దక్షిణాది రాష్ట్రాలకు పార్లమెంటు స్థానాల కేటాయింపుపై ఆందోళనలు ఉన్నా, కేంద్ర హోం మంత్రి అమిత్ షా మాత్రం ఎంపీ సీట్లు తగ్గబోవన్నారు. అయితే, ఇది ఎంతవరకు నమ్మశక్యం? పునర్విభజన ప్రక్రియలో దక్షిణాది రాష్ట్రాల హక్కులు ఎంతవరకు సురక్షితంగా ఉంటాయనేదానిపై స్పష్టత లేదు. ముఖ్యంగా, జనాభా పెరుగుదల ఆధారంగా ఎంపీ సీట్లు కేటాయిస్తే, ఉత్తరాది రాష్ట్రాలకు ఎక్కువ అవకాశాలు రావడం ఖాయం. జనాభా నియంత్రణలో దక్షిణాది ముందుంది, కానీ అదే ఇక్కడ సమస్యగా మారే అవకాశం ఉందనే భావన నెలకొంది.
అమిత్ షా దక్షిణాది రాష్ట్రాలకు అన్యాయం జరగదని చెబుతూనే, ఈ ప్రాంతానికి కేంద్రం కేటాయించిన నిధుల గురించి ప్రస్తావించారు. కానీ, దక్షిణాది రాష్ట్రాలు కేంద్రానికి పన్నుల రూపంలో ఎంత మొత్తం చెల్లిస్తున్నాయన్నదాన్ని మాత్రం ప్రస్తావించలేదు. ఇదే అంశాన్ని గతంలో తెలంగాణ నేతలు కూడా ప్రశ్నించగా, కేంద్రం నుంచి ఎలాంటి స్పష్టమైన సమాధానం రాలేదు. ఇప్పుడు కూడా ఇదే విధంగా, కేంద్రం ఇచ్చిన నిధుల వివరాలు మాత్రమే చెప్పి, దక్షిణాది రాష్ట్రాల న్యాయమైన వాటాను ఎంతవరకు నిలబెట్టుకుంటారనేది అస్పష్టంగా ఉంది.
ఇంకా ప్రధానమైన అంశం.. ప్రోరేటా ప్రకారం ఒక్క ఎంపీ సీటు కూడా తగ్గదని అమిత్ షా చెబుతుండటం. కానీ, నిజానికి దక్షిణాది రాష్ట్రాలకు ఇప్పటికే ఉత్తరాదితో పోలిస్తే తక్కువ ఎంపీ స్థానాలే ఉన్నాయి. ఇప్పుడు జనాభా పెరుగుదల ఆధారంగా నూతన రీతిలో సీట్లు కేటాయిస్తే, దక్షిణాదికి తక్కువే వస్తాయని విశ్లేషకులు అంటున్నారు. ఇది నిజమే అయితే, అమిత్ షా మాటల వెనుక మరేదైనా అజెండా ఉందా? అన్న ప్రశ్న కూడా రాకుండా ఉండదు.
ఈ ప్రక్రియపై అసలు నిజమెంతనేది తెలుసుకోవాలంటే, కేంద్రం పునర్విభజన ముసాయిదాను బహిరంగంగా వెల్లడించాలి. అలా కాకుండా, కేవలం మాటలకే పరిమితం చేస్తే, దక్షిణాది రాష్ట్రాల ఆందోళనలు తగ్గే అవకాశమే లేదు. నిజంగా అమిత్ షా చెప్పిందే నిజమైతే, పునర్విభజనపై పూర్తి క్లారిటీ ఇవ్వాలని దక్షిణాది ప్రజలు ఆశిస్తున్నారు.
