సహకార రంగాలను స్వయంప్రతిపత్తితో నడపాలని, రాజకీయ జోక్యానికి అతీతంగా రైతుల సంక్షేమమే ధ్యేయంగా పనిచేయాలని కబుర్లు చెప్పే ప్రభుత్వాల అసలు నైజం మరోసారి బట్టబయలైంది. కృష్ణా జిల్లా మిల్క్ ప్రొడ్యూసర్స్ కోఆపరేటివ్ యూనియన్ లిమిటెడ్ (విజయ డెయిరీ) పాలకవర్గ విషయంలో ఆంధ్రప్రదేశ్ హైకోర్టు ఇచ్చిన సంచలన తీర్పు… రాష్ట్ర ప్రభుత్వాన్ని తీవ్ర ఇరుకున పెట్టింది. విజయ డెయిరీ చైర్మన్గా మాజీ ఎమ్మెల్యే దాసరి వెంకట బాలవర్ధనరావు ఎన్నిక చెల్లదని, ఆయనతో పాటు మరో నలుగురు డైరెక్టర్ల ఎన్నిక కూడా చట్టవిరుద్ధమేనని ఉద్దేశపూర్వక జోక్యాలపై ఉన్నత న్యాయస్థానం మొట్టికాయలు వేయడం పట్ల సర్వత్రా విమర్శలు వ్యక్తమవుతున్నాయి.
రాష్ట్రంలో కూటమి ప్రభుత్వం అధికారంలోకి వచ్చిన తర్వాత ప్రభుత్వ సంస్థలు, సహకార రంగాలపై పట్టు బిగించే పేరుతో ఇష్టానుసారంగా వ్యవహరిస్తోందన్న ఆరోపణలకు విజయ డెయిరీ ఉదంతం తాజా నిదర్శనంగా నిలిచింది. గత ఏడేళ్లుగా విజయ డెయిరీ డైరెక్టర్గా ఎంతో అనుభవంతో, సక్రమంగా విధులు నిర్వర్తిస్తున్న చలసాని ఆంజనేయులను బలవంతంగా ఆ పదవి నుంచి దించేందుకు అధికార పార్టీ పెద్దలు తెరవెనుక ఎంతటి హైడ్రామా నడిపారో అందరూ చూశారు. పార్టీ పదవి కావాలా, లేక డెయిరీ పదవి కావాలా అంటూ మంత్రులే స్వయంగా రంగంలోకి దిగి బెదిరింపు ధోరణి అవలంబించడం, చివరకు ఆస్పత్రి బెడ్పై ఉన్న వ్యక్తితో బలవంతంగా రాజీనామా చేయించడం ప్రభుత్వ అహంకార ధోరణికి పరాకాష్టగా నిలిచింది.
సహకార చట్టాలను, నిబంధనలను తుంగలో తొక్కి తమకు నచ్చిన వ్యక్తులను కుర్చీలో కూర్చోబెట్టాలనే దుర్బుద్ధితో ప్రభుత్వం వ్యవహరించిన తీరును ఏపీ హైకోర్టు తన తీర్పు ద్వారా ఎండగట్టింది. బోర్డు ఏర్పాటుకు కనీసం పది మంది కోరం సభ్యులు ఉండాల్సిన అవసరం ఉండగా, కేవలం ఎనిమిది మందితో అత్యుత్సాహం ప్రదర్శించి ఏకగ్రీవాలంటూ సాగించిన నాటకాలను న్యాయస్థానం నిలదీసింది. పోటీ చేసిన అభ్యర్థులను అనర్హులుగా చూపిస్తూ సాగించిన ఈ అప్రజాస్వామిక ప్రక్రియపై కోర్టు తీవ్ర ఆగ్రహం వ్యక్తం చేయడం ప్రభుత్వ పెద్దలకు చెంపపెట్టు లాంటిదే.
రైతుల చెమటోడ్చి సంపాదించుకున్న విజయ డెయిరీని రాజకీయ పునరావాస కేంద్రంగా మార్చాలని చూసిన ప్రభుత్వ ప్రయత్నాలకు న్యాయస్థానం ఇచ్చిన తీర్పు గట్టి ఎదురుదెబ్బ తగిలించింది. ప్రజాస్వామ్య విలువలను, సహకార సంఘాల స్వయంప్రతిపత్తిని కాలరాస్తూ అడ్డగోలు నిర్ణయాలు తీసుకుంటున్న ప్రభుత్వ తీరుపై అటు పాడిరైతులు, ఇటు రాజకీయ విశ్లేషకులు తీవ్ర మండిపడుతున్నారు. ఇప్పటికైనా ప్రభుత్వం తన నియంతృత్వ పోకడలను విడనాడి, చట్టాన్ని గౌరవించాలని లేదంటే ప్రజల నుంచి తగిన మూల్యం చెల్లించుకోక తప్పదని హెచ్చరిస్తున్నారు!