2027 ఉత్తరప్రదేశ్ అసెంబ్లీ ఎన్నికలకు సమయం దగ్గరపడుతున్న వేళ ఆ రాష్ట్ర రాజకీయ ముఖచిత్రంలో కీలక మార్పు చోటుచేసుకుంది. మజ్లిస్ అధినేత అసదుద్దీన్ ఓవైసీ మరియు ఆజాద్ సమాజ్ పార్టీ నేత చంద్రశేఖర్ ఆజాద్ చేతులు కలిపి సామాజిక్ పరివర్తన్ మోర్చా పేరుతో మూడో ప్రత్యామ్నాయ కూటమిని తెరపైకి తెచ్చారు. లక్నో వేదికగా ఈ కూటమి ముఖ్యమంత్రి అభ్యర్థిగా చంద్రశేఖర్ ఆజాద్ పేరును ఓవైసీ ప్రకటించడం ద్వారా యూపీ ఎన్నికల పోరును ద్విముఖం నుంచి త్రిముఖ పోరుగా మార్చే ప్రయత్నం చేశారు.
రాష్ట్ర జనాభాలో దాదాపు 40 శాతానికి పైగా ఉన్న దళిత (21 శాతం) మరియు ముస్లిం (19 శాతం) సామాజిక వర్గాలను ఒకే గొడుగు కిందకు తీసుకురావడం ద్వారా అధికార పీఠాన్ని శాసించే శక్తిగా ఎదగాలని ఈ కొత్త కూటమి వ్యూహరచన చేస్తోంది. ఈ నూతన కూటమి రాక ప్రధాన ప్రతిపక్షమైన సమాజ్‌వాదీ పార్టీ అధినేత అఖిలేష్ యాదవ్ ప్రతిపాదిస్తున్న ‘పీడీఏ’ ఫార్ములాకు సవాలుగా మారే అవకాశం కనిపిస్తోంది. ముస్లింలు కేవలం ఇతర పార్టీలకు ఓట్లు వేసే యంత్రాలుగా మిగిలిపోకుండా,
స్వయంగా రాజకీయ నాయకత్వ స్థానాల్లోకి ఎదగాలని ఓవైసీ పిలుపునిస్తుండగా.. మరోవైపు మాయావతి నేతృత్వంలోని బీఎస్పీ బలహీనపడుతున్న తరుణంలో యువ దళిత ఓటర్లను తనవైపు తిప్పుకోవాలని నగినా ఎంపీ చంద్రశేఖర్ ఆజాద్ పావులు కదుపుతున్నారు. హోరాహోరీ పోటీ ఉండే నియోజకవర్గాల్లో ఈ కొత్త కూటమి కనుక మైనారిటీ, దళిత ఓట్లను చీల్చగలిగితే, అది నేరుగా ఎస్పీ-కాంగ్రెస్ కూటమి గెలుపు అవకాశాలపై ప్రతికూల ప్రభావం చూపే ప్రమాదం ఉందని రాజకీయ విశ్లేషకులు అంచనా వేస్తున్నారు.
అయితే, క్షేత్రస్థాయిలో బలమైన శక్తిగా ఎదగడానికి ‘సామాజిక్ పరివర్తన్ మోర్చా’ ముందు ఎన్నో కఠిన సవాళ్లు ఉన్నాయి. 2022 అసెంబ్లీ ఎన్నికల్లో ఈ రెండు పార్టీలు విడివిడిగా పోటీ చేసి కనీసం ఒక్క శాతం ఓట్లను కూడా సాధించలేక, ఒక్క సీటును కూడా గెలుచుకోలేకపోయాయి. కానీ 2024 లోక్‌సభ ఎన్నికల్లో నగినా నియోజకవర్గం నుంచి ఆజాద్ సాధించిన భారీ విజయం వీరిలో కొత్త ఆశలు రేకెత్తించింది. ప్రస్తుతం ఈ కూటమిని ‘బీజేపీకి బీ-టీమ్’ అని, కేవలం ప్రతిపక్షాల ఓట్లు చీల్చడానికే వచ్చారనే విమర్శలను తిప్పికొట్టడంతో పాటు, బూత్ స్థాయిలో పటిష్టమైన యంత్రాంగాన్ని నిర్మించుకోవడం ఓవైసీ-ఆజాద్ జోడీకి అత్యంత కీలకం కానుంది.