ఆంధ్రప్రదేశ్‌లో స్థానిక సంస్థల ఎన్నికల వేళ అధికార కూటమిలో ఒక్కసారిగా క్రెడిట్ వార్ సెగలు రేపుతోంది. పోలవరం జిల్లా పర్యటనలో భాగంగా రంపచోడవరంలో జరిగిన సభలో డిప్యూటీ సీఎం, జనసేన అధినేత పవన్ కళ్యాణ్ చేసిన వ్యాఖ్యలు ఇప్పుడు తెలుగుదేశం పార్టీ సోషల్ మీడియా వింగ్‌లో తీవ్ర దుమారాన్ని రేపుతున్నాయి. చంద్రబాబు నాయుడు జైల్లో ఉన్న సమయంలో ఎవరూ రోడ్డెక్కనప్పుడు కేవలం జనసైనికులే నిరసనలు తెలియజేసి ధైర్యాన్నిచ్చారని, కూటమి ఏర్పడటంలో జనసేననే అత్యధికంగా త్యాగం చేసిందని పవన్ వ్యాఖ్యానించడంపై టీడీపీ తమ్ముళ్లు సోషల్ మీడియా వేదికగా తీవ్ర అసంతృప్తి వ్యక్తం చేస్తున్నారు.
పవన్ కళ్యాణ్ చేసిన వ్యాఖ్యలపై ఎక్స్, ఫేస్‌బుక్ వంటి సోషల్ మీడియా వేదికల్లో టీడీపీ కార్యకర్తలు గట్టిగా కౌంటర్లు ఇస్తున్నారు. “చంద్రబాబు నాయుడు అరెస్ట్ సమయంలో ఏ ఊర్లో జనసైనికులు రోడ్డెక్కారో మాస్టారూ?” అంటూ ఘాటుగా ప్రశ్నిస్తున్నారు. బాబు అక్రమ అరెస్టును నిరసిస్తూ రాష్ట్రవ్యాప్తంగా వందలాది మంది టీడీపీ శ్రేణులు, నేతలు ఆందోళనలు చేశారని, ఆ సమయంలో ఎంతోమంది కార్యకర్తలు అక్రమ కేసులు ఎదుర్కొని త్యాగాలు చేశారని గుర్తుచేస్తున్నారు. పవన్ కళ్యాణ్ వచ్చి మద్దతుగా నిలబడిన విషయాన్ని తాము గౌరవిస్తామని, అంతమాత్రాన టీడీపీ కార్యకర్తల పోరాటాన్ని, త్యాగాలను జనసైనికులు పూర్తిగా తీసిపారేయడం సరికాదని ఆగ్రహం వ్యక్తం చేస్తున్నారు.
రాబోయే మున్సిపల్, కార్పొరేషన్ ఎన్నికల్లో జనసేనకు సముచిత ప్రాతినిధ్యం, ఎక్కువ స్థానాలు దక్కించుకునే వ్యూహంలో భాగంగానే పవన్ కళ్యాణ్ ఈ త్యాగాల కార్డును తెరపైకి తెచ్చారని టీడీపీ శ్రేణులు విశ్లేషిస్తున్నాయి. కూటమిలో జనసేన త్యాగం చేసిన మాట నిజమే అయినా, క్షేత్రస్థాయిలో టీడీపీ బలం, క్యాడర్ వ్యవస్థ చాలా పెద్దదని.. దానిని తక్కువ చేసి మాట్లాడటం కూటమి సమన్వయానికి నష్టం కలిగిస్తుందని సోషల్ మీడియాలో హెచ్చరిస్తున్నారు.
గతంలోనూ హోం శాఖ, శాంతిభద్రతలపై పవన్ కళ్యాణ్ చేసిన కామెంట్స్ కూటమిలో కొంత చర్చకు దారితీసినప్పటికీ.. సీఎం చంద్రబాబు నాయుడు చాకచక్యంగా దానిని సర్దుబాటు చేశారు. అయితే ఇప్పుడు నేరుగా పార్టీ కార్యకర్తల సెంటిమెంట్‌కు సంబంధించిన అంశం కావడంతో సోషల్ మీడియాలో పోస్టింగ్స్ మరియు ట్రోలింగ్స్ జోరందుకున్నాయి. రాబోయే స్థానిక ఎన్నికల షెడ్యూల్ మరియు సీట్ల సర్దుబాటు కంటే ముందే ఈ అంతర్గత ‘క్రెడిట్ వార్’ సద్దుమణగకపోతే క్షేత్రస్థాయిలో ఇరు పార్టీల మధ్య సమన్వయం దెబ్బతినే ప్రమాదం ఉందని రాజకీయ విశ్లేషకులు అభిప్రాయపడుతున్నారు.