కోట్ల ఆస్తి ఉన్నా ఫాస్టాగ్ కు ఎమ్మెల్యే మేడం కక్కుర్తి..?

ప్రజాప్రతినిధులుగా ఎన్నికైన వారు సామాన్యులకు ఆదర్శంగా నిలవాలి కానీ, తమ అధికారిక హోదాను అడ్డుపెట్టుకుని చిల్లర లాభాల కోసం కక్కుర్తి పడితే ఆ పార్టీకే తలవంపులు తప్పవు. ఇప్పుడు విజయనగరం జిల్లా నెల్లిమర్ల ఎమ్మెల్యే లోకం నాగమాధవి విషయంలో సరిగ్గా ఇదే చర్చ నడుస్తోంది. 2024 అసెంబ్లీ ఎన్నికల అఫిడవిట్ ప్రకారం ఏకంగా రూ. 291.17 కోట్ల ఆస్తులు కలిగి ఉన్న ఒక సంపన్న ఎమ్మెల్యే, కేవలం నెలకు రూ. 3 లక్షల నుంచి రూ. 4 లక్షల టోల్ ఫీజు ఎగవేయడానికి తన హోదాను వాడుకుంటున్నారనే ఆరోపణలు ఇప్పుడు రాష్ట్ర రాజకీయాల్లో పెను సంచలనంగా మారాయి.

2024 ఎన్నికల సమయంలో లోకం నాగమాధవి సమర్పించిన అఫిడవిట్ లెక్కలను పరిశీలిస్తే ఆమె ఆర్థిక స్థాయి ఏంటో స్పష్టంగా అర్థమవుతుంది. ఎన్నికల సంఘానికి ఇచ్చిన వివరాల ప్రకారం ఆమె, ఆమె కుటుంబం పేరిట మొత్తం సుమారు రూ. 291.2 కోట్లు విలువైన ఆస్తులు ఉన్నాయి. ఇందులో చరాస్తుల విలువే రూ. 249 కోట్లకు పైగా ఉండగా, స్థిరాస్తుల విలువ రూ. 42 కోట్లకు పైమాటే. అమెరికాలో ఎంఎస్ చదివి, 20 ఏళ్లకు పైగా కార్పొరేట్ రంగంలో పనిచేసి, వందల కోట్ల టర్నోవర్ ఉన్న మిరకిల్ సాఫ్ట్‌వేర్ సిస్టమ్స్ కంపెనీతో పాటు భారీ విద్యాసంస్థలను నడుపుతున్న ఒక ఉన్నత విద్యావంతురాలైన నాయకురాలు ఇలాంటి వివాదంలో చిక్కుకోవడం అందరినీ విస్మయానికి గురిచేస్తోంది.

విజయనగరం జిల్లాలోని ఎన్ హెచ్ 16 పై ఉన్న నాతవలస టోల్ ప్లాజా వద్ద ఆమెకు చెందిన మిరకిల్ ఇంజినీరింగ్ కాలేజీ, మిరకిల్ సాఫ్ట్‌వేర్ సిస్టమ్స్ బస్సులతో పాటు దాదాపు 100 వాహనాలకు ఎటువంటి ఫాస్టాగ్ రుసుము చెల్లించకుండానే ఫ్రీ ఎంట్రీ ఇస్తున్నారనే ఆరోపణలు వెల్లువెత్తుతున్నాయి. టోల్ బూత్ వద్దకు రాగానే ఎమ్మెల్యే వాహనాలు అని చెబితే చాలు, సిబ్బంది గేట్లు ఎత్తేస్తున్నారని సమాచారం. ఇలా రోజుకు 100 వాహనాలకు టోల్ మినహాయింపు పొందడం వల్ల నెలకు రూ. 3 లక్షల నుంచి రూ. 4 లక్షల వరకు, అంటే ఏడాదికి సుమారు రూ. 36 లక్షల నుంచి రూ. 48 లక్షల మేర టోల్ ఆదాయానికి గండి పడుతోందని విమర్శలు వినిపిస్తున్నాయి.

దాదాపు రూ. 291 కోట్ల ఆస్తులున్న సంస్థలకు నెలకు రూ. 4 లక్షల టోల్ ఫీజు చెల్లించడం అనేది ఏమాత్రం భారం కాదు. అయినప్పటికీ, అధికార దర్పంతో ఆ మాత్రం మొత్తాన్ని కూడా ఎగవేయడం చూస్తుంటే ఇదెక్కడి కక్కుర్తి అని స్థానిక ప్రజలు, వాహనదారులు ముక్కున వేలేసుకుంటున్నారు. 2024 ఎన్నికల్లో నెల్లిమర్ల నియోజకవర్గ ప్రజలు లోకం నాగమాధవిని 40 వేల ఓట్ల భారీ మెజారిటీతో గెలిపించారు. ఒకవైపు సామాన్య మధ్యతరగతి ప్రజలు తమ వాహనాల్లో ప్రయాణించేటప్పుడు ఫాస్టాగ్ బ్యాలెన్స్ తగ్గితే రెట్టింపు జరిమానాలు కడుతూ నిబంధనలు పాటిస్తున్నారు. అలాంటిది ప్రజలకు సేవ చేస్తామని భారీ మెజారిటీతో గెలిచిన ఒక ఎమ్మెల్యే, తన సొంత వ్యాపార సంస్థల 100 వాహనాల కోసం ప్రభుత్వ ఆదాయానికి గండి కొట్టడం విమర్శలకు తావిస్తోంది.