భారత యువ సంచలనం వైభవ్ సూర్యవంశీ తన క్రికెట్ కెరీర్‌లో సరికొత్త చరిత్ర సృష్టించాడు. సయ్యద్ ముస్తాక్ అలీ ట్రోఫీ 2026 టోర్నీలో భాగంగా శనివారం ఇండోర్‌లోని హోల్కర్ స్టేడియంలో సౌరాష్ట్రతో జరిగిన మ్యాచ్‌లో బిహార్ జట్టుకు సారథ్యం వహించడం ద్వారా, పురుషుల టీ20 క్రికెట్ చరిత్రలోనే అత్యంత పిన్న వయస్కుడైన కెప్టెన్‌గా 15 ఏళ్ల వైభవ్ సూర్యవంశీ ప్రపంచ రికార్డు నెలకొల్పాడు. అయితే కెప్టెన్‌గా తొలి మ్యాచ్‌లో అతడికి వ్యక్తిగతంగా నిరాశే ఎదురైంది. టాస్ గెలిచి బ్యాటింగ్ ఎంచుకున్న వైభవ్, ఇన్నింగ్స్ మొదటి బంతినే బౌండరీకి తరలించి దూకుడుగా ఆరంభించినప్పటికీ, కేవలం 18 పరుగులు చేసి చేతన్ సకారియా బౌలింగ్‌లో రిటర్న్ క్యాచ్ ఇచ్చి ఔటయ్యాడు.
వైభవ్ ఔటైన తర్వాత బిహార్ జట్టు వరుసగా వికెట్లు కోల్పోయింది. అల్తమిష్ అష్రఫ్ 24 పరుగులు, పృథ్వీరాజ్ 38 పరుగులతో రాణించడంతో బిహార్ నిర్ణీత ఓవర్లలో 137 పరుగులు చేసింది. అనంతరం 138 పరుగుల లక్ష్యంతో బరిలోకి దిగిన సౌరాష్ట్ర జట్టు మరో 21 బంతులు మిగిలి ఉండగానే ఐదు వికెట్ల తేడాతో సునాయాస విజయం సాధించింది. మరో మ్యాచ్‌లో భారత మాజీ టీ20 కెప్టెన్ సూర్యకుమార్ యాదవ్ తన విధ్వంసకర బ్యాటింగ్‌తో హైదరాబాద్ బౌలర్లకు చుక్కలు చూపించాడు. ఈ మ్యాచ్‌లో తొలుత బ్యాటింగ్ చేసిన హైదరాబాద్ జట్టు 172 పరుగులు సాధించింది.
ముంబై బౌలర్లలో మాక్స్‌వెల్ స్వామినాథన్ 3 వికెట్లు తీయగా, శివమ్ దూబే, సాయిరాజ్ పాటిల్ తలో 2 వికెట్లు పడగొట్టారు. 173 పరుగుల లక్ష్య ఛేదనలో ముంబై కెప్టెన్ సూర్యకుమార్ యాదవ్ కేవలం 21 బంతుల్లోనే 60 పరుగులు చేసి అజేయంగా నిలిచాడు. అతడికి తోడుగా 21 ఏళ్ల యువ ఆటగాడు ముషీర్ ఖాన్ 24 బంతుల్లోనే 6 ఫోర్లు, 3 సిక్సర్లతో 51 పరుగులు చేయడంతో ముంబై ఏడు వికెట్ల తేడాతో ఘన విజయం సాధించింది. ఇక ఇతర మ్యాచ్‌లలో హర్యానాపై పంజాబ్ నాలుగు వికెట్ల తేడాతో, మహారాష్ట్రపై పుదుచ్చేరి 15 పరుగుల తేడాతో విజయాలు నమోదు చేశాయి.