ప్రస్తుత కాలంలో మనిషి జీవితంలో సినిమా ఓ భాగం అయిపోయిందన్నా అతిశయోక్తి కాదేమో! తన దైనందిన జీవితంలో అలసిపోయిన, వీలున్న ప్రతీసారీ.. చేతిలో సెల్ ఫోన్ లోనో, ఇంట్లో టీవీలోనో, వర్క్ గ్యాప్ లో ల్యాప్ టాప్ లోనో… తన రిలాక్షేషన్ కోసం ఆశ్రయించే వేదిక “సినిమా” అని చెప్పొచ్చు! అంటే… సినిమాకి సంబంధించిన ఫైట్లు, పాటలు, కామెడీ సన్నివేశాలు మొదలైనవి చూడటం అన్నమాట.
ఇక వీకెండ్ వచ్చిందంటే.. చాలామంది ఫస్ట్ ప్రిఫరెన్స్ సినిమాకి వెళ్లడం. మరికొంతమందికి శుక్రవారం కొత్త సినిమా రిలీజ్ అవ్వగానే మార్నింగ్ షో చూడకపొతే చిన్నతనం భావన. ఈ స్థాయిలో సినిమా మనిషి జీవితంతో పెనవేసుకుపోయింది!
ఎంత పెద్ద టీవీ ఉన్నా, ఎన్ని ఓటీటీలు వచ్చినా… థియేటర్ లో సినిమా చూసిన ఫీలింగ్ ఎట్టి పరిస్థితుల్లోనూ రాదనేది చాలామంది సినిమా అభిమానుల వెర్షన్ గా ఉంటుంది. అంతమంది జనాల్లో, బిగ్ స్క్రీన్ పై, డాల్బీ సౌండ్ తో ఆ డైలాగులూ, పాటలు, ఫైట్ లు చూస్తుంటే… ఆ కిక్కే వేరు, దాని లెక్కేవేరు అని అంటారు. అందుకే చాలామంది ‘కాస్త సినిమా బాగుంది’ అని టాక్ రాగానే… ఏమాత్రం అవకాశం ఉన్నా థియేటర్ లోనే చూడాలని భావిస్తుంటారు. అందుకే ఈ ఆన్ లైన్ కాలంలో కూడా థియేటర్ల మనుగడ ఉన్నంతలో సాఫీగానే సాగుతోంది.
ఇంతలా పెనవేసుకుపోయిన, పాతుకు పోయిన ఈ సినిమా థియేటర్ అనే ఆలోచన అసలు ఎప్పుడు, ఎక్కడ, ఎవరికి పుట్టిందో తెలుసా..? అప్పుడు తెరపై ఏ బొమ్మ ప్రదర్శించారో తెలుసా..? జనాలకు ఈ సమాచారాన్ని ఎలా చేరవేశారు..? ఆ సమయంలో ఈ థియేటర్ ఆలోచనకు ప్రజల మద్దతు, ఆదరణ ఏవిధంగా ఉంది..? అనేది ఇప్పుడు చూద్దామ్…!
1905వ సంవత్సరంలో అమెరికాలో మొట్టమొదటిసారిగా సాధారణ రకమైన పబ్లిక్ మోషన్ పిక్చర్ థియేటర్ పెన్సిల్వేనియాలోని పిట్స్ బర్గ్ లో ప్రారంభమైంది. ఆ సినిమా థియేటర్ యజమానులైన హ్యారీ డేవిస్, జాన్ హారిస్ తమ సినిమాకు “నికెలోడియన్” అని పేరు పెట్టారు. ఈ పేరు, సినిమా థియేటర్ లోకి ప్రవేశ రుసుము అయిన ‘నికెల్’, ‘థియేటర్’ అనే గ్రీకు పదం ‘ఓడియన్’ అనే పదాల నుండి వచ్చింది.
ఆ రోజుల్లో అందుబాటులో ఉన్న పరిమిత సాంకేతిక పరిజ్ఞానం కారణంగా.. నికెలోడియన్ మొదటి సినిమాలు తెల్లని షీట్లపై మినుకుమినుకుమనే నీడలుగా ప్రదర్శించబడిన చిన్న చిత్రాలు మాత్రమే. వీటి నిడివి కేవలం 15 నుండి 20 నిమిషాలుగా ఉండేది. ఈ క్రమంలో వాటికి ప్రజాదరణ పెరిగేకొద్దీ.. దేశవ్యాప్తంగా మరిన్ని థియేటర్లు పుట్టుకొచ్చాయి. ఇదే సినిమా పరిశ్రమ ఆవిర్భావానికి నాంది పలికిందని అంటారు.
తదనంతరం.. 1920లలో కలర్, సౌండ్ లతో కూడిన చిత్రాలు వచ్చాయి. సాంకేతికతలు మెరుగుపడటంతో, సినిమా హాళ్ల పరిమాణం, ప్రేక్షకులు, వారు ఆస్వాదించే సౌకర్యాల రకాలు మొదలైనవి అన్నీ మెరుగుపడ్డాయి. వాటిలో పిక్చర్ ప్యాలెస్ లు, డ్రైవ్-ఇన్ థియేటర్లు, మెరుగైన సినిమా ఫార్మాట్ లు, పెద్ద పెద్ద మల్టీప్లెక్స్ లు, 10 కంటే ఎక్కువ స్క్రీన్ లు ఉన్న మెగాప్లెక్స్ థియేటర్లు వచ్చేశాయి.
వీటితో పాటు.. సినిమా హాళ్లలో ఇష్టమైన చిరుతిండి అయిన పాప్ కార్న్, ఐస్ క్రీమ్, కూల్ డ్రింక్స్, మొదలైన తినుబండారాలు కూడా వచ్చాయి.
అంతేనా… ఈ రోజుల్లో సినిమా థియేటర్లు కేవలం మూవీ ఎంటర్ టైన్ మెంట్, రిలాక్సేషన్ సెంటర్స్ మాత్రమే కాదు… అవి రొమాంటిక్ డేట్ లకు, కొత్త ముఖాలను కలవడానికి, రోజంతా కష్టపడి పనిచేసిన తర్వాత స్నేహితులు, కుటుంబ సభ్యులతో గడపడానికి ఒక గొప్ప మార్గాన్ని కూడా అందిస్తున్నాయి.
మరి సుమారు శతాబ్ధానికి పైగా చరిత్ర ఉన్న సినిమా థియేటర్ లకు ఓ “డే” ఉందని ఎంతమందికి తెలుసు! అవును… సినిమా థియేటర్స్ దినోత్సవం అని ఒకటి ఉంది. ప్రతి సంవత్సరం ఏప్రిల్ 23న సినిమా థియేటర్ దినోత్సవాన్ని.. అంటే.. వెండితెర మాయాజాలాన్ని ఘనంగా జరుపుకుంటారు. మరి ఆ రోజు మీ ప్లాన్స్ ఏమిటి…? ఏ సినిమా చూడబోతున్నారు..? ఎవరితో కలిసి చూడబోతున్నారు..?