దగ్గరకావాలనే భావన, శారీరక సాన్నిహిత్యం పట్ల ఆసక్తి పెరుగుతుందని వైద్య నిపుణులు చెబుతున్నారు. ఇది కేవలం భావోద్వేగ విషయం మాత్రమే కాదు.. దీనికి పటిష్టమైన శాస్త్రీయ కారణాలూ ఉన్నాయని డాక్టర్లు వివరిస్తున్నారు.
చలికాలంలో శరీరంలో హార్మోన్ల పనితీరు మారుతుంది. ముఖ్యంగా డోపమైన్, ఆక్సిటోసిన్, సెరోటోనిన్ వంటి “హ్యాపీ హార్మోన్లు” ఎక్కువగా విడుదల అవుతాయి. ఇవి మనలో ఆనందాన్ని, ఉత్సాహాన్ని, అనుబంధాన్ని పెంచే ప్రధాన రసాయనాలు. ఈ మార్పుల వల్ల మనసు ప్రశాంతంగా ఉండటమే కాకుండా, భాగస్వామిపై ఆకర్షణ కూడా సహజంగా పెరుగుతుంది. ఇదే సమయంలో బయట తిరిగే అవకాశాలు తగ్గిపోవడం, ఇంట్లో ఎక్కువసేపు కలిసి గడపడం వల్ల భావోద్వేగ బంధం మరింత బలపడుతుంది.
శీతాకాలపు సూర్యకాంతి కూడా లిబిడోపై మంచి ప్రభావం చూపుతుంది. ఉదయాన్నే మృదువైన సూర్యరశ్మి విటమిన్-డీ ఉత్పత్తిని పెంచుతుంది. ఇది శరీరానికి శక్తినిస్తుంది, అలసటను తగ్గిస్తుంది. అలాగే మానసిక ఒత్తిడి తగ్గడంతో లైంగిక కోరిక సహజంగా పెరుగుతుంది. నిద్ర చక్రం మెరుగుపడటం కూడా ఈ మార్పులకు మరో కారణం. మంచి నిద్ర వల్ల శరీరం పూర్తి స్థాయిలో విశ్రాంతి పొంది, హార్మోన్ల సమతుల్యత నిలబడుతుంది.
అయితే అందరిలో ఇదే విధంగా జరుగుతుందని మాత్రం చెప్పలేమని నిపుణులు హెచ్చరిస్తున్నారు. కొందరిలో చలికాలంలో ఒంటరితనం, దిగులు, అలసట పెరిగి లిబిడో తగ్గే అవకాశమూ ఉంటుంది. ఇది వ్యక్తి జీవనశైలి, ఆరోగ్యం, మానసిక స్థితిపై ఆధారపడి మారుతుంది. అందుకే భాగస్వామితో బహిరంగ సంభాషణ చాలా ముఖ్యమని వైద్యులు సూచిస్తున్నారు. కోరికలు, భావాలు దాచుకోకుండా మాట్లాడుకోవడం వల్ల అపార్థాలు, దూరాలు తగ్గుతాయి.
ఆరోగ్యకరమైన ఆహారం, క్రమమైన వ్యాయామం, తగినంత నిద్ర, ఒత్తిడికి దూరంగా ఉండే జీవనశైలి శారీరక సాన్నిహిత్యాన్ని మరింత మెరుగుపరుస్తాయి. ఫోన్లు, టీవీలు కొంతసేపు పక్కనపెట్టి, భాగస్వామితో ప్రశాంతంగా గడిపే సమయమే సంబంధాన్ని బలపరిచే అసలైన మార్గమని నిపుణులు చెబుతున్నారు. మొత్తానికి శీతాకాలం శరీరాన్ని మాత్రమే కాదు.. మనసులను కూడా దగ్గర చేసే సీజన్ అని చెప్పవచ్చు.