బెజవాడ డిప్యూటీ మేయర్ పీఠంపై రసవత్తర పోరు..!

విజయవాడ నగరపాలక సంస్థ డిప్యూటీ మేయర్ పదవిపై బెజవాడ రాజకీయాల్లో తీవ్ర ఆసక్తి నెలకొంది. ఇటీవల జరిగిన ఎన్నికల్లో జనసేన అభ్యర్థి వంగవీటి రాధాకృష్ణ భారీ మెజారిటీతో మేయర్‌గా ఎన్నికైన సంగతి తెలిసిందే. ఈ నేపథ్యంలో కూటమి ఒప్పందం ప్రకారం డిప్యూటీ మేయర్ పదవి తెలుగుదేశం పార్టీకి దక్కనుండటంతో, ఆ పీఠాన్ని దక్కించుకునేందుకు టీడీపీ కార్పొరేటర్ల మధ్య తీవ్ర స్థాయిలో పోటీ ఏర్పడింది. ముఖ్యంగా ఈసారి డిప్యూటీ మేయర్ రేసులో ఉన్నత విద్యావంతులైన యువ కార్పొరేటర్ల పేర్లు ప్రముఖంగా వినిపిస్తున్నాయి.

అందులో విజయవాడ తూర్పు నియోజకవర్గంలోని 16వ డివిజన్ నుంచి తొలిసారిగా పోటీ చేసి 2,230 ఓట్ల భారీ మెజారిటీతో గెలుపొందిన బీటెక్ గ్రాడ్యుయేట్ నాగశ్రావణ్ కిలారు పేరు ముందంజలో ఉంది. ఆయనతో పాటు 13వ డివిజన్ నుంచి తొలిసారి కార్పొరేటర్‌గా ఘన విజయం సాధించిన దేవినేని నాగ మహిత పేరు కూడా రేసులో బలంగా వినిపిస్తోంది. మరోవైపు, యువతతో పాటు సీనియర్లు కూడా ఈ పదవి కోసం గట్టిగానే ప్రయత్నాలు చేస్తున్నారు.

19వ డివిజన్ నుంచి నాలుగోసారి విజయం సాధించిన సీనియర్ కార్పొరేటర్ ముమ్మినేని ప్రసాద్ పేరు కూడా పరిశీలనలో ఉంది. వీరితో పాటు బాలస్వామి, లలిత వంటి మరికొందరు కార్పొరేటర్లు కూడా తమవంతు ప్రయత్నాలు ముమ్మరం చేశారు. అయితే, యువతకు ప్రాధాన్యత ఇచ్చే అధిష్ఠానం ఈసారి కొత్త ముఖాలకు అవకాశం ఇస్తుందా లేక సీనియర్లకు పట్టం కడుతుందా అనేది త్వరలోనే తేలనుంది.