టీడీపీకి షాక్ ఇచ్చిన బీజేపీ..!

ఆంధ్రప్రదేశ్‌లో రెండో దశ మున్సిపల్ ఎన్నికల వేళ పశ్చిమగోదావరి జిల్లా భీమవరంలో అధికార కూటమి పార్టీల మధ్య విభేదాలు ఒక్కసారిగా భగ్గుమన్నాయి. సీట్ల సర్దుబాటు విషయంలో తెలుగుదేశం, జనసేన స్థానిక నాయకుల ఏకపక్ష వైఖరిపై కేంద్ర మంత్రి భూపతిరాజు శ్రీనివాసవర్మ తీవ్ర ఆగ్రహం వ్యక్తం చేశారు. పొత్తు ధర్మాన్ని విస్మరించి, మిత్రపక్షంగా ఉన్న బీజేపీకి కనీస సమాచారం ఇవ్వకుండా అభ్యర్థుల జాబితాలను ప్రకటించడాన్ని ఆయన అవమానకరంగా అభివర్ణించారు. ఈ అవమానాలను ఎంతమాత్రం సహించేది లేదని స్పష్టం చేసిన శ్రీనివాసవర్మ, అవసరమైతే భీమవరం మున్సిపాలిటీలోని మొత్తం 52 వార్డుల్లోనూ బీజేపీ అభ్యర్థులను బరిలోకి దింపేందుకు సిద్ధంగా ఉన్నామని ప్రకటించి కూటమి పార్టీలకు గట్టి షాక్ ఇచ్చారు.

మొత్తం 52 వార్డులు ఉన్న భీమవరం మున్సిపాలిటీలో బీజేపీకి కేవలం నాలుగు లేదా ఐదు వార్డులు మాత్రమే కేటాయించడంపై కేంద్ర మంత్రి తీవ్ర అభ్యంతరం వ్యక్తం చేశారు. 1981 నుంచి భీమవరం మున్సిపాలిటీలో జరిగిన ప్రతి ఎన్నికలోనూ బీజేపీకి ప్రాతినిధ్యం ఉందని, తమ క్యాడర్ బలంగా ఉన్న ప్రాంతాల్లో కాకుండా కేవలం తన ఇంటి చుట్టుపక్కల ఉన్న వార్డులను మాత్రమే కేటాయించడం ఏమిటని ఆయన నిలదీశారు. వన్ టౌన్ పరిధిలోని 33 వార్డుల్లో ఒక్క సీటు కూడా బీజేపీకి కేటాయించలేదని, కనీసం తమ సీనియర్ నాయకులు మరియు రాజ్యసభ సభ్యుడు పాకా సత్యనారాయణ తనయుడికి సైతం అవకాశం ఇవ్వకపోవడం దారుణమని శ్రీనివాసవర్మ ఆవేదన వ్యక్తం చేశారు.

తమకు సంబంధం లేని, బలం లేని ప్రాంతాల్లో కేటాయించే సీట్లు తమకు అవసరం లేదని శ్రీనివాసవర్మ తేల్చిచెప్పారు. భీమవరంలో అన్ని వార్డుల్లో సొంతంగా పోటీ చేసే బలం, బలగం బీజేపీకి ఉన్నాయని, పొత్తులో కేటాయించే స్థానాల కంటే ఒంటరిగా పోటీ చేస్తేనే ఎక్కువ స్థానాల్లో గెలిచి సత్తా చాటగలమని ఆయన ధీమా వ్యక్తం చేశారు. స్థానిక నేతల ఒంటెద్దు పోకడల కారణంగా కూటమిలో సమన్వయం దెబ్బతింటోందని, మిత్రపక్షాలతో స్నేహపూర్వక పోటీ చేయడానికి కూడా తాము వెనుకాడబోమని ఆయన హెచ్చరించారు.

ఇప్పటివరకు కూటమి వర్సెస్ వైఎస్సార్‌సీపీ మధ్య పోరు ఉంటుందని భావించిన భీమవరం మున్సిపల్ ఎన్నికలు, కేంద్ర మంత్రి తాజా ప్రకటనతో త్రిముఖ పోరుకు దారితీసే పరిస్థితి కనిపిస్తోంది. కేంద్ర మంత్రి స్వయంగా రంగంలోకి దిగి ఒంటరి పోటీకి సిద్ధమని ప్రకటించడంతో అటు టీడీపీ, జనసేన వర్గాల్లోనూ అలజడి మొదలైంది. చివరి నిమిషంలో మూడు పార్టీల రాష్ట్ర నాయకత్వాలు జోక్యం చేసుకుని సీట్ల సర్దుబాటుపై సయోధ్య కుదురుస్తాయా, లేక భీమవరంలో కూటమి పార్టీలు విడివిడిగా బరిలోకి దిగుతాయా అనేది ఇప్పుడు సర్వత్రా ఉత్కంఠ రేపుతోంది.