ఆంధ్రప్రదేశ్‌లో త్వరలో జరగబోయే స్థానిక సంస్థల ఎన్నికల నేపథ్యంలో కూటమి రాజకీయాలు మరింత వేడెక్కాయి. అమరావతి వేదికగా ముఖ్యమంత్రి చంద్రబాబు నాయుడు, ఉపముఖ్యమంత్రి పవన్ కళ్యాణ్ మధ్య దాదాపు రెండు గంటల పాటు సాగిన సుదీర్ఘ సమావేశం రాజకీయ వర్గాల్లో హాట్ టాపిక్‌గా మారింది. ఈ భేటీలో ప్రధానంగా క్షేత్రస్థాయిలో తెలుగుదేశం, జనసేన పార్టీల మధ్య సమన్వయం కోసం ఒక ప్రత్యేక కమిటీని ఏర్పాటు చేయాలని ఇద్దరు నేతలు ప్రాథమిక అంగీకారానికి వచ్చారు. అయితే, ఈ భేటీ వెనుక అసలైన ఆసక్తికరమైన అంశం.. సీట్ల సర్దుబాటు విషయంలో పవన్ కళ్యాణ్ చూపించిన పట్టుదల.
గత అసెంబ్లీ ఎన్నికల్లో వంద శాతం స్ట్రైక్ రేట్‌తో దూసుకుపోయిన జనసేన, ఇప్పుడు స్థానిక సంస్థల ఎన్నికల్లోనూ అదే జోరును ప్రదర్శించాలని భావిస్తోంది. గతంలో కంటే ఈసారి ఎక్కువ స్థానాలను కేటాయించాలని పవన్ కళ్యాణ్ గట్టిగా కోరినట్లు సమాచారం. ముఖ్యంగా ఉమ్మడి గోదావరి జిల్లాలు, కృష్ణా, గుంటూరు, ఉత్తరాంధ్ర ప్రాంతాల్లో జనసేన బలంగా ఉన్న చోట ఎట్టి పరిస్థితుల్లోనూ సీట్లను వదులుకోవద్దని పవన్ పట్టుబడుతున్నారు. చంద్రబాబు కొన్ని స్థానాలపై పునరాలోచించాలని కోరినప్పటికీ, పవన్ కళ్యాణ్ తన డిమాండ్ విషయంలో ఎక్కడా తగ్గలేదని విశ్లేషకులు భావిస్తున్నారు.
ఈ భేటీ తర్వాత కూటమిలో ఒక కొత్త సమీకరణం తెరపైకి వచ్చింది. గ్రామీణ మరియు పట్టణ స్థానిక సంస్థల్లో భారతీయ జనతా పార్టీ కంటే జనసేన కేడర్ క్షేత్రస్థాయిలో చాలా బలంగా ఉంది. దీంతో, బీజేపీ ఆశించే స్థానాలను కాస్త తగ్గించి, ఆ కోటాను జనసేనకు బదిలీ చేసే ఆలోచనలో చంద్రబాబు ఉన్నట్లు పొలిటికల్ సర్కిల్స్ లో టాక్ వినిపిస్తోంది. ఎక్కడెక్కడ ఏ పార్టీకి బలముందో అక్కడ ఆ మిత్రపక్షమే పోటీ చేసేలా అంతర్గత ఒప్పందం కుదిరినప్పటికీ.. అంతిమంగా జనసేన అడిగిన సీట్ల సంఖ్యను సర్దుబాటు చేయడానికి బీజేపీ కోటాలోనే కొంత కోత పెట్టే అవకాశాలు స్పష్టంగా కనిపిస్తున్నాయి. రాబోయే రోజుల్లో ఈ సీట్ల పంచాయితీ మరీ ముదరకుండా ఉండేందుకే ఇరు పార్టీల సీనియర్ నేతలతో సమన్వయ కమిటీని వేసి, వివాదాల్లేకుండా క్షేత్రస్థాయిలో పసుపు-గాజుగ్లాసు-కమలం జెండాలు కలిసి పనిచేసేలా బాబు-పవన్ వ్యూహ రచన చేశారు. దసరా తర్వాత ఈ స్థానిక ఎన్నికల సీట్ల కేటాయింపుపై అధికారిక స్పష్టత రానుంది.