ఎన్టీఆర్ జిల్లా మైలవరం నియోజకవర్గ రాజకీయాల్లో గణపవరం గ్రామం ఇప్పుడు హాట్ టాపిక్గా మారింది. దాదాపు రెండు దశాబ్దాలుగా వైసీపీకి కంచుకోటగా ఉంటూ వచ్చిన ఈ గ్రామంలో, 2026లో జరిగిన ఎంపీటీసీ ఎన్నికల ఫలితాలతో కూటమి అభ్యర్థి విజయం సాధించి వైసీపీ ఆధిపత్యానికి బ్రేక్ వేశారు. మాజీ ముఖ్యమంత్రి వైఎస్ జగన్ మోహన్ రెడ్డి మేనత్త విమలమ్మ సొంత ఊరు కావడంతో,
ఈ ఓటమిని వైసీపీ అధిష్ఠానం ప్రతిష్ఠాత్మకంగా తీసుకుంది. త్వరలో జరగనున్న గ్రామ పంచాయతీ ఎన్నికల్లో ఎలాగైనా తిరిగి పట్టు సాధించాలనే లక్ష్యంతో, విమలమ్మ కుమారుడు, జగన్ మేనల్లుడు యువరాజా రెడ్డి స్వయంగా రంగంలోకి దిగారు. గణపవరం సర్పంచ్ స్థానాన్ని తిరిగి వైసీపీ ఖాతాలో వేసుకునేందుకు యువరాజా రెడ్డి ప్రత్యేక వ్యూహాలతో ముందుకు సాగుతున్నారు. ఈ ఎన్నికల్లో వైసీపీ సర్పంచ్ అభ్యర్థిగా మానసను బరిలోకి దించారు. అభ్యర్థి ఎంపిక నుంచే ఎంతో జాగ్రత్తగా పావులు కదిపిన ఆయన,
మానస విజయాన్ని తమ కుటుంబ ప్రతిష్ఠగా భావిస్తున్నారు. గ్రామంలో ఉన్న పాత కేడర్ను ఏకం చేస్తూ, అసంతృప్తితో ఉన్న నాయకులను బుజ్జగిస్తూ ఎన్నికల ప్రచారాన్ని పర్యవేక్షిస్తున్నారు. ప్రస్తుతం యువరాజా రెడ్డి గణపవరం గ్రామంలోనే మకాం వేసి క్షేత్రస్థాయి రాజకీయ వ్యూహాలకు పదును పెడుతున్నారు. ఎంపీటీసీ ఎన్నికల్లో జరిగిన పొరపాట్లు మళ్లీ పునరావృతం కాకుండా వార్డుల వారీగా సమీక్షలు నిర్వహిస్తున్నారు. మేనత్త సొంత గ్రామంలో పార్టీ జెండాను మళ్లీ రెపరెపలాడించేందుకు ఆయన చేస్తున్న ఈ ప్రయత్నాలు మైలవరం రాజకీయాల్లో ఆసక్తికర చర్చకు దారితీశాయి.