కాంగ్రెస్ పార్టీ సీనియర్ నేత సోనియా గాంధీ రాసిన ఆత్మకథ ‘బిలాంగింగ్: ఎ జర్నీ ఆఫ్ లవ్’ (Belonging: A Journey Of Love) ప్రపంచవ్యాప్తంగా విడుదలైంది. ఈ పుస్తకంలో ఆమె తన వ్యక్తిగత, రాజకీయ జీవితానికి సంబంధించిన పలు ఆసక్తికరమైన విషయాలను పంచుకున్నారు. ముఖ్యంగా తన భర్త రాజీవ్ గాంధీ, కుమారుడు రాహుల్ గాంధీ రాజకీయ ప్రవేశాల సమయంలో తన మానసిక స్థితి ఎలా ఉందనే విషయాలను ఆమె ఇందులో బహిర్గతం చేశారు. దశాబ్దాల క్రితం రాజీవ్ గాంధీ రాజకీయాల్లోకి వస్తున్నప్పుడు ఆ ప్రమాదకరమైన ప్రపంచంలోకి వెళ్లవద్దని తాను ఎంతగానో బతిమిలాడానని, కానీ రాహుల్ గాంధీ రాజకీయాల్లోకి వచ్చే సమయంలో మాత్రం తాను ఎలాంటి అడ్డు చెప్పలేదని సోనియా గాంధీ పేర్కొన్నారు.
రాహుల్ గాంధీకి చిన్నప్పటి నుంచే రాజకీయాలపై ఆసక్తి ఉందని, లండన్‌లోని కేంబ్రిడ్జ్‌లో డెవలప్‌మెంట్ స్టడీస్‌లో ఎంఫిల్ పూర్తి చేసి విదేశాల్లో ఉద్యోగం చేస్తున్న సమయంలోనూ ఆయన భారతదేశ రాజకీయ పరిణామాలను నిశితంగా గమనించేవారని సోనియా వివరించారు. రాహుల్, ప్రియాంకలిద్దరికీ తమ తల్లిదండ్రుల నియోజకవర్గమైన అమేథీతో బలమైన అనుబంధం ఉందని, రాజీవ్ గాంధీ తన పాఠశాల రోజుల్లోనే రాహుల్‌ను గ్రామీణ ప్రాంతాల వాస్తవ పరిస్థితులను చూపించడానికి అమేథీకి తీసుకువెళ్లేవారని గుర్తుచేసుకున్నారు. రాహుల్ విదేశాల నుండి తిరిగి వచ్చిన తర్వాత, అమేథీలో ప్రజల ప్రతినిధిగా పనిచేయడానికి ఇష్టపడ్డారని ఆమె రాశారు.
రాహుల్ గాంధీని క్రియాశీల రాజకీయాల్లోకి రావాలని కాంగ్రెస్ పార్టీ తీవ్రంగా ఒత్తిడి తెచ్చిన తరుణంలో, అది తన జీవితాన్ని పూర్తిగా మార్చేస్తుందని, ప్రజల నిరంతర నిఘాలో ఉండాల్సి వస్తుందని తెలిసినప్పటికీ రాహుల్ ఈ నిర్ణయం తీసుకున్నారని సోనియా గాంధీ తెలిపారు. తన సోదరి ప్రియాంక, తల్లి సోనియాతో సుదీర్ఘంగా చర్చించి, లోతుగా ఆలోచించిన తర్వాతే రాహుల్ రాజకీయ ప్రవేశంపై ఒక ముగింపునకు వచ్చారని ఆమె స్పష్టం చేశారు. రాహుల్ తన తండ్రి రాజీవ్ గాంధీ ఎదుర్కొన్న ముప్పును ముందుగానే ఊహించి, ఆ విషయంలో ఆయనతో వాదించినప్పటికీ.. చివరికి తన తండ్రి విలువలు, ధైర్యం పట్ల ఉన్న గౌరవంతోనే ప్రజా సేవలోకి అడుగుపెట్టారని సోనియా తన పుస్తకంలో పేర్కొన్నారు.
2004 మార్చిలో రాహుల్ అమేథీ నుండి పోటీ చేయగా, తాను రాయ్‌బరేలీకి మారినట్లు ఆమె గుర్తుచేసుకున్నారు. ఇక రాజకీయాల్లోకి వచ్చిన తర్వాత రాహుల్ తన తండ్రి తరహాలోనే అమేథీ గ్రామీణ ప్రాంతాలకు పరిశ్రమలు, వ్యాపారాలను తీసుకురావడానికి ఎంతో ఉత్సాహంగా పనిచేశారని సోనియా కొనియాడారు. ప్రియాంక గాంధీ కూడా అమేథీలో సెల్ఫ్ హెల్ప్ గ్రూపులను ఏర్పాటు చేసి మహిళల్లో మార్పుకు కారకురాలయ్యారని, రాహుల్ భాగస్వామ్యంతో అమేథీ ఎస్‌హెచ్‌జీ ఉత్తర భారతదేశంలోనే అతిపెద్ద గ్రూపుగా అవతరించిందని తెలిపారు. అంతేకాకుండా అమేథీలో ఎంతో అవసరమైన కంటి ఆసుపత్రిని కూడా రాహుల్ ఏర్పాటు చేశారని, తదనంతర కాలంలో దాని బ్రాంచ్‌లు లక్నో, హర్యానా వరకు విస్తరించాయని సోనియా గాంధీ తన ఆత్మకథలో వివరించారు.