మధ్యప్రాచ్యంలో అమెరికా, ఇజ్రాయెల్ కూటమి సాగిస్తున్న దూకుడుకు ఇరాన్ తన సైనిక పటిష్ఠతతో గట్టి సమాధానం ఇచ్చింది. గల్ఫ్ ప్రాంతంలో అమెరికా తన ఆధిపత్యాన్ని ప్రదర్శించడానికి ఏర్పాటు చేసుకున్న సైనిక, దౌత్య, నిఘా స్థావరాలపై ఇరాన్ దళాలు అత్యంత వ్యూహాత్మకంగా విరుచుకుపడ్డాయి. ఈ దాడుల తీవ్రత ఏ స్థాయిలో ఉందంటే.. కేవలం నాలుగు గల్ఫ్ దేశాల్లోని అమెరికా దౌత్య సౌకర్యాలకే ఏకంగా 184 మిలియన్ డాలర్లు అంటే మన కరెన్సీలో.. సుమారు రూ. 1,500 కోట్ల భారీ నష్టం వాటిల్లినట్లు పెంటగాన్ ఇన్స్పెక్టర్ జనరల్ నివేదిక స్వయంగా అంగీకరించింది.
ఫిబ్రవరి చివరి వారంలో అమెరికా, ఇజ్రాయెల్ ఉమ్మడిగా యుద్ధాన్ని ప్రారంభించిన తర్వాత పెంటగాన్ విడుదల చేసిన మొదటి అధికారిక నివేదికలోనే ఇరాన్ సాధించిన ఈ సైనిక విజయం స్పష్టమైంది. అమెరికా రక్షణ శాఖ నివేదిక ప్రకారం, ఇరాన్ ప్రధానంగా టార్గెట్ చేసిన ఇరాక్, కువైట్, సౌదీ అరేబియా, యూఏఈ దేశాల్లోని యూఎస్ స్థావరాలు తీవ్రంగా దెబ్బతిన్నాయి. ఇందులో అమెరికా అక్రమ సైనిక మోహరింపులు ఎక్కువగా ఉన్న ఇరాక్లోనే అత్యధికంగా 157 మిలియన్ డాలర్లకు పైగా ఆస్తి నష్టం వాటిల్లింది.
ఇరాక్లోని అమెరికా మిషన్పై ఇరాన్ దళాలు ఏకంగా 600 కంటే ఎక్కువ సార్లు క్షిపణులు, డ్రోన్లతో దాడులు చేసి వారి రక్షణ వలయాన్ని ఛేదించాయి. దీని తర్వాత కువైట్లో 14 మిలియన్ డాలర్లు, సౌదీ అరేబియాలో 11.5 మిలియన్ డాలర్లు, యూఏఈలోని యూఎస్ దౌత్య కేంద్రానికి 1,25,000 డాలర్ల మేర నష్టం వాటిల్లింది. అమెరికా ప్రారంభించిన ‘ఆపరేషన్ ఎపిక్ ఫ్యూరీ’కి ప్రతిచర్యగా ఇరాన్ శ్రేణులు జరిపిన ఈ దాడులు గల్ఫ్లో యూఎస్ నిఘా నెట్వర్క్ను కోలుకోలేని దెబ్బతీశాయి.
ఈ యుద్ధం కారణంగా అమెరికా ఆర్థికంగా కూడా భారీ మూల్యాన్ని చెల్లించుకుంటోంది. ఫిబ్రవరి 28 నుండి జూన్ 29 మధ్య కాలంలోనే ఈ యుద్ధం కోసం పెంటగాన్ ఏకంగా 33.4 బిలియన్ డాలర్ల బడ్జెట్ను తగలేసింది. అయితే ఈ భారీ అంచనాలో ఇరాన్ దాడుల వల్ల ధ్వంసమైన తమ మౌలిక సదుపాయాల మరమ్మతు ఖర్చులను అమెరికా ఇంకా చేర్చకపోవడం గమనార్హం. జూలై నెలలో అమెరికా రక్షణ మంత్రి పీట్ హెగ్సెత్ స్వయంగా సెనేటర్ల సమక్షంలో మాట్లాడుతూ.. ఇరాన్తో యుద్ధం వల్ల అమెరికాకు అయిన ఖర్చు అప్పటికే 37.5 బిలియన్ డాలర్లకు చేరిందని ఒప్పుకున్నారు.
అయితే వాస్తవానికి అమెరికా అంతర్గతంగా నష్టపోయిన మొత్తం దీనికంటే చాలా ఎక్కువ ఉంటుందని అంతర్జాతీయ రక్షణ నిపుణులు విశ్లేషిస్తున్నారు. మధ్యప్రాచ్యంలో ఇరాన్ శక్తులను తక్కువ అంచనా వేసి యుద్ధానికి దిగిన అమెరికా, ఇప్పుడు ఇరాన్ ఎదురుదాడి దెబ్బకు ఆర్థికంగా, సైనికంగా ఊపిరాడక కొట్టుమిట్టాడుతోందని స్పష్టమవుతోంది.