సినిమాల్లో హీరోలు వందల మంది విలన్లను ఒంటిచేత్తో నరికేస్తుంటారు.. డైరెక్టర్లు ఈ సృష్టిలో లేని ప్రపంచాలను గ్రాఫిక్స్లో సృష్టించి చూపిస్తుంటారు. కానీ, ఎంత గ్లోబల్ స్టార్లయినా, ఆస్కార్ లెవెల్ దర్శకులైనా సరే.. మన ‘ఎలక్షన్ కమిషన్’ ముందు మాత్రం ‘సాధారణ ఓటరు’ దేవుళ్లేనని అధికారులు ప్రూవ్ చేశారు. హైదరాబాద్లో ఎన్నికల సంఘం మాములు ఓటర్లందరి వివరాలు సరిచేసి బోర్ కొట్టిందో ఏమో గానీ.. ఈసారి కెమెరాను నేరుగా జూబ్లీహిల్స్, ఫిల్మ్నగర్ వైపు తిప్పింది. ‘ఓటర్ల జాబితా ప్రత్యేక సమగ్ర సవరణ (SIR)’ అంటూ ఒక పెద్ద లిస్ట్ పట్టుకుని.. అందులో తప్పులు దొర్లాయంటూ సాక్షాత్తూ రాజమౌళి, మహేష్ బాబుల ఇళ్ల గడపలకే నోటీసులు పంపించి షాకిచ్చింది.
ఈ నోటీసుల వీఐపీ లిస్ట్ చూస్తే టాలీవుడ్ నుంచి క్రీడారంగం వరకు పెద్ద జాతరే కనిపిస్తోంది. సూపర్ స్టార్ మహేష్ బాబు, నమ్రత, విక్టరీ వెంకటేష్, సమంతలతో పాటు ‘రౌడీ బాయ్’ విజయ్ దేవరకొండ, ఆనంద్ దేవరకొండలకు కూడా ఈసీ నోటీసులు గిఫ్ట్గా పంపింది. ఇక క్రీడల నుంచి మిథాలీ రాజ్, పుల్లెల గోపీచంద్.. బిజినెస్ క్లాస్ నుంచి ఉపాసన కొణిదెల లాంటి కోటీశ్వరుల ఓటర్ ఐడీల్లో కూడా తప్పులున్నాయట. కోట్ల రూపాయల టర్నోవర్తో బిజినెస్లు రన్ చేసే వీళ్ల కార్డుల్లో.. అడ్రస్లు, ఇంటి నెంబర్లు తారుమారయ్యాయో లేక అధికారులు పొరపడ్డారో కానీ, మొత్తానికి సెలబ్రిటీల లిస్ట్లో తప్పులు పట్టడం మన ఈసీకే చెల్లింది.
షూటింగ్లు, విదేశీ ప్రయాణాలతో బిజీగా ఉండే ఈ స్టార్లంతా నోటీసులు చూడగానే.. “ఇప్పుడు విచారణకు ఎవరు వెళ్తారు బాబోయ్” అని కంగారు పడతారని ముందే ఊహించిన అధికారులు ఒక బంపర్ ఆఫర్ ఇచ్చారు. మీరు బిజీగా ఉంటే వ్యక్తిగతంగా రానవసరం లేదు.. మీ తరఫున ఒక ‘డూప్’ ని ఒరిజినల్ సర్టిఫికెట్లతో మా ఆఫీసుకు పంపించి తప్పులు సరిచేసుకోండి అని హింట్ ఇచ్చారు. ఏది ఏమైనా, సామాన్యుడి ఓటు పోతే పట్టించుకోని సిస్టమ్.. ఇలా పెద్ద పెద్ద సెలబ్రిటీల కార్డుల్లో తప్పులు వెతికి మరీ నోటీసులు ఇవ్వడం చూస్తుంటే, “అబ్బా.. ఎంత సిన్సియర్ ఆఫీసర్లు” అని నెటిజన్లు తెగ మురిసిపోతున్నారు.