తిరుమల తిరుపతి దేవస్థానం పాలకమండలి పదవీకాలం ముగిసినప్పటికీ, నూతన ధర్మకర్తల మండలి నియామకం జరగకుండా ఆంధ్రప్రదేశ్ ప్రభుత్వం తాత్కాలికంగా ‘స్పెసిఫైడ్ అథారిటీ’ని రంగంలోకి దించడం వెనుక బలమైన రాజకీయ కారణాలు ఉన్నాయనే విశ్లేషణలు వస్తున్నాయి. కేవలం పరిపాలనాపరమైన ఆలస్యం అని పైకి చెబుతున్నప్పటికీ.. కూటమి భాగస్వామ్య పక్షాలైన జనసేన, బీజేపీల నుంచి వచ్చే తీవ్ర ఒత్తిళ్లను తట్టుకోలేక, ఇప్పట్లో బోర్డు ఏర్పాటు చేస్తే అసమ్మతి రాగాలు రేగుతాయనే భయంతోనే తెలుగుదేశం పార్టీ అధిష్టానం ఈ నిర్ణయాన్ని వాయిదా వేసినట్లు పొలిటికల్ సర్కిల్స్‌లో గట్టిగా వినిపిస్తోంది.
ఇటీవల ముగిసిన స్థానిక సంస్థల ఎన్నికల సీట్ల సర్దుబాటు సమయంలోనే టీడీపీ అధిష్టానానికి క్షేత్రస్థాయిలో తలబొప్పి కట్టింది. ఉమ్మడి జిల్లాల వారీగా ఎక్కువ స్థానాలను టీడీపీ తన ఖాతాలోనే ఉంచుకుందని, జనసేనకు ఆశించిన స్థాయిలో సీట్లు కేటాయించలేదని ఆ పార్టీ కేడర్‌లో తీవ్ర అసంతృప్తి గూడుకట్టుకుంది. జనసేన అధినేత పవన్ కళ్యాణ్ మరియు ముఖ్య నేతలు పైకి సర్దుకుపోయినట్లు కనిపించినా.. ద్వితీయ శ్రేణి నాయకులు మరియు కార్యకర్తల్లో టీడీపీ ఏకపక్ష ధోరణిపై తీవ్ర ఆగ్రహం వ్యక్తమైంది.
ఈ నేపథ్యంలోనే, అత్యంత ప్రతిష్టాత్మకమైన టీటీడీ పాలకమండలి పదవుల పంపకంలో ఏమాత్రం తేడా వచ్చినా కూటమిలో అసమ్మతి జ్వాలలు ఎగిసిపడటం ఖాయమని చంద్రబాబు నాయుడు భావిస్తున్నట్లు తెలుస్తోంది. దేశంలోనే అత్యంత సంపన్నమైన, ఆధ్యాత్మిక ప్రాధాన్యత కలిగిన టీటీడీ బోర్డులో ఈసారి జనసేన, బీజేపీలు సింహభాగం పదవులను ఆశిస్తున్నాయి. ముఖ్యంగా పీఠాధిపతులు, హిందూ ధార్మిక సంస్థల మద్దతు ఉన్న బీజేపీ నేతలు బోర్డులో కీలక స్థానాల కోసం దిల్లీ స్థాయి నుంచి ఒత్తిడి తెస్తున్నారు.
అటు జనసేన కూడా స్థానిక ఎన్నికల్లో జరిగిన అన్యాయాన్ని టీటీడీ బోర్డు మెంబర్ల రూపంలో భర్తీ చేసుకోవాలని గట్టి పట్టుదలతో ఉంది. బోర్డు ఛైర్మన్ పదవితో పాటు కీలక సభ్యుల నియామకంలో ఇరు పార్టీల నుంచి వస్తున్న సిఫార్సులను తోసిపుచ్చలేక, అలాగని సొంత పార్టీ నేతలను నిరాశపర్చలేక టీడీపీ అగ్రనాయకత్వం తీవ్ర సంకట స్థితిలో పడింది. టీటీడీ బోర్డు ప్రకటిస్తే వచ్చే పొలిటికల్ డ్యామేజ్‌ను ముందే ఊహించిన చంద్రబాబు సర్కార్, ప్రస్తుతానికి ఎలాంటి రాజకీయ నియామకాలు చేపట్టకుండా ఐఏఎస్ అధికారులతో కూడిన ముగ్గురు సభ్యుల కమిటీకి తిరుమల బాధ్యతలు అప్పగించింది.
ఈఓ ముద్దాడ రవిచంద్ర, ఐఏఎస్ అధికారులు వినయ్ చంద్, కన్నబాబుల నేతృత్వంలోని ఈ తాత్కాలిక వ్యవస్థ కనీసం మరికొన్ని నెలల పాటు కొనసాగే అవకాశం ఉంది. కూటమి పార్టీల మధ్య సీట్ల సర్దుబాటు అసంతృప్తి చల్లారే వరకు మరియు టీటీడీ పదవుల పంపకంపై ఒక స్పష్టమైన ఏకాభిప్రాయం కుదిరే వరకు కొత్త బోర్డు వైపు అడుగులు వేయకూడదనే రక్షణాత్మక వ్యూహంలోనే టీడీపీ అధిష్టానం ఉన్నట్లు స్పష్టమవుతోంది.