ఆంధ్రప్రదేశ్‌లో నవంబర్ 26, 29, డిసెంబర్ 2 తేదీల్లో మూడు విడతలుగా జరగనున్న 13 వేలకు పైగా గ్రామ పంచాయతీ ఎన్నికలు అధికార తెలుగుదేశం నేతృత్వంలోని కూటమికి, ప్రతిపక్ష వైఎస్సార్‌సీపీకి మధ్య ప్రతిష్టాత్మక సమరంగా మారాయి. ఇటీవల జరిగిన మున్సిపల్, పరిషత్ ఎన్నికల్లో కూటమి ఘనవిజయం సాధించడంతో పాటు 76 జెడ్పీటీసీలను ఏకగ్రీవంగా కైవసం చేసుకుంది. అదే ఊపుతో గ్రామీణ ప్రాంతాల్లోనూ మెజారిటీ సర్పంచ్ పదవులను ఏకగ్రీవం చేసుకోవచ్చని, ప్రతిపక్షం పెద్దగా పోటీకి రాకపోవచ్చని టీడీపీ అధిష్టానం గట్టిగా అంచనా వేసింది.
గ్రామాల్లో గొడవలు లేకుండా అభివృద్ధి నిధుల పేరుతో ఏకగ్రీవాలకు ప్రయత్నాలు కూడా ముమ్మరం చేసింది. అయితే, క్షేత్రస్థాయిలో పరిస్థితి టీడీపీ అంచనాలకు పూర్తి భిన్నంగా మారింది. పరిషత్ ఎన్నికల్లో ఓటమి పాలైనప్పటికీ, రాయలసీమ, ఉత్తరాంధ్రలోని పలు నియోజకవర్గాల్లో వైసీపీ గట్టి పోటీ ఇవ్వడం, అల్లూరి జిల్లా పరిషత్ పీఠాన్ని కైవసం చేసుకోవడం ఆ పార్టీ క్యాడర్‌లో కొత్త ఉత్సాహాన్ని నింపింది. ముఖ్యంగా పార్టీ అధినేత వైఎస్ జగన్ మోహన్ రెడ్డి “ఎక్కడా ఏకగ్రీవాలకు తలొగ్గవద్దు, ప్రతి పంచాయతీలోనూ గట్టిగా పోటీ చేసి తీరాలి” అని స్పష్టమైన ఆదేశాలు జారీ చేయడంతో వైసీపీ నేతలు వెనక్కి తగ్గడం లేదు.
నామినేషన్ల ప్రక్రియ ప్రారంభం కాకముందే గ్రామాల్లో తమ అభ్యర్థులను సిద్ధం చేస్తూ, ఏకగ్రీవాల ప్రతిపాదనలను నిర్ద్వంద్వంగా తిరస్కరిస్తున్నారు. ఈ అనూహ్య పరిణామంతో టీడీపీ శిబిరంలో ఆందోళన మొదలైంది. తమ సొంత నియోజకవర్గాలు, ఇన్‌ఛార్జ్ జిల్లాల్లో వీలైనన్ని ఎక్కువ పంచాయతీలను ఏకగ్రీవం చేసి అధిష్టానం వద్ద మార్కులు కొట్టేయాలని భావించిన మంత్రులు, ఎమ్మెల్యేలకు వైసీపీ వైఖరి పెద్ద అడ్డంకిగా మారింది. పలు జిల్లాల్లో స్వయంగా మంత్రులు రంగంలోకి దిగి గ్రామ పెద్దల ద్వారా రాయబారాలు నడిపినా, అభివృద్ధి నిధుల హామీలు ఇచ్చినా వైసీపీ స్థానిక నేతలు ఏకగ్రీవాలకు ససేమిరా అంటున్నారు. ఫలితంగా, సునాయాసంగా ఏకగ్రీవమవుతాయని భావించిన వందలాది పంచాయతీల్లో ఇప్పుడు హోరాహోరీ పోరు తప్పని పరిస్థితి నెలకొంది.