ఆంధ్రప్రదేశ్ లో స్థానిక సంస్థల ఎన్నికల నిర్వహణ, బీసీ రిజర్వేషన్ల ఖరారు అంశంపై కూటమి ప్రభుత్వం అనుసరిస్తున్న తీరు తీవ్ర విమర్శలకు దారితీస్తోంది. సుప్రీంకోర్టు తీర్పుల నేపథ్యంలో ఏర్పాటైన రాజీవ్ రంజన్ మిశ్రా కమిషన్ తన నివేదికను ప్రభుత్వానికి సమర్పించి రెండు నెలలు గడుస్తున్నా, సుప్రీం కోర్ట్ కూడా ఇటీవల షాక్ ఇచ్చినా.. ప్రభుత్వం ఇంకా చర్చల పేరుతో కాలయాపన చేయడంపై బీసీ వర్గాలు అసహనం వ్యక్తం చేస్తున్నాయి. నేడు జరిగిన రాష్ట్ర మంత్రివర్గ సమావేశంలోనూ మిశ్రా కమిషన్ నివేదికపై కేవలం చర్చలకే పరిమితమవ్వడం ఈ సాగదీత ధోరణిని స్పష్టం చేస్తోంది.
మిశ్రా కమిషన్ ఆగస్టు 14నే తన నివేదికను ప్రభుత్వానికి అందజేసింది. రాష్ట్రంలో బీసీ జనాభా 50.42 శాతంగా ఉందని ఈ నివేదిక తేల్చింది. యూనిఫైడ్ ఫ్యామిలీ సర్వే, ప్రభుత్వ కుటుంబ డేటాబేస్ ఆధారంగానే ఈ అంచనాలు రూపొందించారు. సుప్రీంకోర్టు మార్గదర్శకాల ప్రకారం స్థానిక సంస్థల ఎన్నికల్లో రిజర్వేషన్లు కల్పించాలంటే ట్రిపుల్ టెస్ట్ నిబంధనలు తప్పనిసరని ఈ నివేదికలో స్పష్టంగా వెల్లడించారు. అన్ని లెక్కలు పక్కాగా చేతిలో ఉన్నప్పుడు ప్రభుత్వం తక్షణ నిర్ణయాలు తీసుకోకుండా ఇంకా ఎందుకు సాగదీస్తోందనే ప్రశ్నలు వెల్లువెత్తుతున్నాయి.
స్థానిక సంస్థల ఎన్నికలను వీలైనంత త్వరగా నిర్వహించాల్సి ఉన్న తరుణంలో రిజర్వేషన్ల ఖరారుపై ప్రభుత్వం చూపుతున్న జాప్యం వెనుక రాజకీయ వ్యూహాలు ఉన్నాయనే ఆరోపణలు వస్తున్నాయి. ట్రిపుల్ టెస్ట్ ప్రక్రియను పూర్తి చేసి బీసీలకు న్యాయమైన వాటా కేటాయించడంలో ముందడుగు వేయకుండా నివేదికలను కేబినెట్ భేటీలలో పదే పదే చర్చలకే పరిమితం చేయడం క్యాడర్ లోనూ అయోమయాన్ని సృష్టిస్తోంది. ఈ సాగదీత ధోరణిని వీడి ప్రభుత్వం వెంటనే తుది నిర్ణయాన్ని ప్రకటించాలని బీసీ సంఘాల నేతలు డిమాండ్ చేస్తున్నారు.