విజయనగరం జిల్లాలో సార్వత్రిక ఎన్నికల విజయం తర్వాత గజపతినగరం ఎమ్మెల్యేగా గెలిచి, చంద్రబాబు క్యాబినెట్‌లో రాష్ట్ర మంత్రిగా బాధ్యతలు చేపట్టిన కొండపల్లి శ్రీనివాస్ ప్రస్తుతం జిల్లాలో తిరుగులేని శక్తిగా ఎదుగుతున్నారు. అయితే, దశాబ్దాలుగా జిల్లా రాజకీయాలను శాసించిన బొత్స సత్యనారాయణ మేనల్లుడైన మజ్జి శ్రీనివాసరావు అలియాస్ చిన్న శ్రీను ఇప్పుడు తన కుమార్తె సిరి సహస్రతో కలిసి టీడీపీలో చేరడం.. కొండపల్లి వర్గానికి మింగుడుపడటం లేదు.
క్షేత్రస్థాయిలో బలమైన కేడర్, నెట్‌వర్క్ ఉన్న చిన్న శ్రీను లాంటి అగ్రెసివ్ లీడర్ జిల్లా బాధ్యతలు తీసుకుంటే, భవిష్యత్తులో మంత్రి కొండపల్లి శ్రీనివాస్ రాజకీయ ప్రాధాన్యత తగ్గే ప్రమాదం ఉందనే ఆందోళన వారి అనుచరులలో వ్యక్తమవుతోంది. జిల్లాలో తెలుగుదేశం పార్టీకి మూలస్తంభంగా ఉన్న సీనియర్ నేత కిమిడి కళా వెంకటరావు, వారి కుటుంబానికి కూడా చిన్న శ్రీను ఎంట్రీ గట్టి షాక్ ఇచ్చిందనే చెప్పాలి. కిమిడి కుటుంబం రాబోయే స్థానిక సంస్థల ఎన్నికలలో తమ వారసులకు లేదా అనుచరులకు కీలక పదవులు ఇప్పించుకోవాలని భావించింది.
కానీ, చిన్న శ్రీను రాకతో సమీకరణాలు పూర్తిగా మారిపోయాయి. ముఖ్యంగా చిన్న శ్రీను తన కుమార్తె రాజకీయ భవిష్యత్తు కోసమే వైఎస్‌ఆర్‌సీపీని వీడి టీడీపీలోకి వచ్చారనే ప్రచారం ఉండటంతో, రాబోయే స్థానిక సంస్థల ఎన్నికల్లో జెడ్పీ చైర్మన్ లేదా ఇతర కీలక స్థానాల కేటాయింపుల్లో కిమిడి వర్గానికి గట్టి పోటీ ఎదురుకానుంది. తాజా సమాచారం ప్రకారం, చిన్న శ్రీనును కేవలం సాధారణ నాయకుడిగా కాకుండా.. విజయనగరం జిల్లా టీడీపీ అధ్యక్షుడిగా నియమించి, రాబోయే స్థానిక సంస్థల ఎన్నికల పూర్తి నిర్వహణ బాధ్యతలను ఆయన భుజాన వేయాలని చంద్రబాబు, లోకేష్ భావిస్తున్నట్లు తెలుస్తోంది.
గత పదిహేనేళ్లుగా వైఎస్‌ఆర్‌సీపీలో ఉంటూ టీడీపీ కార్యకర్తలను, స్థానిక నాయకులను ఇబ్బంది పెట్టిన వ్యక్తికి.. పార్టీ అధికారంలోకి రాగానే ఏకంగా జిల్లా అధ్యక్ష పీఠం ఎలా కట్టబెడతారంటూ పాత తరం టీడీపీ నేతలు అంతర్గతంగా మండిపడుతున్నారు. బొబ్బిలి, గజపతినగరం, రాజాం నియోజకవర్గాల్లో చిన్న శ్రీను చేరిక వల్ల కొత్తగా గ్రూపు రాజకీయాలు మొదలయ్యే సూచనలు కనిపిస్తున్నాయని క్షేత్రస్థాయి నివేదికలు చెప్తున్నాయి. ఏదేమైనా, చిన్న శ్రీను ముఖ్యమంత్రి చంద్రబాబు, మంత్రి లోకేష్‌లను ప్రత్యేక అపాయింట్‌మెంట్‌పై కలవనున్న నేపథ్యంలో.. ఈ భేటీ తర్వాత విజయనగరం జిల్లా టీడీపీ అధ్యక్ష పదవిపై పూర్తి స్పష్టత రానుంది. ఈ నిర్ణయం జిల్లా కూటమి రాజకీయాల్లో ఎలాంటి ముఠా తగాదాలకు దారితీస్తుందో చూడాలి.
