ఆంధ్రప్రదేశ్‌లో సాగుతున్న స్థానిక సంస్థల ఎన్నికల రణరంగం సరికొత్త మలుపులు తిరుగుతోంది. మున్సిపల్, పరిషత్ ఎన్నికల విధుల్లో కొందరు పోలీసు ఉన్నతాధికారులు ఏకపక్షంగా వ్యవహరిస్తున్నారంటూ ప్రతిపక్ష వైఎస్సార్ కాంగ్రెస్ పార్టీ ఎంపీ డాక్టర్ మద్దిల గురుమూర్తి దేశ అత్యున్నత స్థాయి వ్యవస్థలకు ఫిర్యాదులు చేయడం సంచలనంగా మారింది. రాష్ట్రంలో ఎన్నికల నిబంధనలు పూర్తిగా ఉల్లంఘిస్తున్నారని ఆరోపిస్తూ ఆయన భారత రాష్ట్రపతి, సుప్రీంకోర్టు ప్రధాన న్యాయమూర్తి, కేంద్ర ఎన్నికల సంఘం, గవర్నర్‌తో పాటు పలువురు జాతీయ స్థాయి ఉన్నతాధికారులకు ఫిర్యాదు లేఖలు రాయడం ఇప్పుడు రాజకీయ వర్గాల్లో తీవ్ర కలకలం రేపుతోంది.
ఈ ఫిర్యాదులో ఎంపీ గురుమూర్తి రాష్ట్రంలోని కొందరు కీలక ఐపీఎస్ అధికారుల తీరును ప్రధానంగా తప్పుబట్టారు. ముఖ్యంగా ఎన్నికల విధుల్లో పక్షపాత వైఖరి ప్రదర్శిస్తున్నారంటూ డీఐజీ కోయా ప్రవీణ్, కడప జిల్లా ఎస్పీ, అన్నమయ్య జిల్లా ఎస్పీలను తక్షణమే ఎన్నికల విధుల నుంచి తప్పించాలని ఆయన డిమాండ్ చేశారు. స్థానికంగా అధికార కూటమి నేతలకు అనుకూలంగా వ్యవహరిస్తున్న ఈ అధికారులు… ప్రతిపక్ష వైసీపీ తరఫున పోటీ చేసేందుకు వస్తున్న అభ్యర్థులను నామినేషన్ కేంద్రాల వద్ద భౌతికంగా అడ్డుకుంటున్నా కనీస చర్యలు తీసుకోవడం లేదని ఆధారాలతో సహా లేఖల్లో పేర్కొన్నారు.
ప్రజాస్వామ్యబద్ధంగా జరగాల్సిన ఎన్నికల ప్రక్రియను ఈ అధికారులు పూర్తిగా పక్కదారి పట్టిస్తున్నారని దుయ్యబట్టారు. ఇప్పటికే వైసీపీ అధినేత వైఎస్ జగన్ మోహన్ రెడ్డి 54 మంది అధికారుల బ్లాక్ లిస్ట్‌తో సుప్రీంకోర్టుకు వెళ్లేందుకు సిద్ధమవ్వగా, ఇప్పుడు ఎంపీ గురుమూర్తి నేరుగా రాష్ట్రపతి మరియు సీజేఐలకు లేఖలు రాయడం చూస్తుంటే వైసీపీ ఈ లీగల్ వార్‌ను జాతీయ స్థాయికి తీసుకెళ్తోందని స్పష్టమవుతోంది. నామినేషన్ల వేళ జరిగిన అల్లర్లు, పోలీసుల నిశ్శబ్ద వైఖరికి సంబంధించిన వీడియో క్లిప్పింగ్స్‌ను కూడా ఈ లేఖలకు జత చేసినట్లు సమాచారం.