తెలంగాణ కాంగ్రెస్ పార్టీలో అంతర్గత విభేదాలు మరోసారి బహిర్గతమయ్యాయి. మునుగోడు ఎమ్మెల్యే కోమటిరెడ్డి రాజగోపాల్ రెడ్డి సొంత పార్టీ ప్రభుత్వంపైనా, మంత్రుల పనితీరుపైనా మరోమారు తీవ్రస్థాయిలో విరుచుకుపడ్డారు. గత పదేళ్ల బీఆర్ఎస్ పాలనలో రాష్ట్రం తీవ్ర అప్పుల పాలైందని, కనీసం కాంగ్రెస్ ప్రభుత్వమైనా నిజాయితీగా పరిపాలన చేయాలని ఆయన హితవు పలికారు. అధికారంలో ఉన్నాం కదా అని రాష్ట్రాన్ని దొంగలకు, పెట్టుబడిదారులకు, కాంట్రాక్టర్లకు, అధికారులకు దోచిపెట్టవద్దని మంత్రులకు ఘాటుగా సూచించారు.
పేదలకు అందాల్సిన సంక్షేమ పథకాలను వారికి సక్రమంగా అందించాలని, నిధుల కేటాయింపు మరియు అభివృద్ధి విషయంలో అన్ని నియోజకవర్గాలకు న్యాయంగా వ్యవహరించాలని కోరారు. ముఖ్యమంత్రి రేవంత్ రెడ్డి వ్యాఖ్యలకు కౌంటర్ ఇచ్చే క్రమంలో రాజగోపాల్ రెడ్డి మరింత ఘాటుగా స్పందించారు. ప్రభుత్వంలో ఉన్న నేతలకు మంచి బుద్ధిని ప్రసాదించాలని తాను అయ్యప్ప స్వామిని వేడుకుంటున్నానని వ్యాఖ్యానించారు. పదవులు ఉన్నాయని అహంకారంతో నోటికొచ్చినట్లు మాట్లాడటం మానుకోవాలని, వినయంగా, ధర్మబద్ధంగా మంచి పాలన అందిస్తేనే ప్రజలు మళ్లీ ఆశీర్వదిస్తారని స్పష్టం చేశారు.
కేవలం ప్రతిపక్షాలపై విరుచుకుపడటం కాదని, ఎన్నికల సమయంలో కాంగ్రెస్ పార్టీ ప్రజలకు ఇచ్చిన హామీలు ఏంటి..? ప్రస్తుతం క్షేత్రస్థాయిలో అమలు చేస్తున్నది ఏంటి..? అన్నది ఆలోచించుకోవాలని నిలదీశారు. రాష్ట్రంలో నిజాయితీగా, అవినీతి లేకుండా పాలన చేస్తున్నారా లేదా అన్నది మంత్రులు, నేతలు ఒక్కసారి గుండెపై చేయి వేసుకుని ఆత్మపరిశీలన చేసుకోవాలని రాజగోపాల్ రెడ్డి సవాల్ విసిరారు. సొంత నియోజకవర్గాలకే వేల కోట్ల నిధులు తరలించుకుపోతూ, వెనుకబడిన మునుగోడు వంటి ప్రాంతాలపై వివక్ష చూపితే ప్రశ్నించకూడదా అని ఆయన ఆవేదన వ్యక్తం చేశారు. ఒకవైపు రాజగోపాల్ రెడ్డి వ్యాఖ్యలపై టీపీసీసీ, కాంగ్రెస్ అధిష్టానం సీరియస్గా దృష్టి సారించి నివేదిక తెప్పించుకున్న తరుణంలో, ఆయన ఏమాత్రం వెనక్కి తగ్గకుండా చేసిన ఈ వ్యాఖ్యలు తెలంగాణ రాజకీయాల్లో పెను దుమారం రేపుతున్నాయి.