కేంద్ర ఎన్నికల ప్రధాన కమిషనర్ జ్ఞానేష్ కుమార్ రాజీనామా డిమాండ్‌తో దేశ రాజధాని ఢిల్లీలో రాజకీయాలు ఒక్కసారిగా హీటెక్కాయి. ఈ వివాదం ఇప్పుడు కాంగ్రెస్ నేతృత్వంలోని విపక్షాలకు, కేంద్ర ప్రభుత్వానికి నడుమ ఒక పెద్ద మైండ్ గేమ్‌గా మారిపోయింది. ఈరోజు మరింత పెద్ద ఎత్తున నిరసనలు చేపట్టాలని, ఎక్కువ మంది ఎంపీలను రంగంలోకి దించాలని విపక్షాలు నిర్ణయించడంతో ఢిల్లీలో టెన్షన్ వాతావరణం నెలకొంది. ఇప్పటికే రాహుల్ గాంధీ, ప్రియాంక గాంధీ సహా పలువురు అగ్రనేతలపై పోలీసులు విధులకు ఆటంకం కలిగించారనే అభియోగాల కింద కేసులు నమోదు చేసినప్పటికీ విపక్షాలు వెనక్కి తగ్గడం లేదు.
ప్రస్తుతం ఈ వ్యవహారం నరేంద్ర మోదీ, అమిత్ షా ద్వయానికి ఒక పెద్ద సవాల్‌గా మారింది. ఒకవేళ విపక్షాల ఒత్తిడికి తలొగ్గి జ్ఞానేష్ కుమార్‌తో రాజీనామా చేయిస్తే.. తాము తప్పు చేశామని కేంద్ర ప్రభుత్వం ఒప్పుకున్నట్లు అవుతుంది. ఇది విపక్షాలకు పెద్ద నైతిక విజయంగా మారుతుంది. అలాకాకుండా ఆయనను పదవిలోనే కొనసాగిస్తే.. తప్పు చేసినా సరే ప్రభుత్వం తమకు నమ్మకమైన అధికారిని కాపాడుతోందనే బలమైన సందేశం ప్రజల్లోకి వెళ్లే ప్రమాదం ఉంది. ఈ రెండు రకాల పరిస్థితులు కూడా కేంద్రానికి ఇబ్బందికరమే.
సీఈసీ జ్ఞానేష్ కుమార్‌కు ప్రధాని మోదీ, హోం మంత్రి అమిత్ షాలకు అత్యంత నమ్మకమైన అధికారిగా ఐఏఎస్ కెరీర్ నుండి మంచి పేరుంది. గతంలో జమ్మూ కాశ్మీర్‌లో ఆర్టికల్ 370 రద్దు సమయంలో హోం మంత్రిత్వ శాఖలో జాయింట్ సెక్రటరీగా అత్యంత కీలకమైన బాధ్యతలను ఆయనే నిర్వహించారు. ఆ నమ్మకంతోనే ఆయనను ఎన్నికల కమిషనర్‌గా, ఆ తర్వాత ప్రధాన కమిషనర్‌గా కేంద్రం నియమించింది. అయితే, అమెరికా ఎన్నికల నేపథ్యంలో ఓటర్ల పౌరసత్వ వెరిఫికేషన్‌కు సంబంధించి డోనాల్డ్ ట్రంప్ సోషల్ మీడియాలో జ్ఞానేష్ కుమార్ ప్రస్తావన తీసుకురావడంతో ఈ రచ్చ మొదలైంది. ఈ అస్త్రాన్ని వదిలే ప్రసక్తే లేదని, సీఈసీ రాజీనామా చేసేవరకు తమ పోరాటం ఆపబోమని కాంగ్రెస్ స్పష్టం చేస్తోంది.