ఆంధ్రప్రదేశ్‌లో మిగిలిన 4 మున్సిపల్ కార్పొరేషన్ల ఎన్నికలకు నోటిఫికేషన్ విడుదలవడంతో గోదావరి జిల్లాల్లో రాజకీయ వేడి ఒక్కసారిగా రాజుకుంది. ముఖ్యంగా రాజమహేంద్రవరం మున్సిపల్ కార్పొరేషన్ మేయర్ పీఠం ఈసారి ఎస్సీ జనరల్ కేటగిరీకి రిజర్వ్ కావడంతో ఆ పదవిని దక్కించుకునేందుకు ఆశావహులు తీవ్రంగా పోటీ పడుతున్నారు. ఈ క్రమంలో అమలాపురం మాజీ ఎంపీ, కాంగ్రెస్ సీనియర్ నేత జి.వి. హర్షకుమార్ తనయుడు జి.వి. శ్రీరాజ్ రాజమండ్రి మేయర్ బరిలో నిలిచేందుకు వ్యూహాత్మక అడుగులు వేస్తున్నట్లు రాజకీయ వర్గాల్లో జోరుగా ప్రచారం సాగుతోంది.
వాస్తవానికి రాజమండ్రి మేయర్ టికెట్ కోసం తొలుత తెలుగుదేశం పార్టీ వైపు శ్రీరాజ్ ప్రయత్నాలు చేసినప్పటికీ, అక్కడ ఇప్పటికే కూటమి నేతలు, స్థానిక ఆశావహుల నుండి తీవ్ర పోటీ ఉండటంతో ఆయనకు అవకాశం దక్కే సూచనలు కనిపించలేదు. దీంతో తన రాజకీయ భవిష్యత్తు కోసం ప్రత్యామ్నాయ మార్గాలను అన్వేషిస్తున్న ఆయన, ఇప్పుడు ప్రతిపక్ష వైఎస్సార్‌సీపీ వైపు దృష్టి సారించినట్లు తెలుస్తోంది. రాజమండ్రి కార్పొరేషన్‌లోని 72 డివిజన్ల పరిధిలో మేయర్ అభ్యర్థిగా అవకాశం కల్పిస్తే, ఎన్నికల ఖర్చు మొత్తం తామే భరిస్తామని వైసీపీ అధిష్టానానికి హామీ ఇచ్చినట్లు విశ్వసనీయ సమాచారం.
ఈ సమీకరణాల వెనుక బలమైన సామాజిక, రాజకీయ లెక్కలు ఉన్నాయని విశ్లేషకులు భావిస్తున్నారు. రాజమండ్రి కార్పొరేషన్ పరిధిలో ఎస్సీ, క్రైస్తవ ఓటర్ల సంఖ్య గణనీయంగా ఉంది. ఒకవేళ వైసీపీ తరపున బరిలోకి దిగితే, ఆ పార్టీకి సంప్రదాయంగా ఉన్న ఓటు బ్యాంకుతో పాటు, హర్షకుమార్ కుటుంబానికి ఎస్సీ, క్రైస్తవ వర్గాల్లో ఉన్న పట్టు తోడై కచ్చితంగా విజయం సాధించవచ్చని శ్రీరాజ్ వర్గం అంచనా వేస్తోంది. మరి ఆర్థికంగా బలంగా ఉండి, సామాజిక సమీకరణాలకు సరిపోయే హర్షకుమార్ తనయుడికి వైసీపీ అధిష్టానం గ్రీన్ సిగ్నల్ ఇస్తుందా లేదా అన్నది ఇప్పుడు రాజమండ్రి రాజకీయాల్లో ఆసక్తికరంగా మారింది.