ప్రశాంతంగా ఉన్న విజయవాడ నగరంలో పాత రౌడీ గ్యాంగులు మళ్లీ యాక్టివ్ అవుతున్నాయనే ఆందోళన మొదలైంది. నగరంలోని భవానీపురం ప్రాంతంలో ఉన్న ‘సాయి తక్షిత్ ట్రేడర్స్’ అనే దుకాణం వద్ద కొందరు యువకులు వీరంగం సృష్టించిన ఘటన స్థానికంగా తీవ్ర కలకలం రేపుతోంది. తాము ‘మాచవరం బ్యాచ్’ అంటూ హల్‌చల్ చేసిన ఆ యువకులు, దుకాణం యజమానిని అడ్డుకుని ‘పీకలు కోస్తాం’ అంటూ అత్యంత దారుణంగా బెదిరింపులకు పాల్పడ్డారు. పట్టపగలే వ్యాపారస్తులపై ఇలాంటి దౌర్జన్యాలకు దిగడం బెజవాడలో మళ్లీ అరాచక శక్తులు తలెత్తుతున్నాయనడానికి నిదర్శనంగా మారింది.
ఈ ఘటనలో అత్యంత ఆందోళనకరమైన విషయం ఏమిటంటే, బాధితుడు భయంతో ‘డయల్ 100’కు ఫోన్ చేయగా ఘటనా స్థలానికి చేరుకున్న పోలీసులను సైతం ఆ రౌడీ మూక ఏమాత్రం లెక్కచేయలేదు. తమపైనే తిరగబడుతూ పోలీసులను కూడా బెదిరించి అక్కడి నుంచి పంపించేసినట్లు స్థానికంగా ప్రచారం జరుగుతోంది. సాక్షాత్తూ శాంతిభద్రతలను కాపాడాల్సిన పోలీసులకే రక్షణ లేకపోతే, ఇక సామాన్య వ్యాపారస్తుల పరిస్థితి ఏంటని స్థానికులు భయాందోళన వ్యక్తం చేస్తున్నారు.
కొంతకాలంగా సద్దుమణిగినట్లు కనిపించిన గ్యాంగ్ వార్లు, బెదిరింపుల సంస్కృతి మళ్లీ బెజవాడ వీధుల్లోకి రావడం పట్ల సర్వత్రా ఆందోళన వ్యక్తమవుతోంది. నగరంలో వ్యాపారాలు చేసుకునే వారిపై ఇలాంటి దౌర్జన్యాలు పునరావృతం కాకుండా ఉండాలంటే కఠిన చర్యలు తీసుకోవాలని భవానీపురం వ్యాపారస్తులు కోరుతున్నారు. ‘మాచవరం బ్యాచ్’ పేరుతో రెచ్చిపోతున్న ఈ రౌడీ షీటర్ల ఆగడాలకు అడ్డుకట్ట వేసి, తమకు రక్షణ కల్పించాలని విజయవాడ పోలీస్ కమిషనర్‌కు విజ్ఞప్తి చేస్తున్నారు. నగరంలో శాంతిభద్రతలకు విఘాతం కలిగిస్తున్న ఈ అసాంఘిక శక్తులపై కమిషనర్ సత్వరమే స్పందించి ఉక్కుపాదం మోపాలని స్థానికులు డిమాండ్ చేస్తున్నారు.