ఆంధ్రప్రదేశ్ మున్సిపల్ ఎన్నికల ఫలితాల్లో అధికార ఎన్డీయే కూటమి రాష్ట్రవ్యాప్తంగా ప్రభంజనం సృష్టించినప్పటికీ, అనంతపురం మున్సిపల్ కార్పొరేషన్‌లో మాత్రం అనూహ్యమైన షాక్ తగిలింది. కూటమి పొత్తుల్లో భాగంగా ఈ మేయర్ స్థానాన్ని భారతీయ జనతా పార్టీకి కేటాయించగా, అక్కడ వైసీపీ అభ్యర్థి బి.సి. రమేష్ గౌడ్ ఘనవిజయం సాధించి మేయర్ పీఠాన్ని దక్కించుకున్నారు. మొత్తం 62 డివిజన్లలో కూటమి పార్టీలు.. టీడీపీ 30, జనసేన 6, బీజేపీ 1.. కలిసి ఏకంగా 37 స్థానాలను గెలుచుకుని మెజారిటీ సాధించినప్పటికీ, మేయర్ ఓటింగ్‌లో మాత్రం కూటమి అభ్యర్థి కోట్ల అజేష్ బాబు 5,981 ఓట్ల తేడాతో వైసీపీ చేతిలో ఓడిపోవడం పొలిటికల్ సర్కిల్స్ లో సంచలనంగా మారింది.
ఈ ఘోర పరాజయానికి అనంతపురం అర్బన్ టీడీపీ ఎమ్మెల్యే దగ్గుబాటి వెంకటేశ్వర ప్రసాద్ అనుసరించిన వైఖరి, క్షేత్రస్థాయిలో పెరిగిన అవినీతి ఆరోపణలే ప్రధాన కారణమని స్థానికంగా గట్టి టాక్ నడుస్తోంది. ఎమ్మెల్యేగా గెలిచిన రెండున్నరేళ్ల కాలంలోనే నియోజకవర్గంలో అవినీతి, అక్రమాలు మితిమీరిపోయాయని, దీనిపై ప్రజల్లో తీవ్ర అసంతృప్తి నెలకొందని సొంత పార్టీ శ్రేణులే అంతర్గత చర్చల్లో ఒప్పుకుంటున్నారు. దీనికి తోడు మేయర్ సీటును బీజేపీకి కేటాయించడంపై స్థానిక టీడీపీ లీడర్లలో ఉన్న అసంతృప్తి, ఎమ్మెల్యే గ్రూపు రాజకీయాల వల్ల కూటమి అభ్యర్థికి క్షేత్రస్థాయి కేడర్ సరిగ్గా సహకరించలేదనే విమర్శలు వస్తున్నాయి.
ఈ అంతర్గత విబేధాలు, ఓవర్ యాక్షన్ ప్రజా వ్యతిరేకతగా మారి కూటమికి గట్టి దెబ్బ కొట్టాయి. కూటమికి మెజారిటీ వార్డులు ఉన్నప్పటికీ, మేయర్ స్థానానికి జరిగిన ఓటింగ్‌లో పెద్ద ఎత్తున క్రాస్ ఓటింగ్ జరగడం ఎమ్మెల్యే దగ్గుబాటి ప్రసాద్ వైఫల్యాన్ని, అసమర్థతను బట్టబయలు చేసింది. రాష్ట్రవ్యాప్తంగా ఉన్న 13 కార్పొరేషన్లలో 12 చోట్ల కూటమి జెండా ఎగిరితే, కేవలం అనంతపురంలోనే వైసీపీ గెలవడం కూటమి అగ్రనాయకత్వాన్ని సైతం తీవ్ర ఆందోళనలో పడేసింది. ఇప్పటికైనా చంద్రబాబు నాయుడు స్పందించి స్థానిక ఎమ్మెల్యే అవినీతిపై, పార్టీలోని లోపాలపై నివేదిక తెప్పించుకోకపోతే రాబోయే పంచాయతీ ఎన్నికల్లో కూడా కూటమికి మరిన్ని పరాజయాలు తప్పవని విశ్లేషకులు హెచ్చరిస్తున్నారు.