రచన- దర్శకత్వం : అనిల్ రావిపూడి
తారాగణం : చిరంజీవి, వెంకటేష్, నయనతార, సచిన్ ఖెడేకర్, గా అభినవ్ గోమటం, కేథరిన్ థ్రేస్సా, విష్ణు వర్థన్ తదితరులు
సంగీతం : భీమ్స్ సిసీరోలియో, ఛాయాగ్రహణం : సమీర్ రెడ్డి
బ్యానర్ : షైన్ స్క్రీన్స్, గోల్డ్ బాక్స్ ఎంటర్టైన్మెంట్స్
నిర్మాతలు : సుస్మిత కొణిదెల, సాహు గారపాటి
విడుదల : జనవరి 12, 2026
Mana Shankara Vara Prasad Garu Movie Review: మూడేళ్ళ తర్వాత మెగాస్టార్ చిరంజీవి ఈ సంక్రాంతికి వచ్చారు. గత మూవీ ‘భోళాశంకర్’ తో సరైన విజయం అందుకోలేకపోయిన చిరంజీవి, ఈసారి అలాటి మాస్ మూవీ బదులుగా ఫ్యామిలీ ఎంటర్ టైనర్ తో కామెడీ చేస్తూ అలరించడానికి నిశ్చయించుకున్నారు. దీనికి వెంకటేష్ ఒక ఆకర్షణ అయ్యారు. నయనాటార హీరోయిన్. అనిల్ రావిపూడి దర్శకత్వంలో గత సంక్రాంతికి విడుదలైన ‘సంక్రాంతికి వస్తున్నాం’ మంచి హిట్టయ్యాక, తిరిగి ఈ సంక్రాంతికి అదే తరహా కామెడీని ప్రేక్షకులకి అందించేందుకు సిద్ధమయ్యాడు. మరి ఈసారి అదే స్థాయి విజయం వరించిందా లేదా రివ్యూలో చూద్దాం.
కథేమిటి?
బిజినెస్ మాన్ నితిన్ శర్మ (సచిన్ ఖెడేకర్) ఆతడి కూతురు శశి రేఖ (నయనతార) ల మీద దాడి జరగడంతో కేంద్రమంత్రి వాళ్ళకి బాడీగార్డుగా ఎన్ ఎస్ జీ అధికారి శంకరవరప్రసాద్ (చిరంజీవి) ని నియమిస్తాడు. శంకర ప్రసాద్- శశి రేఖలు విడిపోయిన భార్యాభర్తలు. వాళ్ళ ఇద్దరు చిన్నపిల్లలు శశి రేఖతోనే వుంటున్నారు. ఇప్పుడు బాడీగార్డుగా వచ్చిన శంకర్ ప్రసాద్ పిల్లల ద్వారా శశిరేఖకి దగ్గరవ్వాలని ప్రయాత్నిస్తాడు. ఇందుకు శశిరేఖ ఒప్పుకుందా? మధ్యలో కర్నాటకలో పెద్ద బిజినెస్ మాన్ వెంకీ గౌడ(వెంకటేష్) ఎవరు, ఎందుకొచ్చాడు? చివరికి భార్యాభర్తల సమస్య ఎలా పరిష్కారమైంది? ఇదీ మిగతా కథ
ఎలావుంది కథ?
దర్శకుడు అనిల్ రావిపూడి సినిమాలు ఎ;ఆ ఉంటాయో తెలిసిందే. కథకి పెద్దగా ప్రాధాన్య మివ్వకుండా కేవలం కామెడీ ఆధారంగా హిట్లు కొడుతూ వస్తున్నాడు. ఇది కూడా అంతే. అయితే గత మూవీ ‘సంక్రాంతికి వస్తున్నాం’ లో కొంత కథయినా వుంది. ఈసారి అదీ లేదు. కథని అస్సలు పట్టించుకోలేదు. కేవలం చిరంజీవిని కామెడీ రోల్ లో చూపించి నవ్విస్తూ సక్సెస్ కొట్టాలని ప్రయత్నించాడు. ఇందులో కొంత మేరకే సఫలమయ్యాడు. కారణం ఆ కామెడీతో కూడా పూర్తిగా నవ్వించ లేకపోవడం.
ఫస్టాఫ్ లో చిరంజీవిని పరిచయం చేస్తూ కేంద్రమంత్రిని రక్షించే యాక్షన్ ఎపిసోడ్ తో మంచి బ్యాంగ్, ఎలివేషన్ ఇచ్చాడు. ఈ ఎపిసోడ్ క్లాస్ -మాస్ ప్రేక్షకుల్ని ఉక్కిరిబిక్కిరి చేసేలా వుంది. ప్రారంభంలో ఇలా బాక్సాఫీసు అప్పీల్ ని రెచ్చ గొట్టాక చిరంజీవిని పూర్తీ స్థాయి కామెడీ రోల్ కి పరిమితంచేసి ఎంటర్ టైన్ చేస్తూ పోయాడు. ఇలా ముందుకి పోతే ఫ్లాష్ బ్యాక్ లో పెళ్ళయిన చిరంజీవి- నయన తారల జీవితం, గొడవలు పడి విడి పోవడం కామెడీగానే వుండడంతో ఈ మూవీ మొత్తం ఏ మూడ్ లో వుండబోతోందో ఒక అంచనాని ఇచ్చేస్తుంది. ఎక్కడా బరువైన సీన్లూ ఎమోషన్ లతో కూడిన డ్రామా లేకుండా, పూర్తిగా ఫన్ రైడ్ గా చూపించదాల్చాడు దర్శకుడు. అయితే ఈ ఫన్ పాక్షికంగానే వర్కవుట్ అయింది.
ఇంటర్వెల్ మరో యాక్షన్ సీన్ వస్తుంది. ఇది కూడా మంచి బ్యాంగ్ ఇస్తుంది. ఇక సెకండాఫ్ లో డల్ అవడం మొదలెడుతుంది. ఇప్పుడు కథ నయనతార ఇంటికి వెళ్ళడంతో ఒక రొటీన్ ఫ్యామిలీ డ్రామాగా పాత సినిమా చూస్తున్నట్టు వుంటుంది. నయనతారని మెప్పించడానికి చిరంజీవి పడే పాట్లు పాతవే. పైగా చిరంజీవి ఇన్వెస్టిగేషన్ పేరుతో చేసే డ్రామా కూడా బోరే. ఇలా సెకండాఫ్ బాగా డల్ ఆవుతున్న సమయంలో వెంకటేష్ ఎంట్రీ ఇచ్చి హుషారు నింపుతాడు. ఇది ఆ కాసేపే, మళ్ళీ డల్ షరామామూలే. వెంకటేష్ కి సరైన క్యారక్టర్ లేదు. బలవంతంగా ఎంట్రీ ఇప్పించినట్టు వుంటుంది బాక్సాఫీసు కోసం.. ఇక చివర్లో అన్ని ఫ్యామిలీ సమస్యలూ అరకొరగా ముగిసి ఇంకో యాక్షన్ సీనుతో హమ్మయా అని ఎండ్ పడుతుంది సినిమా!
ఎవరెలా చేశారు?
నేషనల్ సెక్యూరిటీ ఆఫీసర్గా పాత చిరంజీవి కనిపిస్తాడు. ఆ రోజుల్లోనాటి ఎనర్జీతో, కామెడీ టైమింగ్ తో సీన్లు నిలబెడతాడు. కామెడీ ఎలావుందనేది వేరే విషయం. దాంట్లో ప్రాణం పోయడానికి తన అనుభవంతో ప్రయత్నించాడు. డాన్సుల్లోనూ ఆ పవర్ తో థ్రిల్ చేస్తాడు. సాంగ్స్ తనవల్ల హైలైట్ అయ్యాయి. ఇక నయనతారతో రోమాన్స్, పిల్లలతో సెంటిమెంట్స్ ఫర్వాలేదు. కథ వున్నా లేకపోయినా, ఇది పూర్తిగా చిరంజీవి కోసమే, చిరంజీవిని అదిరిపోయేట్టు చూపించే ఎజెండా ఒక్కటే పెట్టుకుని సినిమా తీశాడు అనిల్ రావిపూడి.
ఇక నయనతార డామినేటింగ్ క్యారక్టర్ లో ఆమె నటన మరో ఎట్రాక్షన్ అని చెప్పొచ్చు. వెంకటేష్ సరే, తన మ్యనరిజమ్స్ కి, కామెడీకి సరిలేరని నిరూపించాడు. పిల్లలు బాగా చేశారు. చిరంజీవి టీమ్ మెంబర్స్ గా అభినవ్ గోమటం, కేథరిన్ థ్రేస్సా, విష్ణు వర్థన్ కూడా కామెడీ చేశారు.
సాంకేతికాల సంగతి?
సినిమాకి భీమ్స్ సిసిరోలియో సంగీతం సినిమాకి హైలైట్ అని చెప్పొచ్చు. హుషారైన పాటలు సమకూర్చాడు. వీటికి చిరంజీవి, వెంకటేష్ లు చేసిన డాన్సులతో మంచి మాస్ ఊపు వచ్చింది. బిజీఎం కూడా ఆకర్షణీయంగా వుంది. సమీర్ రెడ్డి కెమెరా వర్క్ రిచ్ విజువల్స్ తో చాలా బావుంది. ప్రొడక్షన్ విలువల్లో ఆర్ట్ డైరెక్షన్, యాక్షన్ కోరియోగ్రఫీలు అగ్రస్థానంలో వున్నాయి. తమ్మిరాజు ఎడిటింగ్ ఓకే.
అనిల్ రావిపూడి సినిమాల్లో అవే రొటీన్ కథలే వుంటాయి- అయతే ఈసారి అదికూడా లేకుండా కేవలం కామెడీతో చిరంజీవి మీద భారం వేయడంతో అనుకున్న ఫలితం ఫలితం రాలేదు. కథ, పత్రాలు ఇవేవీ పట్టించుకోకుండా చిరంజీవిని, పక్కన కాసేపు వెంకటేష్ ని చూసి ఎంజాయ్ చేయాలనుకుంటే మాత్రం చూడొచ్చు ఈ సంక్రాంతి సినిమా!
రేటింగ్ : 2.5 / 5
