తెలంగాణ అధికార కాంగ్రెస్ పార్టీకి చెందిన జడ్చర్ల ఎమ్మెల్యే జె. అనిరుధ్ రెడ్డి ప్రభుత్వ అధికారుల తీరుపై, క్షేత్రస్థాయిలో జరుగుతున్న అవినీతిపై సంచలన వ్యాఖ్యలు చేశారు. రాజకీయ నాయకులు, జర్నలిస్టుల కంటే ప్రభుత్వ అధికారులే పెద్ద అవినీతిపరులుగా మారారని ఆయన తీవ్ర స్థాయిలో మండిపడ్డారు. మహబూబ్నగర్ జిల్లా జడ్చర్ల డిగ్రీ కళాశాలలో నిర్వహించిన జర్నలిస్టుల ఆత్మీయ సమ్మేళనంలో పాల్గొన్న ఆయన, ప్రభుత్వ కార్యాలయాల్లో లంచగొండితనం ఏ స్థాయిలో ఉందో సోదాహరణంగా వివరించడం రాష్ట్ర రాజకీయాల్లో పెను దుమారం రేపుతోంది.
క్షేత్రస్థాయిలో అధికార యంత్రాంగం పూర్తిగా గాడి తప్పిందని ఆవేదన వ్యక్తం చేసిన అనిరుధ్ రెడ్డి, తనకు ఎదురైన ఒక చేదు అనుభవాన్ని బహిరంగంగానే బయటపెట్టారు. జడ్చర్ల ఎమ్మార్వో కార్యాలయంలో ఒక వ్యక్తికి సంబంధించిన వారసత్వ ఆస్తుల బదిలీ (విరాసత్) పని చేయాలని స్వయంగా తానే అధికారులను అడిగినా వారు పట్టించుకోలేదని తెలిపారు. కానీ, అదే బాధితుడు వెళ్లి అధికారులకు రూ.15 వేలు లంచం ఇవ్వగానే క్షణాల్లో ఆ పని చేసి పెట్టారని ఆయన ఆరోపించారు. అంతేకాకుండా సబ్ రిజిస్ట్రార్ కార్యాలయంలో రోజుకు రూ.2 లక్షల వరకు అక్రమ వసూళ్లు జరుగుతున్నాయని సంచలన ఆరోపణలు చేశారు.
అభివృద్ధి పనుల్లో జరుగుతున్న కమిషన్ల దందాపైనా ఎమ్మెల్యే తీవ్ర ఆగ్రహం వ్యక్తం చేశారు. కేవలం రూ.5 లక్షల విలువైన సీసీ రోడ్ల పనులకు సంబంధించిన బిల్లులు, ఎంబీ రికార్డులు క్లియర్ చేయడానికి అధికారులు 10 నుంచి 20 శాతం వరకు కమిషన్లు డిమాండ్ చేస్తున్నారని మండిపడ్డారు. అధికారుల వేధింపులు, కమిషన్ల భారం తట్టుకోలేక కాంట్రాక్టర్లు పనులు వదిలేసి పారిపోతున్నారని, దీనివల్ల నియోజకవర్గంలో అభివృద్ధి పనులు ఎక్కడికక్కడ నిలిచిపోతున్నాయని ఆవేదన వ్యక్తం చేశారు.
ప్రజాప్రతినిధులు ఎంత మంచి చేయాలని ప్రయత్నించినా, క్షేత్రస్థాయిలో అధికారులు లంచాలు తీసుకోవడం వల్లే తమ ప్రభుత్వానికి చెడ్డపేరు వస్తోందని అనిరుధ్ రెడ్డి స్పష్టం చేశారు. ఇలాంటి అక్రమాలను జర్నలిస్టులు వెలికితీసి వార్తల్లో రాయాలని, ఆధారాలతో బయటపెడితే ఎంతటి అవినీతి అధికారులనైనా వదిలిపెట్టకుండా కఠిన చర్యలు తీసుకునే బాధ్యత తనదేనని ఆయన ప్రకటించారు. అధికార పార్టీ ఎమ్మెల్యేనే స్వయంగా ప్రభుత్వ యంత్రాంగంలోని అవినీతిని ఎండగట్టడం ఇప్పుడు రాజకీయ వర్గాల్లో హాట్ టాపిక్గా మారింది.