Kingdom: టాలీవుడ్ రౌడీ హీరో విజయ్ దేవరకొండ నటించిన లేటెస్ట్ సినిమా కింగ్డమ్ ఈ చిత్రంలో భాగ్యశ్రీ బోర్సే, సత్యదేవ్, వెంకటేష్ ముఖ్య పాత్రలు పోషించిన విషయం తెలిసిందే. గౌతమ్ తిన్ననూరి ఈ మూవీకి దర్శకత్వం వహించారు. శ్రీకర స్టూడియోస్ సమర్పణలో సితార ఎంటర్టైన్మెంట్స్, ఫార్చూన్ ఫోర్ సినిమాస్ పతాకాలపై సూర్యదేవర నాగ వంశీ, సాయి సౌజన్య ప్రతిష్టాత్మకంగా ఈ సినిమాను నిర్మించారు. రాక్ స్టార్ అనిరుధ్ రవిచందర్ సంగీతం అందించిన ఈ సినిమా జూలై 31న ప్రేక్షకుల ముందుకు రానుంది.
ఇప్పటికే ఈ సినిమాపై భారీగా అంచనాలు నెలకొన్నాయి. ఈ సినిమా కోసం ఎంతో ఆతృతగా ఎదురు చూస్తున్నారు అభిమానులు. ముఖ్యంగా ఈ సినిమా కోసం ప్రేక్షకులు ఎంతో ఎక్సైటింగ్గా ఎదురుచూస్తున్నారు. అలాగే ఈ సినిమా నుంచి విడుదల అయిన అప్డేట్లు సినిమాపై అంచనాలను భారీగా పెంచేశాయి. ఇది ఇలా ఉంటే తాజాగా హైదరాబాద్ లోని యూసఫ్గూడ పోలీస్ గ్రౌండ్స్ లో కింగ్డమ్ ప్రీ రిలీజ్ వేడుక అంగరంగ వైభవంగా జరిగింది. అభిమానుల కోలాహలం నడుమ అతిరథ మహారథుల సమక్షంలో వైభవంగా జరిగిన ఈ వేడుకలో అనిరుధ్ సంగీత ప్రదర్శన ప్రత్యేక ఆకర్షణగా నిలిచింది.
అయితే ఈ ఈవెంట్ లో భాగంగా వెంకటేష్ మాట్లాడుతూ.. మలయాళంలో చిన్న చిన్న పాత్రలు చేసుకుంటూ నటుడిగా ప్రయాణం మొదలు పెట్టిన నేను ఇప్పుడు కింగ్డమ్ మూవీలో భాగం అయ్యాను. ఈ సినిమాలో నటించడం చాలా సంతోషంగా ఉంది. నాకు ఈ అవకాశం ఇచ్చిన నాగవంశీ గారికి చాలా థాంక్స్. ఇప్పటిదాకా నేను పని చేసిన బెస్ట్ ప్రొడక్షన్ హౌస్ సితార ఎంటర్టైన్మెంట్స్. సితారలో మరిన్ని సినిమాలు చేసే అవకాశం రావాలని కోరుకుంటున్నాను. సత్యదేవ్ గారు గొప్ప నటుడు. ఆయన నుంచి నేను ఎంతో నేర్చుకున్నాను. తెలుగులో నేను విజయ్ దేవరకొండ గారితో కింగ్డమ్ సినిమా చేస్తున్నానని చెప్పినప్పుడు అందరూ ఆశ్చర్యపోయారు. గౌతమ్ గారు ఈ సినిమాలో నా నటనను మెచ్చుకోవడం గర్వంగా అనిపించింది అని తెలిపారు వెంకటేష్. ఈ సందర్భంగా ఆయన చేసిన వాఖ్యలు సోషల్ మీడియాలో వైరల్ గా మారాయి.