విజయ డెయిరీ ఎపిసోడ్‌లో కూటమి సర్కార్ సెల్ఫ్ గోల్..!

ఆంధ్రప్రదేశ్ రాజకీయాల్లో ప్రస్తుతం కృష్ణా జిల్లా పాల ఉత్పత్తిదారుల పరస్పర సహకార సంఘం (విజయ డెయిరీ) వ్యవహారం పెను దుమారం రేపుతోంది. సహకార సంఘాల ఎన్నికల నుంచి ఛైర్మన్ నియామకం వరకు సాగిన నాటకీయ పరిణామాలు, చివరకు ఆంధ్రప్రదేశ్ హైకోర్టు ఇచ్చిన సంచలన తీర్పు రాష్ట్ర ప్రభుత్వానికి, అధికార కూటమికి పెద్ద తలనొప్పిగా మారాయి. విజయ డెయిరీ ఛైర్మన్‌గా గన్నవరం మాజీ ఎమ్మెల్యే దాసరి వెంకట బాలవర్ధనరావుతో పాటు మరో నలుగురు బోర్డు డైరెక్టర్ల ఎన్నిక చెల్లదంటూ ఉన్నత న్యాయస్థానం ఇచ్చిన తీర్పు ఇప్పుడు రాజకీయ వర్గాల్లో హాట్ టాపిక్‌గా మారింది.

ఈ మొత్తం ఎపిసోడ్‌ను నిశితంగా పరిశీలిస్తే, పట్టు కోసం అధికార పార్టీ చేసిన అతి ప్రయత్నమే చివరకు ప్రభుత్వ ప్రతిష్టను బజారున పడేసిందనే విశ్లేషణలు బలంగా వినిపిస్తున్నాయి. అసలు ఈ వివాదానికి బీజం పడింది ఛైర్మన్ పదవి కోసం జరిగిన రాజకీయ జోక్యంతోనే. గత ఏడేళ్లుగా విజయ డెయిరీ డైరెక్టర్‌గా అనుభవం ఉన్న చలసాని ఆంజనేయులు నిబంధనల ప్రకారం ఛైర్మన్ పదవికి నామినేషన్ దాఖలు చేసి ఏకగ్రీవంగా ఎన్నికయ్యారు. అయితే, అధిష్టానం ఆదేశాలను కాదని నామినేషన్ వేశారన్న కారణంతో మంత్రులు కొల్లు రవీంద్ర, పార్థసారథి నేరుగా రంగంలోకి దిగి, పార్టీ కావాలా లేక పదవి కావాలా అని ఒత్తిడి తెచ్చినట్లు జరిగిన ప్రచారం ప్రభుత్వానికి తొలి మైనస్ అయింది.

అనారోగ్యంతో ఆస్పత్రి బెడ్‌పై ఉన్న వ్యక్తితో బలవంతంగా రాజీనామా చేయించి, ఆ స్థానంలో దాసరి బాలవర్ధనరావును కూర్చోబెట్టడం ప్రజాస్వామ్య వాదుల నుంచి తీవ్ర విమర్శలకు దారితీసింది. సహకార సంస్థలను స్వయంప్రతిపత్తితో నడపాలని చెప్పే ప్రభుత్వమే, మంత్రులను పంపి మరీ ఒక సహకార సంఘం ఛైర్మన్‌ను దించేయడం ప్రజల్లోకి తప్పుడు సంకేతాలను పంపింది. ఇక ఈ వ్యవహారంలో అసలు ట్విస్ట్ న్యాయస్థానంలో ఎదురైంది. ఛైర్మన్ దాసరి బాలవర్ధనరావుతో పాటు డైరెక్టర్లు సాయి (ఘంటసాల), పాలడుగు నాని (గన్నవరం), నాగేశ్వరరావు (నందిగామ), శైలజ (మైలవరం) ఎన్నికల సమయంలో, వారిపై పోటీ చేసిన అభ్యర్థులను డిఫాల్టర్లుగా ప్రకటించి పక్కన పెట్టడంపై పిటిషనర్లు హైకోర్టును ఆశ్రయించారు.

అంతేకాకుండా బోర్డు ఏర్పాటుకు పది మంది కోరం సభ్యులు ఉండాల్సిన సమయంలో కేవలం ఎనిమిది మందితోనే ఎన్నికల తంతు ముగించడాన్ని న్యాయస్థానం తీవ్రంగా తప్పుబట్టింది. చట్టపరమైన నిబంధనలను, కనీస కోరం నియమాలను కూడా పట్టించుకోకుండా అధికార బలంతో ఏకగ్రీవాలు చేసుకోవాలని చూడటం వల్లే హైకోర్టు ఈ ఐదుగురి ఎన్నికను రద్దు చేస్తూ మొట్టికాయలు వేసింది. హైకోర్టు తీర్పు వెలువడిన వెంటనే విజయ డెయిరీ యాజమాన్యం దిద్దుబాటు చర్యలకు దిగి, తదుపరి కార్యాచరణపై చర్చించేందుకు బోర్డు డైరెక్టర్లకు అత్యవసర సమావేశం నోటీసులు జారీ చేసింది.

అయితే, ఈ మొత్తం వ్యవహారంలో నష్టం జరగాల్సింది అప్పటికే జరిగిపోయింది. పాడి రైతుల సంక్షేమం కోసం పనిచేయాల్సిన కృష్ణా మిల్క్ యూనియన్‌ను రాజకీయ పునరావాస కేంద్రంగా మార్చాలనే ప్రయత్నంలో ప్రభుత్వ పెద్దలు చట్టబద్ధతను విస్మరించారన్న విమర్శలు వెల్లువెత్తుతున్నాయి. ఒకవైపు సొంత పార్టీ సీనియర్ నేతను అవమానకర రీతిలో పదవి నుంచి తప్పించి అపవాదు మూటగట్టుకోవడం, మరోవైపు ఎంతో ప్రతిష్టాత్మకంగా భావించి కూర్చోబెట్టిన నేత ఎన్నికను హైకోర్టు రద్దు చేయడం చూస్తుంటే, విజయ డెయిరీ విషయంలో ప్రభుత్వం అనవసరపు జోక్యంతో చేజేతులా పరువు పోగొట్టుకుందన్నది స్పష్టమవుతోంది.