ఆంధ్రప్రదేశ్ స్థానిక సంస్థల ఎన్నికల ఫలితాలు పార్వతీపురం మన్యం, విజయనగరం జిల్లాల్లో కూటమి ప్రభుత్వానికి ఊహించని షాక్ ఇచ్చాయి. రాష్ట్రవ్యాప్తంగా కూటమి హవా నడుస్తున్నప్పటికీ, గిరిజన సంక్షేమ శాఖ మంత్రి గుమ్మిడి సంధ్యారాణి ప్రాతినిధ్యం వహిస్తున్న సాలూరు నియోజకవర్గ పరిధిలో సీన్ పూర్తిగా రివర్స్ అయింది. మంత్రి సంధ్యారాణి సొంత మండలమైన మక్కువతో పాటు, ఆమె నివాసముంటున్న సాలూరు నియోజకవర్గ పరిధిలోనూ వైఎస్సార్ కాంగ్రెస్ పార్టీ అభ్యర్థులు అఖండ విజయం సాధించడం పొలిటికల్ సర్కిల్స్ లో తీవ్ర సంచలనంగా మారింది.
ఈ ఘోర పరాజయానికి మంత్రి సంధ్యారాణిపై క్షేత్రస్థాయిలో వచ్చిన తీవ్ర ప్రజా వ్యతిరేకతే ప్రధాన కారణమని విశ్లేషకులు భావిస్తున్నారు. మంత్రిగా పదవి చేపట్టిన రెండున్నరేళ్ల కాలంలో నియోజకవర్గంలో ఆశించిన స్థాయిలో అభివృద్ధి జరగలేదని, గిరిజన ప్రాంతాల సమస్యలను పట్టించుకోవడంలో ఆమె పూర్తిగా విఫలమయ్యారనే అసంతృప్తి ఓటర్లలో బలంగా నాటుకుపోయింది. దీనికి తోడు నియోజకవర్గంలో కూటమి శ్రేణుల మధ్య సరైన సమన్వయం లేకపోవడం, కేడర్ ను నిర్లక్ష్యం చేయడం వల్ల పల్లెల్లో సైకిల్ వేగానికి బ్రేకులు పడ్డాయి. నామినేషన్ల సమయంలో అధికార పార్టీ బల ప్రదర్శన చేసినప్పటికీ, ఓటర్లు మాత్రం నిశ్శబ్దంగా ఫ్యాన్ గుర్తు వైపు మొగ్గు చూపారు.
మంత్రి సంధ్యారాణి సొంతూరు మక్కువలో వైసీపీ క్లీన్ స్వీప్ చేయడం, అటు సాలూరు పరిధిలోని మెజారిటీ స్థానాలను కైవసం చేసుకోవడం ఆమె రాజకీయ పట్టును గట్టిగా దెబ్బతీసింది. గత అసెంబ్లీ ఎన్నికల నాటి పరిస్థితులకు, ఇప్పటికి ఓటర్ల నాడి పూర్తిగా మారిపోయిందనడానికి ఈ ఫలితాలే ప్రత్యక్ష నిదర్శనం. సొంత గూట్లోనే మంత్రికి ఎదురైన ఈ పరాభవంపై కూటమి అధిష్ఠానం సీరియస్ గా ఉన్నట్లు సమాచారం. ఇప్పటికైనా ‘మేడం గారు’ తన పంథాను మార్చుకుని, క్షేత్రస్థాయి వ్యతిరేకతను తగ్గించుకోకపోతే రాబోయే పంచాయతీ ఎన్నికల్లో కూటమి మరింత భారీ మూల్యం చెల్లించుకోక తప్పదని స్థానిక రాజకీయ విశ్లేషకులు హెచ్చరిస్తున్నారు.