తెలంగాణ అధికార పార్టీ కాంగ్రెస్లో అంతర్గత విభేదాలు మరోసారి భగ్గుమన్నాయి. మునుగోడు కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి ముఖ్యమంత్రి రేవంత్ రెడ్డి లక్ష్యంగా సంచలన వ్యాఖ్యలు చేశారు. తన నియోజకవర్గానికి నిధులు కేటాయించాలని అడిగినందుకు సీఎం రేవంత్ రెడ్డి తనను “పండబెట్టి తొక్కుతా” అన్నారంటూ రాజగోపాల్ రెడ్డి తీవ్ర స్థాయిలో మండిపడ్డారు. ఒక ముఖ్యమంత్రి స్థాయిలో ఉండి మాట్లాడే భాష ఇదేనా అంటూ ఆయన నిలదీశారు.
ఓ కార్యక్రమంలో పాల్గొన్న సందర్భంగా రాజగోపాల్ రెడ్డి ప్రభుత్వ పనితీరుపై, నిధుల కేటాయింపుపై తీవ్ర అసంతృప్తి వ్యక్తం చేశారు. కొడంగల్ నియోజకవర్గానికి రూ.10 వేల కోట్లు తీసుకుపోతున్న ముఖ్యమంత్రి, అత్యధిక ఫ్లోరైడ్ సమస్య ఉన్న కరువు ప్రాంతమైన మునుగోడుకు కనీసం రూ.500 కోట్లు కూడా ఇవ్వకపోవడం ఏంటని ప్రశ్నించారు. తెలంగాణ అంటే కేవలం కొడంగల్, మధిర, హుజూర్నగర్ నియోజకవర్గాలు మాత్రమే కాదని, వెనుకబడిన ప్రాంతాలను కూడా సమానంగా అభివృద్ధి చేయాలని హితవు పలికారు.
మునుగోడులో డిండి ఎత్తిపోతల పథకం, రోడ్లు, చౌటుప్పల్లో వంద పడకల ఆస్పత్రి పనులు ఎక్కడికక్కడ నిలిచిపోయాయని ఆవేదన వ్యక్తం చేశారు. ముఖ్యమంత్రికి అదృష్టం కలిసి వచ్చి ఆ పదవి దక్కిందని, ఇంకో రెండేళ్ల పాటు అందరినీ కలుపుకుని తండ్రి పాత్ర పోషించాలని రాజగోపాల్ రెడ్డి సూచించారు. అధికారం ఉంది కదా అని ఏం చేసినా నడుస్తుందనుకుంటే కుదరదని, తాను తొక్కితే తొక్కించుకునే రకం కాదని, అలా చేస్తే కురుక్షేత్రం తప్పదని హెచ్చరించారు. నాలుగు గోడల మధ్య వినతిపత్రాలు ఇస్తే పట్టించుకోకపోవడం వల్లే బయట మాట్లాడాల్సి వస్తోందని, సొంత పార్టీ ఎమ్మెల్యేనే ముఖ్యమంత్రిపై ఈ స్థాయిలో విరుచుకుపడటం ఇప్పుడు తెలంగాణ రాజకీయాల్లో హాట్ టాపిక్గా మారింది.