మాధవ్ బుజ్జగింపులకు ఆదినారాయణ రెడ్డి ససేమిరా..!

కడప జిల్లా పరిషత్ ఛైర్మన్ పీఠం కేటాయింపు వ్యవహారం అధికార కూటమిలో పెను ప్రకంపనలు సృష్టిస్తోంది. కడప జెడ్పీ ఛైర్మన్ పదవిని తెలుగుదేశం పార్టీకి కేటాయించి, టీడీపీ నేత పుత్తా నరసింహారెడ్డి పేరును ప్రకటించడంపై జమ్మలమడుగు బీజేపీ ఎమ్మెల్యే ఆదినారాయణ రెడ్డి తీవ్ర ఆగ్రహంతో రగిలిపోతున్నారు. తన సోదరుడి కుమారుడు డాక్టర్ రాజేష్ రెడ్డికి జెడ్పీ ఛైర్మన్ పదవి దక్కకపోవడంతో మనస్తాపం చెందిన ఆయన, రాత్రికి రాత్రే తన మద్దతుదారులతో కలిసి విజయవాడ చేరుకుని మినర్వా గ్రాండ్ హోటల్‌లో బస చేశారు.

విజయవాడలోని హోటల్‌లో ఉన్న ఆదినారాయణ రెడ్డిని శాంతింపజేసేందుకు బీజేపీ అధిష్ఠానం రంగంలోకి దిగింది. తొలుత విశాఖ ఎమ్మెల్యే విష్ణుకుమార్ రాజు హోటల్‌కు వెళ్లి ఆదితో భేటీ అయ్యారు. ఆయన వెళ్లిన తర్వాత ఏపీ బీజేపీ రాష్ట్ర అధ్యక్షుడు పీవీఎన్ మాధవ్ స్వయంగా హోటల్‌కు చేరుకుని ఆదినారాయణ రెడ్డిని బుజ్జగించే ప్రయత్నం చేశారు. అయితే, మాధవ్ బుజ్జగింపులకు ఆదినారాయణ రెడ్డి ఏమాత్రం తలొగ్గలేదు. స్థానిక ఎన్నికల్లో కష్టపడి ఏడు జెడ్పీటీసీ స్థానాలను గెలిపించుకుంటే, తమ కుటుంబానికి అన్యాయం చేశారని ఆయన స్పష్టం చేశారు. చర్చల అనంతరం బయటకు వచ్చిన బీజేపీ చీఫ్ మాధవ్ మీడియాతో మాట్లాడుతూ..

“ఆదినారాయణ రెడ్డిని హ్యాండిల్ చేయడం జగన్ వల్లే కాలేదు.. మనం ఆయన్ను ఆపటం కష్టం” అంటూ ఆసక్తికర వ్యాఖ్యలు చేసి అక్కడి నుంచి వెళ్లిపోయారు. మాధవ్ తో చర్చలు విఫలమైన తర్వాత మీడియాతో మాట్లాడిన ఆదినారాయణ రెడ్డి సంచలన ప్రకటన చేశారు. తన సోదరుల కుమారులైన రాజేష్ రెడ్డితో పాటు మరో జెడ్పీటీసీ సభ్యుడు తమ పదవులకు రాజీనామా చేస్తున్నట్లు ప్రకటించారు. ఇక తన ఎమ్మెల్యే పదవికి రాజీనామా చేసే విషయంపై రేపు ఉదయం తుది నిర్ణయం ప్రకటిస్తానని ఆయన స్పష్టం చేశారు. తనకు మంత్రి పదవులు గానీ, ప్రత్యామ్నాయ పదవులు గానీ అవసరం లేదని, ఎక్కడ మోసం జరిగిందో తెలుసుకున్న తర్వాతే తన కార్యాచరణ ప్రకటిస్తానని ఆది తేల్చిచెప్పడంతో కడప రాజకీయాల్లో తీవ్ర ఉత్కంఠ నెలకొంది.