తెలంగాణ రాజకీయాల్లో గత కొన్నేళ్లుగా మాజీ ముఖ్యమంత్రి కేసీఆర్ ఎర్రవెల్లి ఫామ్హౌస్పై విపక్షాలు చేసిన ప్రచారాలు అన్నీ ఇన్నీ కావు. “కేసీఆర్ వేల ఎకరాలు దోచుకున్నారు.. వందల ఎకరాల్లో ఫామ్హౌస్ కట్టారు” అంటూ గతంలో కాంగ్రెస్, బీజేపీ నేతలు విపరీతమైన ఆరోపణలు చేశారు. అయితే, తాజాగా అసెంబ్లీ వేదికగా ముఖ్యమంత్రి రేవంత్ రెడ్డి అధికారిక ల్యాండ్ రికార్డుల లెక్కలు బయటపెట్టడంతో సీన్ రివర్స్ అయింది. ఇన్నాళ్లూ కాంగ్రెస్ చేసిన అవాస్తవ ప్రచారాల ముసుగును రేవంత్ రెడ్డే స్వయంగా తొలగించారంటూ బీఆర్ఎస్ శ్రేణులు ఇప్పుడు ముఖ్యమంత్రికి సోషల్ మీడియా వేదికగా ధన్యవాదాలు చెబుతున్నాయి.
సామాజిక భద్రత, నిషేధిత భూములపై జరిగిన చర్చలో ముఖ్యమంత్రి రేవంత్ రెడ్డి కేసీఆర్ కుటుంబానికి ఎక్కడెక్కడ ఎంత భూమి ఉందో అధికారికంగా చదివి వినిపించారు. ప్రభుత్వ రికార్డుల ప్రకారం.. సిద్దిపేట జిల్లా ఎర్రవెల్లిలో కేసీఆర్ మరియు వారి భార్య పేరిట ఉన్న రిజిస్టర్డ్ భూమి కేవలం 67.5 ఎకరాలు మాత్రమేనని స్పష్టం చేశారు. కేటీఆర్ కుటుంబం పేరిట 123 ఎకరాలు, హరీష్ రావు కుటుంబం పేరిట 30 ఎకరాలు, కవిత కుటుంబం పేరిట 37 ఎకరాల భూమి ఉన్నట్లు సీఎం తెలిపారు.
మొత్తంగా కేసీఆర్ కుటుంబ సభ్యులు, బంధువుల పేరిట 9 జిల్లాల్లో కలిపి సుమారు 439 ఎకరాల రిజిస్టర్డ్ భూమి మాత్రమే ఉందని సీఎం రేవంత్ రెడ్డి అసెంబ్లీ సాక్షిగా అధికారిక లెక్కలు తేల్చారు. ముఖ్యమంత్రి ప్రకటనపై మాజీ మంత్రి, బీఆర్ఎస్ సీనియర్ నేత హరీష్ రావు అసెంబ్లీలోనే స్ట్రాంగ్ కౌంటర్ ఇచ్చారు. గతంలో కేసీఆర్ ఫామ్హౌస్ వేల ఎకరాలు అని, లక్షల కోట్లు దోచుకున్నారని కాంగ్రెస్ నేతలు ఊదరగొట్టారని.. కానీ ఇప్పుడు అధికారంలోకి వచ్చాక రేవంత్ రెడ్డే స్వయంగా అది కేవలం 67 ఎకరాలే అని ఒప్పుకున్నారని చమత్కరించారు.
తమ ఆస్తుల వివరాలన్నీ ఎలక్షన్ అఫిడవిట్లలో ముందే స్పష్టంగా డిక్లేర్ చేశామని, ఇన్నాళ్లకు కాంగ్రెస్ అబద్ధాలను వాళ్ల ముఖ్యమంత్రే స్వయంగా బద్దలు కొట్టారని ఎద్దేవా చేశారు. ముఖ్యమంత్రి రేవంత్ రెడ్డి చదివిన ల్యాండ్ రికార్డుల క్లిప్పింగులను బీఆర్ఎస్ శ్రేణులు, కేసీఆర్ అభిమానులు సోషల్ మీడియాలో విపరీతంగా షేర్ చేస్తున్నారు. “థాంక్యూ రేవంత్ మామయ్య.. కేసీఆర్ గారి ఫామ్హౌస్ వేయి ఎకరాలు కాదు, కేవలం 67 ఎకరాలే అని తెలంగాణ ప్రజలందరికీ తెలిసేలా నిజం చెప్పినందుకు.” అంటూ నెటిజన్లు వ్యంగ్యంగా పోస్టులు పెడుతున్నారు. విపక్షాల అవాస్తవ ప్రచారాల వల్ల ఫామ్హౌస్ చాలా పెద్దదని భ్రమపడ్డామని, కానీ రేవంత్ రెడ్డి పుణ్యమా అని అసలు నిజం బయటపడిందని బీఆర్ఎస్ కేడర్ సంబరాలు చేసుకుంటోంది.