AP Job Calendar: ఆంధ్రప్రదేశ్ ప్రభుత్వం విడుదల చేసిన జాబ్ క్యాలెండర్పై రాజకీయ దుమారం రేగుతోంది. నిరుద్యోగ యువతకు అండగా ఉంటామని హామీ ఇచ్చి అధికారంలోకి వచ్చిన కూటమి ప్రభుత్వం, ఇప్పుడు మొండిచేయి చూపిందని కాంగ్రెస్ పార్టీ రాష్ట్ర అధ్యక్షురాలు వైఎస్ షర్మిల మండిపడ్డారు. రాష్ట్రంలో లక్షలాది ఖాళీలు ఉండగా, కేవలం 10 వేల పోస్టులతో సరిపెట్టడం నిరుద్యోగులను మోసం చేయడమేనని ఆమె ఆగ్రహం వ్యక్తం చేశారు.
“కొండంత రాగం.. కూసంత పాట” ప్రభుత్వ తీరును ఎద్దేవా చేస్తూ.. “కొండంత రాగం తీసి కూసంత పాట పాడినట్లుగా ఉంది ఈ జాబ్ క్యాలెండర్” అని షర్మిల వ్యాఖ్యానించారు. 153 శాఖల్లో దాదాపు 1.80 లక్షల ఖాళీలు ఉన్నాయని, కానీ ప్రభుత్వం కేవలం 10,060 పోస్టుల భర్తీకి షెడ్యూల్ ఇవ్వడం సిగ్గుచేటని విమర్శించారు. రెండేళ్లుగా నిరుద్యోగులను ఊరించి, చివరికి “ముష్టి 10 వేల పోస్టులు” విదిల్చారని ఆమె ధ్వజమెత్తారు.
శాఖల వారీగా ఖాళీల లెక్కలివే.. ఏవి ఆ ఉద్యోగాలు?
ప్రభుత్వం గతంలో ఇచ్చిన హామీలను, మంత్రులు చెప్పిన మాటలను షర్మిల ఈ సందర్భంగా గుర్తు చేశారు. వివిధ శాఖల్లో ఉన్న ఖాళీలను ఆమె ఏకరువు పెట్టారు.
విద్యాశాఖ: 30 వేల బోధన, బోధనేతర పోస్టుల పరిస్థితి ఏంటి?
పోలీస్ శాఖ: వెంటనే భర్తీ చేస్తామన్న 19,999 ఉద్యోగాలు ఏమయ్యాయి?
ఇంజనీరింగ్ విభాగం: ఖాళీగా ఉన్న 20 వేల పోస్టుల ప్రస్తావన ఎందుకు లేదు?
పంచాయతీ రాజ్: 26 వేల నియామకాలపై స్పష్టత ఎక్కడ?
మున్సిపల్ అడ్మినిస్ట్రేషన్: 27 వేల ఖాళీల భర్తీ ఊసేలేదు.
ఇతర శాఖలు: రెవెన్యూలో 13 వేలు, వైద్యశాఖలో 26 వేలు, వ్యవసాయ శాఖలో 3 వేల ఖాళీలను భర్తీ చేస్తామన్న హామీలు బూడిదలో పోసిన పన్నీరేనా? అని ఆమె ప్రశ్నించారు.
నిరుద్యోగుల ఆవేదన – కాంగ్రెస్ డిమాండ్లు రాష్ట్రంలో సుమారు 50 లక్షల మంది నిరుద్యోగులు ఉన్నారని, అందులో 30 లక్షల మంది ప్రభుత్వ ఉద్యోగాల కోసం కోచింగ్ సెంటర్లలో లక్షలాది రూపాయలు ఖర్చు చేస్తూ ఎదురుచూస్తున్నారని షర్మిల ఆవేదన వ్యక్తం చేశారు. యువతకు న్యాయం చేయాలని డిమాండ్ చేస్తూ ప్రభుత్వం ముందు పలు ప్రతిపాదనలు ఉంచారు.
“పదో పరకో పోస్టులతో జాబ్ క్యాలెండర్ అని పేరు పెట్టుకోవడం కాదు.. భారీ స్థాయిలో ఖాళీలను భర్తీ చేయాలి. అలాగే ప్రతిపక్షంలో ఉన్నప్పుడు ఇచ్చిన హామీ ప్రకారం నిరుద్యోగుల వయోపరిమితిని 42 నుంచి 46 ఏళ్లకు పెంచాలి.”
ఐదేళ్లలో 20 లక్షల ఉద్యోగాల కల్పన హామీని నెరవేరుస్తామని ముఖ్యమంత్రి చంద్రబాబు నాయుడు చెబుతున్న మాటలు క్షేత్రస్థాయిలో అమలు కావడం లేదని షర్మిల విమర్శించారు. నిరుద్యోగుల జీవితాలతో ఆటలాడుకుంటే యువత తగిన బుద్ధి చెబుతుందని ఆమె హెచ్చరించారు.
