ఆంధ్రప్రదేశ్ రాజకీయాల్లో విశ్రాంత ఐపీఎస్ అధికారి, మాజీ ఇంటెలిజెన్స్ చీఫ్ ఏబీ వెంకటేశ్వరరావు తదుపరి రాజకీయ అడుగులపై ఆసక్తికర చర్చ జరుగుతోంది. ఇటీవల జరిగిన విజయవాడ మేయర్ ఎన్నికల్లో స్వతంత్ర అభ్యర్థిగా పోటీ చేసి ఓటమి పాలైన ఏబీవీ, త్వరలోనే సొంతంగా కొత్త పార్టీ పెట్టే ఆలోచనలో ఉన్నట్లు సంకేతాలు ఇచ్చారు. అయితే, ఆయన కొత్త పార్టీ పెట్టే కంటే జాతీయ పార్టీ అయిన భారతీయ జనతా పార్టీలోకి తీసుకురావడానికి విజయవాడ పశ్చిమ బీజేపీ ఎమ్మెల్యే సుజనా చౌదరి తెరవెనుక ప్రయత్నాలు చేస్తున్నట్లు రాజకీయ వర్గాల్లో జోరుగా ప్రచారం సాగుతోంది.
నిజానికి, కూటమి ప్రభుత్వం అధికారంలోకి వచ్చాక ఏబీ వెంకటేశ్వరరావుకు ఏపీ పోలీస్ హౌసింగ్ కార్పొరేషన్ చైర్మన్ పదవిని ఆఫర్ చేసినప్పటికీ, ఆయన దానిని సున్నితంగా తిరస్కరించారు. టీడీపీలో నేరుగా కీలక బాధ్యతలు ఆశించినప్పటికీ అధిష్టానం నుండి సానుకూల స్పందన రాకపోవడంతో ఆయన ప్రత్యామ్నాయ మార్గాల వైపు దృష్టి సారించారు. ఈ క్రమంలోనే ఇటీవలి విజయవాడ మేయర్ ఎన్నికల్లో కూటమి అభ్యర్థి వంగవీటి రాధాకృష్ణకు వ్యతిరేకంగా బరిలోకి దిగి 11,137 ఓట్లు సాధించారు. ఆ ఎన్నికల సమయంలోనూ ఏబీవీ వెనుక సుజనా చౌదరి ప్రోత్సాహం ఉందనే విశ్లేషణలు వినిపించాయి.
ఒకప్పుడు టీడీపీ అధినేత చంద్రబాబు నాయుడికి అత్యంత సన్నిహితుడిగా ఉన్న సుజనా చౌదరి, ఇటీవలి కాలంలో సొంతంగా రాజకీయ బలాన్ని పెంచుకునే దిశగా పావులు కదుపుతున్నట్లు ఊహాగానాలు వినిపిస్తున్నాయి. ఇందులో భాగంగానే పరిపాలనా అనుభవం ఉండి, బలమైన సామాజిక వర్గానికి చెందిన ఏబీ వెంకటేశ్వరరావును బీజేపీ గూటికి చేర్చడం ద్వారా కృష్ణా జిల్లాతో పాటు రాష్ట్రవ్యాప్తంగా కమలం పార్టీకి మైలేజ్ తీసుకురావచ్చని సుజనా భావిస్తున్నట్లు సమాచారం. ఒకవేళ సుజనా చౌదరి ప్రయత్నాలు ఫలించి ఏబీవీ బీజేపీలో చేరితే, ఏపీ కూటమి రాజకీయాల్లో ఇది మరో ఆసక్తికర మలుపుగా మారే అవకాశం ఉంది.