విజయవాడ నగరపాలక సంస్థ మేయర్ ఎన్నికలు సమీపిస్తున్న వేళ.. అధికార కూటమి తీరుపై నగర రాజకీయ వర్గాల్లో తీవ్ర విమర్శలు వ్యెక్తం అవుతున్నాయి. బెజవాడలో తమకు బలమైన క్యాడర్, సమర్థులైన నాయకులు ఉన్నారని చెప్పుకునే కూటమి పార్టీలు.. తీరా మేయర్ పీఠాన్ని దక్కించుకునే సమయానికి మళ్లీ వంగవీటి కుటుంబం వెనుకే పడటం వారి బలహీనతను స్పష్టం చేస్తోంది. జనసేన పార్టీ తరఫున వంగవీటి మోహన రంగా తనయుడు వంగవీటి రాధాకృష్ణ సతీమణిని బరిలోకి దింపేందుకు కూటమి నేతలు ఏకాభిప్రాయానికి వచ్చారనే ప్రచారం వెనుక పక్కా రాజకీయ స్వార్థం దాగి ఉందనే విమర్శలు వినిపిస్తున్నాయి.
ప్రస్తుతం వంగవీటి రాధా తెలుగుదేశం పార్టీలో కొనసాగుతున్నారు. అయినప్పటికీ ఆయన సతీమణిని జనసేన పార్టీ తరఫున మేయర్ అభ్యర్థిగా నిలబెట్టాలని చూడటం కూటమి నేతల అవకాశవాద రాజకీయాలకు నిదర్శనమనే ఆరోపణలు వస్తున్నాయి. విజయవాడ కార్పొరేషన్ పరిధిలో కూటమి తరఫున ఎంతోకాలంగా కష్టపడి పనిచేస్తున్న మహిళా నేతలను పక్కనపెట్టి, కేవలం వంగవీటి కుటుంబానికి ఉన్న పాత బ్రాండ్ ఇమేజ్ మరియు కాపు సామాజికవర్గం ఓట్లను కొల్లగొట్టడానికే ఈ వ్యూహాన్ని తెరపైకి తెచ్చారని విశ్లేషకులు మండిపడుతున్నారు.
పార్టీ కోసం రాత్రింబవళ్లు కష్టపడిన స్థానిక శ్రేణులను కాదని, కేవలం ఎన్నికల గ్లామర్ కోసమే వంగవీటి రంగా కోడలిని వాడుకోవాలని చూడటం ఎంతవరకు సమంజసమని తమ్ముళ్లే అంతర్గతంగా ప్రశ్నిస్తున్నారు. విజయవాడలో వైఎస్సార్ కాంగ్రెస్ పార్టీకి ఉన్న పటిష్టమైన ఓటు బ్యాంకును, పట్టును ఒంటిచేత్తో ఎదుర్కొనే ధైర్యం లేకే కూటమి అగ్రనేతలు ఈ రకమైన ప్రయోగాలకు తెరలేపారని నెటిజన్లు విమర్శిస్తున్నారు. వంగవీటి రాధా భార్యను అభ్యర్థిగా ప్రకటిస్తే వైకాపా డిఫెన్స్‌లో పడటం మాట దేవుడెరుగు.. మొదట కూటమిలోని ఆశావహుల తిరుగుబాటును తట్టుకోవడం చంద్రబాబు, పవన్ కళ్యాణ్‌లకు పెద్ద తలనొప్పిగా మారే ప్రమాదం ఉంది. దశాబ్దాలుగా నగరంలో నిలకడగా రాజకీయం చేయలేక, తరచూ పార్టీలు మారుస్తూ వస్తున్న వంగవీటి కుటుంబాన్ని నమ్ముకుని, స్థానిక మున్సిపల్ ఎన్నికల భవిష్యత్తును పణంగా పెట్టడం కూటమికి లాభం కంటే నష్టమే ఎక్కువ చేస్తుందనే వాదన బలంగా వినిపిస్తోంది.