కూటమిలో కడప జెడ్పీ పీఠం చిచ్చు.. ఆదినారాయణ రెడ్డి రాజీనామా యోచన..?

ఆంధ్రప్రదేశ్ అధికార కూటమిలో జిల్లా పరిషత్ ఛైర్మన్ పదవుల పంపకం కడప జిల్లాలో తీవ్ర రాజకీయ ప్రకంపనలు సృష్టిస్తోంది. కడప జెడ్పీ ఛైర్మన్ పీఠాన్ని తెలుగుదేశం పార్టీకి కేటాయిస్తూ, అభ్యర్థిగా టీడీపీ సీనియర్ నేత పుత్తా నరసింహారెడ్డి పేరును ప్రకటించడంపై జమ్మలమడుగు బీజేపీ ఎమ్మెల్యే చదిపిరాళ్ల ఆదినారాయణ రెడ్డి తీవ్ర అసంతృప్తి వ్యక్తం చేస్తున్నారు. తన సోదరుడి కుమారుడు డాక్టర్ రాజేష్ రెడ్డికి కడప జెడ్పీ ఛైర్మన్ పదవి ఇప్పించేందుకు మొదటి నుంచి గట్టిగా ప్రయత్నించిన ఆదినారాయణ రెడ్డి, కూటమి పెద్దల నిర్ణయంతో తీవ్ర మనస్తాపానికి గురయ్యారు. ఈ నేపథ్యంలో ఆయన తన ఎమ్మెల్యే పదవికి రాజీనామా చేసే యోచనలో ఉన్నట్లు ప్రచారం జరగడం ఏపీ రాజకీయాల్లో హాట్ టాపిక్‌గా మారింది.

జెడ్పీ పీఠం కేటాయింపుపై తన ఆగ్రహాన్ని వ్యక్తం చేస్తూ ఆదినారాయణ రెడ్డి రాత్రికి రాత్రే కడప నుంచి విజయవాడకు చేరుకున్నారు. ఆయనతో పాటు జమ్మలమడుగు, ముద్దనూరు, ఎర్రగుంట్ల ప్రాంతాలకు చెందిన ముగ్గురు బీజేపీ జెడ్పీటీసీలు, సుమారు 20 మంది మున్సిపల్ కౌన్సిలర్లు, 17 మంది ఎంపీటీసీలు కూడా తమ పదవులకు రాజీనామా చేసేందుకు సిద్ధమవుతున్నట్లు సమాచారం. పార్టీ కార్యాలయంలో కాకుండా విజయవాడలోని ఒక ప్రైవేట్ హోటల్‌లో ఆదినారాయణ రెడ్డి మీడియా సమావేశం ఏర్పాటు చేసేందుకు సిద్ధమవ్వడంతో కూటమి నాయకత్వం అప్రమత్తమైంది.

విషయం తెలుసుకున్న ఏపీ బీజేపీ రాష్ట్ర అధ్యక్షుడు పీవీఎన్ మాధవ్, ఎమ్మెల్యే విష్ణుకుమార్ రాజు హుటాహుటిన ఆదినారాయణ రెడ్డి బస చేసిన హోటల్‌కు చేరుకుని ఆయనను బుజ్జగించే ప్రయత్నాలు చేపట్టారు. మరోవైపు కడప జిల్లాలో పుత్తా నరసింహారెడ్డి నూతన జెడ్పీ ఛైర్మన్‌గా బాధ్యతలు చేపట్టేందుకు ఏర్పాట్లు జరుగుతుండగా, విజయవాడలో ఆదినారాయణ రెడ్డి మీడియా సమావేశంలో ఎలాంటి సంచలన ప్రకటన చేస్తారోనన్న ఉత్కంఠ నెలకొంది.