శరీరంలో కొవ్వు ఉండకూడదు. కొవ్వు ఉంటే గుండె జబ్బు రావొచ్చు. డయాబెటిస్ రావొచ్చు. కొవ్వు పదార్ధాలు తింటే లావైపోతాం. ఇందులో నిజమే ఉన్నా.. శరీరంలో మంచి కొవ్వు, చెడు కొవ్వు ఉంటాయి. వీటి మధ్య తేడాలు కూడా ఉంటాయి. అవి శరీరంపై చూపే ప్రభావాల్లో కూడా తేడాలుంటాయని చాలామందికి తెలీదు. కొవ్వు పదార్ధాల గురించి ఆందోళన చెందడం అనవసరం అంటున్నారు న్యూట్రీషియన్లు. ఒక పద్ధతి ప్రకారం ఆహారం తీసుకుంటే సరిపోతుందంటున్నారు. శరీరానికి కొవ్వు అవసరమనే విషయాన్ని కూడా చెప్తున్నారు. ఇందుకు నాణ్యమైన ఆహారాన్ని తీసుకోవాలని చెప్తున్నారు.
శరీరానికి కొవ్వు అవసరం. శరీరానికి మేలు చేసే కొవ్వు, కీడు చేసే కొవ్వు ఉంటాయి. అయితే.. ఈ రెండింటి మధ్య తేడాలు గుర్తించాల్సి ఉంది. వాటి నిర్మాణంలో తేడాలు ఉంటాయి. వీటిని తెలుసుకుని ఆహారం తీసుకోవాలి. కండరాలు గట్టి పడటానికి, రోగనిరోధక శక్తిని అదుపులో ఉంచేందుకు దోహదపడతాయి. ఆహారంలోని కొవ్వు విటమిన్లు, ఖనిజాలను గ్రహిస్తాయి కూడా. మంచి కొవ్వు ఫ్యాటీ యాసిడ్‌ తయారయ్యేందుకు ఉపయోగపడుతుంది. మెదడు సరిగ్గా పనిచేసి జ్ఞాపకశక్తి పెంచేందుకు కొవ్వు పదార్థాలు తీసుకోవాల్సిందే.
గింజలు, పప్పులు, తృణ ధాన్యాల్లో మంచి కొవ్వు ఉంటుంది. ఇవి తింటే బలం కూడా. ఇవి జీవక్రియను కూడా పెంచుతాయి. ప్రకృతి నుంచి సహజంగా తయారయ్యే ఆహారంలో కూడా మంచి కొవ్వు ఉంటుంది. వీటిలో పాలీ, మోనో శాచ్యురేటెడ్ కొవ్వు ఉంటుంది. ఇవి శరీరానికి ఉపయోగపడటమే కాదు.. పేరుకుపోయిన కొవ్వును కరిగిస్తాయి కూడా. కొలెస్టరాల్ ను కూడా తగ్గిస్తాయి. టైప్-2 మధుమేహాన్ని కూడా తగ్గిస్తాయి. గుండెను ఆరోగ్యంగా ఉంచుతాయి. రక్తపోటును తగ్గిస్తాయి.
ప్యాకింగ్ చేసిన ఆహారం, రిఫైన్డ్ ఫుడ్, ప్రాసెసింగ్ ఫుడ్స్ లో కొవ్వు ఉంటుంది. ఇవే శరీరంపై, ఆరోగ్యంపై ప్రభావం చూపుతాయి. గుండె జబ్బులకు కూడా కారణం కావొచ్చు. శరీరంపై వాపు, మచ్చలు, దురద సమస్యలను కూడా తెచ్చిపెడతాయి. ఇటువంటి ఆహారానికి దూరంగా ఉండాలనే న్యూట్రీషియన్లు, డాక్టర్లు కూడా చెప్తూంటారు. విటమిన్ A, D, K, Eలు కొవ్వులో కరుగుతాయి. శరీరం వీటిని గ్రహించాలంటే తగిన మోతాదులో కొవ్వులు ఉండాలి. పాల పదార్థాల ద్వారా పోషకాలు కలిగించే ఇలాంటి కొవ్వు లభిస్తుంది.
గమనిక: ఈ చిట్కాలన్నీ ఆరోగ్య నిపుణులు ఆయా సందర్భాల్లో సూచించినవే ఇవ్వడం జరిగింది. ఈ కథనం మీ అవగాహన కోసం మాత్రమే. మంచి ఆరోగ్యం, ఆహారం కోసం డాక్టర్లను సంప్రదించడమే ఉత్తతమైన మార్గం. గమనించగలరు.