ఆంధ్రప్రదేశ్ వ్యాప్తంగా గ్రామ పంచాయతీ ఎన్నికల నగారా మోగడంతో గ్రామాల్లో రాజకీయ వేడి ఒక్కసారిగా రాజుకుంది. ముఖ్యంగా గుంటూరు జిల్లాలో 13 మండలాల్లోని 208 గ్రామ పంచాయతీలకు మూడు విడతల్లో ఎన్నికలు జరగనున్న నేపథ్యంలో అధికార కూటమి పార్టీల్లో అంతర్గత అసమ్మతి సెగలు భగ్గుమంటున్నాయి. ఏళ్ల తరబడి పార్టీ జెండా మోసి, కష్టకాలంలో అండగా నిలిచిన అసలైన కార్యకర్తలను కాదని, ఇటీవలే వైసీపీ నుంచి వచ్చి చేరిన వలస నేతలకు సర్పంచ్ టికెట్లు, మద్దతు ప్రకటించడంపై జిల్లా వ్యాప్తంగా కూటమి శ్రేణులు తీవ్ర స్థాయిలో మండిపడుతున్నాయి.
“జెండా మోసింది మేము.. ఇప్పుడు పదవులు వలస నేతలకా?” అంటూ క్షేత్రస్థాయి కార్యకర్తలు బహిరంగంగానే తమ ఆవేదనను, ఆగ్రహాన్ని వ్యక్తం చేస్తున్నారు. గత ప్రభుత్వ హయాంలో ఎన్నో ఇబ్బందులు ఎదుర్కొని పార్టీ కోసం పనిచేసిన తమను పక్కన పెట్టడం ఎంతవరకు న్యాయమని ప్రశ్నిస్తున్నారు. పంచాయతీ ఎన్నికలను ఏకగ్రీవం చేసుకునే గ్రామాలకు ప్రభుత్వం రూ.50 లక్షల వరకు భారీ ప్రోత్సాహకాలను ప్రకటించడంతో, ఆ పదవులను దక్కించుకునేందుకు వలస నేతలు స్థానిక ప్రజాప్రతినిధుల చుట్టూ తిరుగుతూ టికెట్లు ఎగరేసుకుపోతున్నారని అసమ్మతి నేతలు ఆరోపిస్తున్నారు.
ఈ వ్యవహారంలో స్థానిక ఎమ్మెల్యేలు, పార్టీ జిల్లా అధ్యక్షులు వెంటనే జోక్యం చేసుకుని నిజమైన కార్యకర్తలకు న్యాయం చేయాలని అసమ్మతి నేతలు గట్టిగా డిమాండ్ చేస్తున్నారు. ఒకవేళ తమ విజ్ఞప్తిని పట్టించుకోకుండా వలస నేతలకే ప్రాధాన్యత ఇస్తే సహించేది లేదని స్పష్టం చేస్తున్నారు. “ఇప్పుడే మమ్మల్ని ఇలా నిర్లక్ష్యం చేస్తే.. రాబోయే 2029 ఎన్నికల్లో మా సత్తా ఏంటో చూపిస్తాం” అంటూ సొంత పార్టీ నేతలకే కార్యకర్తలు నేరుగా అల్టిమేటం జారీ చేయడం గుంటూరు జిల్లా రాజకీయాల్లో కలకలం రేపుతోంది. మరి ఈ అసమ్మతి జ్వాలలను కూటమి అగ్రనాయకత్వం ఎలా చల్లారుస్తుందో వేచి చూడాలి.