విశాఖపట్నంలో జరుగుతున్న సీఐఐ భాగస్వామ్య సదస్సు వేదికగా జరిగిన ప్రత్యేక ఫైర్‌సైడ్ చాట్ కార్యక్రమంలో ముఖ్యమంత్రి చంద్రబాబు నాయుడు రాష్ట్ర అభివృద్ధి, డేటా సెంటర్ల ఏర్పాటుపై కీలక వ్యాఖ్యలు చేశారు. సీనియర్ జర్నలిస్ట్ పాల్కీ శర్మ నిర్వహించిన ఈ ముఖాముఖిలో, డేటా సెంటర్ల ఏర్పాటు వల్ల పర్యావరణంపై ప్రతికూల ప్రభావం పడుతోందంటూ వస్తున్న విమర్శలను ఆమె ప్రస్తావించారు. దీనిపై సీఎం చంద్రబాబు స్పందిస్తూ, డేటా సెంటర్ల వల్ల పర్యావరణానికి ఎలాంటి హాని ఉండదని, ముఖ్యంగా నీటి వినియోగం విషయంలో ఎవరూ ఆందోళన చెందాల్సిన అవసరం లేదని స్పష్టం చేశారు.
నీటి లభ్యతపై గణాంకాలతో సహా వివరించిన ముఖ్యమంత్రి, ప్రతి ఏడాది గోదావరి నుంచి సుమారు 3 వేల టీఎంసీల నీరు వృధాగా సముద్రంలో కలుస్తోందని గుర్తు చేశారు. పోలవరం ఎడమ కాల్వ ద్వారా విశాఖపట్నానికి సుమారు 100 టీఎంసీల నీటిని తరలించే అవకాశం ఉందని ఆయన తెలిపారు. డేటా సెంటర్ల నిర్వహణకు కేవలం 3.5 టీఎంసీల నీరు మాత్రమే అవసరమవుతుందని, గోదావరి జలాలను సమర్థవంతంగా వినియోగించుకోవడం ద్వారా డేటా సెంటర్లకే కాకుండా తాగునీరు, సాగునీరు, ఇతర పరిశ్రమల అవసరాలకు కూడా సమృద్ధిగా నీటిని అందించగలమని సీఎం భరోసా ఇచ్చారు.
అంతేకాకుండా, డేటా సెంటర్లకు భారీ ఎత్తున అవసరమయ్యే విద్యుత్ సరఫరా విషయంలోనూ ప్రభుత్వం పర్యావరణ హితమైన చర్యలు తీసుకుంటోందని చంద్రబాబు వెల్లడించారు. డేటా సెంటర్లకు వినియోగించే విద్యుత్‌ను పూర్తిగా గ్రీన్ ఎనర్జీ ద్వారా అందించేందుకు ప్రత్యేక ఏర్పాట్లు చేస్తున్నామని ఆయన తెలిపారు. తద్వారా కర్బన ఉద్గారాలకు తావులేకుండా, పర్యావరణ పరిరక్షణకు పెద్దపీట వేస్తూనే విశాఖను అంతర్జాతీయ డేటా సెంటర్ హబ్‌గా తీర్చిదిద్దుతున్నామని ముఖ్యమంత్రి స్పష్టం చేశారు.