ఉత్తరాంధ్ర రాజకీయాల్లో విజయనగరం జిల్లాకు ప్రత్యేక స్థానం ఉంది. ప్రస్తుత కూటమి ప్రభుత్వంలో ఈ జిల్లా నుండి తెలుగుదేశం పార్టీకి అత్యంత బలమైన నాయకత్వం ఉంది. జిల్లా వ్యాప్తంగా మెజారిటీ అసెంబ్లీ నియోజకవర్గాల్లో టీడీపీ ఎమ్మెల్యేలు, విజయనగరం ఎంపీ కలిశెట్టి అప్పలనాయుడు, మంత్రి కొండపల్లి శ్రీనివాస్.. చిన్న శ్రీను వంటి కీలక నేతలతో పాటు సీనియర్ నాయకుల అండదండలు పార్టీకి పుష్కలంగా ఉన్నాయి. ఇంతటి బలమైన యంత్రాంగం ఉన్న నేపథ్యంలో, స్థానిక సంస్థల ఎన్నికల్లో ఏకగ్రీవాల ద్వారా టీడీపీ ఏకపక్ష విజయం సాధిస్తుందని రాజకీయ వర్గాలు అంచనా వేశాయి.
కానీ, క్షేత్రస్థాయి ఫలితాలు మాత్రం అందుకు పూర్తి భిన్నంగా కనిపిస్తున్నాయి. ఇటీవల ముగిసిన పరిషత్ ఎన్నికల ఫలితాలను పరిశీలిస్తే, విజయనగరం జిల్లాలో ఒక్క ఎంపీటీసీ స్థానాన్ని కూడా టీడీపీ ఏకగ్రీవం చేసుకోలేకపోవడం గమనార్హం. రాష్ట్రంలోని ఇతర ప్రాంతాల్లో పదుల సంఖ్యలో జెడ్పీటీసీలు, వందలాది ఎంపీటీసీలు ఏకగ్రీవమైనప్పటికీ, విజయనగరంలో మాత్రం ప్రతి స్థానంలోనూ హోరాహోరీ పోరు జరిగింది. అంతేకాకుండా, జెడ్పీటీసీ ఫలితాల్లోనూ వైఎస్సార్‌సీపీ కీలక స్థానాలను గెలుచుకుని డబుల్ డిజిట్ సాధించడం టీడీపీ అధిష్టానాన్ని ఆశ్చర్యపరిచింది.
ఇప్పుడు త్వరలో జరగనున్న గ్రామ పంచాయతీ ఎన్నికల్లోనూ సరిగ్గా ఇదే పరిస్థితి పునరావృతమవుతోంది. మంత్రి కొండపల్లి శ్రీనివాస్, స్థానిక ఎమ్మెల్యేలు, ఎంపీ స్థాయి నేతలు గ్రామాల్లో ఏకగ్రీవాల కోసం విశ్వప్రయత్నాలు చేస్తున్నప్పటికీ ఎక్కడా ఆశించిన ఫలితం కనిపించడం లేదు. పరిషత్ ఎన్నికల్లో వచ్చిన సానుకూల ఫలితాలతో వైసీపీ శ్రేణులు కొత్త ఉత్సాహంతో బరిలోకి దిగుతున్నాయి. “ఎక్కడా ఏకగ్రీవాలకు ఒప్పుకోవద్దు, గెలిచినా ఓడినా పోటీ చేసి తీరాలి” అనే వైసీపీ అధిష్టానం ఆదేశాలకు తోడు, మాజీ మంత్రి బొత్స సత్యనారాయణ వ్యూహాలు క్షేత్రస్థాయిలో క్యాడర్‌ను కట్టిపడేస్తున్నాయి.
అధికార పార్టీ నేతలు అభివృద్ధి నిధుల హామీలు ఇస్తున్నా, గ్రామీణ స్థాయిలో వైసీపీ నేతలు ఏకగ్రీవాలకు ససేమిరా అంటున్నారు. మరోవైపు, టీడీపీలో అంతర్గత సమన్వయ లోపం, ఆశావహుల సంఖ్య ఎక్కువగా ఉండటం కూడా ఏకగ్రీవాలు కాకపోవడానికి ఒక కారణంగా విశ్లేషకులు భావిస్తున్నారు. ప్రతి గ్రామంలోనూ టీడీపీ, జనసేన శ్రేణుల మధ్య పదవుల కోసం పోటీ నెలకొనడం, గ్రూపు రాజకీయాలను సరిదిద్దడంలో స్థానిక నేతలు ఆశించిన స్థాయిలో సఫలం కాకపోవడం ప్రతిపక్షానికి కలిసొస్తోంది. మొత్తంమీద, అన్ని రూపాల్లో బలమైన నాయకత్వం ఉండి కూడా విజయనగరం జిల్లాలో ఏకగ్రీవాల వ్యూహం ఫలించకపోవడం ఇప్పుడు ఉత్తరాంధ్ర రాజకీయాల్లో హాట్ టాపిక్‌గా మారింది. రాబోయే పంచాయతీ ఎన్నికల్లో ఈ బలమైన నాయకత్వం తమ సత్తా చాటుతుందా లేక వైసీపీ మరోసారి గట్టి పోటీ ఇస్తుందా అన్నది వేచి చూడాలి.