ఒకప్పుడు తెలుగుదేశం పార్టీ లీడర్‌షిప్ అంటే ఎంత కఠినంగా ఉంటుందో, క్రమశిక్షణ తప్పితే ఎలాంటి చర్యలు ఉంటాయో ప్రత్యేకంగా చెప్పక్కర్లేదు. కానీ, అనంతపురం అర్బన్ ఎమ్మెల్యే దగ్గుపాటి వెంకటేశ్వర ప్రసాద్ వ్యవహారశైలి చూస్తుంటే ఆయనకు పార్టీ అధిష్టానం అన్నా, హైకమాండ్ ఇచ్చే వార్నింగులన్నా అస్సలు లెక్కే లేదనే ఆసక్తికరమైన చర్చ రాజకీయ వర్గాల్లో నడుస్తోంది. ఒక ప్రజాప్రతినిధిగా నియోజకవర్గంలో పార్టీ మైలేజ్ పెంచాల్సింది పోయి, వరుసగా వివాదాస్పద ఆరోపణల్లో చిక్కుకుంటూ పార్టీ పరువును బజారున పడేస్తున్నా ఆయన తన రూటు మార్చుకోకపోవడం స్థానిక క్యాడర్‌ను సైతం విస్మయానికి గురిచేస్తోంది.
గతంలో అధికారులపై మామూళ్ల ఒత్తిడి తేవడం, ఎగ్జిబిషన్ నిర్వాహకులపై దాడుల వివాదంలో సొంత గన్‌మెన్ సస్పెండ్ అవ్వడం, చివరకు టాలీవుడ్ హీరో జూనియర్ ఎన్టీఆర్‌ను ఉద్దేశించి చేసిన కామెంట్స్ ఆడియో లీక్ కావడం వంటి ఎన్నో సంఘటనలు జిల్లాలో సంచలనం సృష్టించాయి. తాజాగా ఓ మహిళ ఏకంగా 70 లక్షల రూపాయల భూ వివాదంలో ఎమ్మెల్యే, ఆయన అనుచరులు తనే వేధిస్తున్నారంటూ ఫోన్ చాట్స్, ఆడియో ఆధారాలతో ఎస్పీకి కంప్లైంట్ ఇవ్వడం తీవ్ర దుమారం రేపింది. ఇంత జరుగుతున్నా, ప్రతిపక్షాలకు సొంతంగా ఆయుధాలు ఇస్తున్నా సరే.. ఎమ్మెల్యేలో కనీసం భయం కానీ, తప్పు చేశాననే పశ్చాత్తాపం కానీ కనిపించడం లేదని, పార్టీ లైన్‌ను దాటి తనదైన శైలిలోనే ఆయన ముందుకు వెళ్తున్నారని సమాచారం.
ఒకవైపు ముఖ్యమంత్రి చంద్రబాబు నాయుడు, ఐటీ మంత్రి నారా లోకేష్‌లు అవినీతికి తావులేకుండా, పారదర్శక పాలన అందించాలని శాసనసభ్యులకు క్లాసులు పీకుతున్నారు. తప్పు చేస్తే ఎంతటి వారినైనా వదిలేది లేదని హెచ్చరిస్తున్నారు. కానీ అనంతపురం ఎమ్మెల్యే దగ్గుపాటి వెంకటేశ్వర ప్రసాద్ విషయంలో మాత్రం అధిష్టానం కనీసం ఆయన్ను కంట్రోల్ చేయలేకపోతోందా లేక భయపెట్టలేకపోతోందా అనే అనుమానాలు వ్యక్తమవుతున్నాయి. వరుస ఆరోపణలు వస్తున్నా పార్టీ పరంగా ఎలాంటి గట్టి చర్యలు లేదా కనీసం షోకాజ్ నోటీసులు కూడా జారీ చేయకపోవడం, స్థానిక సీనియర్ నేతలను కూడా ఆయన లైట్ తీసుకోవడం చూస్తుంటే సీమ పాలిటిక్స్‌లో కూటమి ప్రభుత్వానికి ఈ వ్యవహారం పెద్ద మైనస్‌గా మారే ప్రమాదం కనిపిస్తోంది.