ఆంధ్రప్రదేశ్ మున్సిపల్ ఎన్నికల పోలింగ్ వేళ అందరి కళ్ళు పులివెందుల వైపే తిరిగాయి. అసెంబ్లీ ఎన్నికల ఫలితాల తర్వాత వైఎస్సార్ కాంగ్రెస్ పార్టీ తీవ్ర నైరాశ్యంలో ఉందని, క్షేత్రస్థాయిలో జరిగే పరిణామాలపై ఆ పార్టీ అధినేత వైఎస్ జగన్ మోహన్ రెడ్డి పెద్దగా స్పందించరని భావించిన ప్రత్యర్థుల అంచనాలను తలక్రిందులు చేస్తూ పులివెందుల వేదికగా జగన్ ఒక సరికొత్త పొలిటికల్ పిక్చర్‌ను ప్రజల ముందుకు తెచ్చారు. తనను రాజకీయంగా ఎంత అణచాలని చూసినా, తనలోని పాత పోరాట నైజం అస్సలు తగ్గలేదని నిరూపించేలా జగన్ వ్యవహరించిన తీరు ఇప్పుడు ఏపీ వ్యాప్తంగా హాట్ టాపిక్‌గా మారింది.
జగన్ పులివెందుల పర్యటనను అడ్డుకునేందుకు హెలికాప్టర్ ల్యాండింగ్ అనుమతుల విషయంలో ప్రభుత్వం తీవ్ర ఆటంకాలు సృష్టించిందనే వార్తలు వచ్చాయి. జగన్ రాకపోతే పులివెందులలో క్యాడర్ మరింత బలహీనపడుతుందని భావించిన ప్రత్యర్థులకు జగన్ గట్టి షాక్ ఇచ్చారు. గంటల తరబడి పోరాడి, ఎమర్జెన్సీ ల్యాండింగ్ ద్వారా అనుమతులు తెచ్చుకుని మరీ ఆయన పులివెందుల గడ్డపై అడుగుపెట్టారు. ఒక అడ్డంకిని దాటుకుని నాయకుడు క్షేత్రస్థాయికి వస్తున్నాడనే సరికి, అంతవరకు డీలా పడిన వైఎస్సార్సీపీ శ్రేణుల్లో ఒక్కసారిగా ఉత్సాహం పెరిగింది. జగన్‌ను మానసికంగా దెబ్బతీయాలని చూసిన ప్రత్యర్థుల వ్యూహాన్ని ఆయనే తనకు అనుకూలంగా మార్చుకున్నట్లు స్పష్టమవుతోంది.
ఒక మాజీ ముఖ్యమంత్రి హోదాలో ఉండి కూడా కేవలం మున్సిపల్ ఏజెంట్ల హక్కుల కోసం జగన్ స్వయంగా రోడ్డుపైకి వచ్చి ధర్నాకు కూర్చుంటారని ప్రత్యర్థులు అస్సలు ఊహించలేదు. పులివెందులలోని 80 బూత్‌లలో 70 చోట్ల వైఎస్సార్సీపీ ఏజెంట్లను దౌర్జన్యంగా అడ్డుకున్నారని తెలియగానే జగన్ చూపించిన రియాక్షన్ సంచలనం సృష్టించింది. ఏకంగా బాధితులతో కలిసి రిటర్నింగ్ అధికారి ఆఫీస్ ముందే బైఠాయించి, తన కార్యకర్తలకు న్యాయం జరిగే వరకు కదిలేది లేదు అని భీష్మించుకు కూర్చోవడం ఆయనలోని పాత మొండితనాన్ని గుర్తుచేసింది. ఈ ఒక్క చర్యతో తనను నమ్ముకున్న క్యాడర్‌కు ‘నేనున్నాను’ అనే బలమైన భరోసాను జగన్ ఇవ్వగలిగారు.
పులివెందుల మున్సిపల్ ఎన్నికను కేవలం ఒక స్థానిక పోరుగా ఉంచి వైఎస్సార్సీపీని సైలెంట్ చేయాలని చూసిన ప్రత్యర్థుల మైండ్ గేమ్‌ను జగన్ జాతీయ స్థాయికి తీసుకెళ్లారు. ఎన్డీఏ కూటమిని, కేంద్ర ఎన్నికల సంఘాన్ని నేరుగా ప్రశ్నిస్తూ ఆయన చేసిన వ్యాఖ్యలు ఈ ఎన్నికలపై దేశవ్యాప్తంగా దృష్టి పడేలా చేశాయి. స్థానిక కలెక్టర్, ఎస్పీలు ఫోన్లు ఎత్తడం లేదని సాక్ష్యాధారాలతో సహా ఈసీకి ఫిర్యాదు చేయడం ద్వారా కూటమి ప్రభుత్వ అధికార దుర్వినియోగాన్ని ప్రజల ముందు ఎండగట్టడంలో జగన్ సక్సెస్ అయ్యారు. జగన్ కేవలం ప్రెస్ మీట్లకే పరిమితం అవుతారని తక్కువ అంచనా వేసిన ప్రత్యర్థులకు ఇది కోలుకోలేని మైండ్ బ్లాకింగ్ షాక్ అని చెప్పవచ్చు.
కేవలం రోడ్డుపై ధర్నాలతోనే ఆగకుండా లీగల్ గా కూడా ఈ అక్రమాలపై సుప్రీంకోర్టును ఆశ్రయిస్తామని జగన్ ప్రకటించడం విశేషం. దొంగ ఓట్లు వేస్తూ, ప్రజాస్వామ్యాన్ని బ్రూటల్‌గా ఖూనీ చేస్తున్నారని ఆరోపిస్తూ 70 బూత్‌లలో రీ-పోలింగ్ నిర్వహించాలని ఆయన డిమాండ్ చేశారు. ప్రత్యర్థులు జగన్ పొలిటికల్ గా సైలెంట్ అయిపోతారని భావిస్తే, ఆయన గ్రౌండ్ లోనూ, అటు లీగల్ గానూ డబుల్ అటాక్ స్టార్ట్ చేసి తానేంటో నిరూపించుకున్నారు. మొత్తానికి పులివెందుల మున్సిపల్ పోరు ద్వారా జగన్‌ను తక్కువ అంచనా వేసి ప్రత్యర్థులే సెల్ఫ్ గోల్ చేసుకున్నారనే విశ్లేషణలు ఇప్పుడు బలంగా వినిపిస్తున్నాయి.