ఆంధ్రప్రదేశ్ రాజకీయాల్లో వైఎస్‌ఆర్‌సీపీకి మొదటి నుంచి ఆయువుపట్టులా, ఆర్థిక వనరుల సమన్వయకర్తలా వ్యవహరించిన సీనియర్ నేత విజయసాయిరెడ్డి ఇప్పుడు సొంతంగా థర్డ్ ఫ్రంట్ ప్రయోగానికి తెరలేపుతున్నారు. దసరా ముగిసిన తర్వాత ఏకాదశి పర్వదినాన ఆయన నూతన ప్రాంతీయ పార్టీని అధికారికంగా ప్రకటించనున్నారు. అయితే, కేవలం రాజకీయ పార్టీ స్థాపనతోనే ఆగకుండా, ఆయన కుమార్తె ఆధ్వర్యంలో ఒక నిష్పక్షపాత తెలుగు శాటిలైట్ న్యూస్ ఛానల్‌ను కూడా మార్కెట్లోకి తీసుకువస్తున్నట్లు స్వయంగా ఆయనే వెల్లడించారు.
ప్రస్తుత కాలంలో ఒక పొలిటికల్ పార్టీని నడపడం, దానికి తోడు ఒక 24/7 న్యూస్ ఛానల్‌ను మెయింటైన్ చేయడం అంటే సాధారణ విషయం కాదు. దీనికి ఏటా వందల కోట్ల రూపాయల వ్యయం అవుతుంది. ఈ నేపథ్యంలో, విజయసాయిరెడ్డికి అంత ఆర్థిక స్థోమత మరియు బ్యాకప్ ఉందా అనే చర్చ క్షేత్రస్థాయిలో జోరందుకుంది. వృత్తిరీత్యా విజయసాయిరెడ్డి ఒక లీడింగ్ చార్టర్డ్ అకౌంటెంట్ అన్న సంగతి అందరికీ తెలిసిందే. దేశంలోని అతిపెద్ద కార్పొరేట్ కంపెనీలు, బడా పారిశ్రామికవేత్తల ఆర్థిక సామ్రాజ్యాలు ఎలా నడుస్తాయో ఆయనకు క్షుణ్ణంగా తెలుసు.
వైఎస్సార్ కుటుంబంతో దశాబ్దాలుగా ఉన్న అనుబంధం వల్ల, జగన్ హయాంలో పార్టీ నిధుల నిర్వహణ మరియు మైనింగ్, ఇన్‌ఫ్రాస్ట్రక్చర్ రంగాల్లోని బడా వ్యాపారవేత్తలతో ఆయనకు గల పరిచయాలు సాధారణమైనవి కావు. పైకి ఆయన సొంతంగా వందల కోట్లు ఖర్చు పెడుతున్నట్లు కనిపిస్తున్నా, తెరవెనుక దేశవ్యాప్తంగా ఉన్న పలువురు కార్పొరేట్ దిగ్గజాలు, శ్రేయోభిలాషుల ఆర్థిక అండదండలు విజయసాయిరెడ్డికి పుష్కలంగా ఉన్నాయని రాజకీయ విశ్లేషకులు భావిస్తున్నారు. ఒక న్యూస్ ఛానల్ నడపడానికి అవసరమైన స్టూడియోలు, అధునాతన టెక్నాలజీ, ఉద్యోగుల జీతాల భారాన్ని మోయగల స్థోమత ఆయన కుటుంబానికి ఉన్న వ్యాపార సామ్రాజ్యాల ద్వారా సులభంగానే సమకూరుతుందని ఇన్ సైడ్ టాక్.
విజయసాయిరెడ్డి ఇప్పటికే ఒక కీలక ప్రకటన చేశారు. 2029 ఎన్నికల్లో తాను గానీ, తన కుటుంబ సభ్యులు గానీ ముఖ్యమంత్రి పీఠాన్ని ఆశించడం లేదని, తాను కేవలం ఒక ‘మెంటార్’ గా మాత్రమే ఉంటానని స్పష్టం చేశారు. అలాగే పార్టీలో ఏకంగా 66 శాతం సీట్లను 25 నుంచి 40 ఏళ్ల లోపు ఉన్న యువతకే కేటాయిస్తానని ప్రకటించారు. అయితే సొంతంగా వందల కోట్లు ఖర్చు పెడుతూ, ఛానల్‌ను కూడా పెడుతూ వేరొకరిని సీఎం చేయడానికి ఆయనెందుకు ఇంత రిస్క్ తీసుకుంటున్నారనేది పెద్ద మిస్టరీగా మారింది. ఏపీలో ప్రస్తుతం ఉన్న వైఎస్సార్‌సీపీ బలహీనపడుతున్న తరుణంలో, ఆ ఓటు బ్యాంకును ఆకర్షించి ప్రత్యామ్నాయంగా ఎదగడమే ఆయన వ్యూహంగా కనిపిస్తోంది. రాజకీయంగా, ఆర్థికంగా తిరుగులేని వ్యూహాలు రచించగల విజయసాయిరెడ్డి, ఈ ‘డబుల్ ఇన్వెస్ట్‌మెంట్’ ద్వారా రాబోయే రోజుల్లో ఏపీ రాజకీయాల్లో ఎలాంటి కీలక పాత్ర పోషిస్తారో చూడాలి