కడప జిల్లా పరిషత్ ఛైర్మన్ పదవి కేటాయింపు వివాదం ఆంధ్రప్రదేశ్ కూటమి రాజకీయాల్లో పెను ప్రకంపనలు సృష్టిస్తోంది. ఈ వ్యవహారంపై జమ్మలమడుగు బీజేపీ ఎమ్మెల్యే చదిపిరాళ్ల ఆదినారాయణ రెడ్డి శనివారం విజయవాడలో నిర్వహించిన మీడియా సమావేశంలో టీడీపీ తీరుపై తీవ్ర స్థాయిలో విరుచుకుపడ్డారు. నిన్న ముఖ్యమంత్రి చంద్రబాబు నాయుడు, మంత్రి నారా లోకేష్లతో చర్చలు జరిగినప్పటికీ, వారు చెప్పిన కారణాలు తనకు ఏమాత్రం సమంజసంగా అనిపించలేదని ఆదినారాయణ రెడ్డి తేల్చిచెప్పారు. మాధవ్ సమక్షంలోనే కడప జెడ్పీ ఇస్తామని సీఎం చంద్రబాబు హామీ ఇచ్చారని, తమ పార్టీ ఆదేశాల ప్రకారమే ఆ స్థానాన్ని అడిగామని, ప్రకటనకు ముందు వరకు అందరూ శుభాకాంక్షలు చెప్పి చివరి నిమిషంలో హ్యాండ్ ఇచ్చారని ఆయన ఆగ్రహం వ్యక్తం చేశారు.
తమకు పదవి రాకపోవడం వెనుక ఏమైనా ‘ప్యాకేజీ డీల్’ జరిగిందా? లేక మరేమైనా రాజకీయాలు జరిగాయా? అన్నది తేలాల్సి ఉందని సంచలన ఆరోపణలు చేశారు. తన ఇద్దరు తమ్ముళ్ల కుమారుల జెడ్పీటీసీ రాజీనామాలు కొనసాగుతాయని, వెనక్కి తగ్గే ప్రసక్తే లేదని ఆదినారాయణ రెడ్డి స్పష్టం చేశారు. తన వాదనతో బీజేపీ ఢిల్లీ పెద్దలు పూర్తిగా ఏకీభవించారని, రాష్ట్రంలో బీజేపీకి జరుగుతున్న అన్యాయాలపై ఒక ‘డిటైల్ ప్రాజెక్టు రిపోర్ట్’ తీసుకుని ఢిల్లీకి రావాలని అధిష్ఠానం తనను ఆదేశించిందని వెల్లడించారు. రాష్ట్రవ్యాప్తంగా ధర్మవరం, అనంతపురం, కోస్తా ప్రాంతాల్లోనూ బీజేపీ విషయంలో టీడీపీ ఇదే తరహాలో వ్యవహరిస్తోందని, మొన్నటి ఎన్నికల్లో గెలిచిన వారిని టీడీపీ ఎమ్మెల్యేలు కనీసం గౌరవించడం లేదని మండిపడ్డారు. అనంతపురంలో టీడీపీ సహకారం లేకపోవడం వల్లే బీజేపీ ఓడిపోయిందని ఆయన ఆరోపించారు.
దేశంలో ఎక్కడా లేని విధంగా ఆంధ్రప్రదేశ్ అభివృద్ధికి కేంద్రంలోని బీజేపీ ప్రభుత్వం అత్యధిక నిధులు కేటాయిస్తోందని, అలాంటిది రాష్ట్రంలో బీజేపీకి జరుగుతున్న అన్యాయాల జాబితా చాలా పెద్దదిగా ఉందని ఆదినారాయణ రెడ్డి అన్నారు. తన వద్ద ఉన్న జాబితాతో పాటు రాష్ట్ర నాయకత్వం వద్ద ఉన్న లిస్టును తీసుకుని ఢిల్లీ వెళ్తున్నానని, అక్కడ జాతీయ పెద్దలతో చర్చలు జరిపిన తర్వాత తన తుది నిర్ణయాన్ని ప్రకటిస్తానని తెలిపారు. ఢిల్లీ చర్చల్లో తనకు సంతృప్తి లభించకపోతే అక్కడే తన ఎమ్మెల్యే పదవికి రాజీనామా పత్రం ఇచ్చి వస్తానని ఆయన అల్టిమేటం జారీ చేశారు. ఇప్పుడు జరిగిన అన్యాయం రేపు 2029 ఎన్నికల్లో ఎమ్మెల్యే, ఎంపీ సీట్ల కేటాయింపులో జరగదని గ్యారంటీ ఏముందని ఆయన ప్రశ్నించారు. రాష్ట్రంలో టీడీపీకి, జనసేనకు మధ్య కూడా గ్యాప్లు ఉన్నాయని, అవన్నీ ఇప్పుడు బయటకు వస్తున్నాయని, కూటమిలో ఉన్న ఈ సమన్వయ లోపాలను తక్షణమే సరిదిద్దుకోకపోతే భవిష్యత్తులో ఇబ్బందులు తప్పవని ఆదినారాయణ రెడ్డి హెచ్చరించారు.