ఆంధ్రప్రదేశ్‌లో స్థానిక సంస్థల ఎన్నికల పర్వం ఊపందుకుంటున్న తరుణంలో ప్రతిపక్ష వైఎస్సార్ కాంగ్రెస్ పార్టీ అత్యంత ప్రతిష్టాత్మకమైన గుంటూరు మున్సిపల్ కార్పొరేషన్ మేయర్ పీఠంపై ప్రత్యేకంగా దృష్టి సారించింది. గుంటూరు మేయర్ స్థానం జనరల్ మహిళ కేటగిరీకి రిజర్వ్ అయ్యే అవకాశాలు ఉన్నాయన్న ప్రాథమిక అంచనాల నేపథ్యంలో.. పార్టీ అధినేత వైఎస్ జగన్ మోహన్ రెడ్డి ఒక సంచలన నిర్ణయానికి వచ్చినట్లు రాజకీయ వర్గాల్లో బలమైన వార్తలు వినబడుతున్నాయి.
మాజీ మంత్రి, పార్టీ సీనియర్ నేత అంబటి రాంబాబు కుమార్తె అంబటి మౌనికను గుంటూరు మేయర్ అభ్యర్థిగా బరిలోకి దించేందుకు వైఎస్సార్‌సీపీ దాదాపుగా రంగం సిద్ధం చేసినట్లు తెలుస్తోంది. గత సార్వత్రిక ఎన్నికల తదనంతరం గుంటూరు పశ్చిమ నియోజకవర్గ పరిధిలో వైఎస్సార్‌సీపీ తరఫున అంబటి మౌనిక పాలిటిక్స్ లో చాలా యాక్టివ్‌గా మారారు. ఇటీవలి కాలంలో గుంటూరులో కూటమి శ్రేణులు, స్థానిక తెలుగుదేశం పార్టీ ఎమ్మెల్యే గల్లా మాధవితో జరిగిన రాజకీయ ఘర్షణలు, అంబటి నివాసంపై జరిగిన దాడుల సమయంలో మౌనిక చూపిన తెగువ, హోంమంత్రి వంగలపూడి అనితకు ఆమె ఇచ్చిన కౌంటర్లు పార్టీ అధిష్టానాన్ని విపరీతంగా ఆకట్టుకున్నాయి.
క్లిష్ట పరిస్థితుల్లోనూ మీడియా ముందుకు వచ్చి ధైర్యంగా నిలబడి, క్యాడర్‌లో భరోసా నింపిన తీరును పరిగణనలోకి తీసుకున్న వైఎస్ జగన్.. గుంటూరు నగరంలో పార్టీని లీడ్ చేసేందుకు కొత్త తరం నాయకత్వానికి అవకాశం ఇవ్వడమే కరెక్ట్ అని భావించి ఈ నిర్ణయం తీసుకున్నట్లు సమాచారం. స్థానికంగా బలమైన సామాజిక వర్గ సమీకరణాలు, అంబటి రాంబాబుకున్న సీనియార్టీ మరియు మౌనికకున్న ఫైర్‌బ్రాండ్ ఇమేజ్ గుంటూరును మళ్లీ కైవసం చేసుకోవడానికి ఊతాన్ని ఇస్తాయని భావిస్తున్నారు.
తాడేపల్లిలోని కేంద్ర కార్యాలయంలో రేపు వైఎస్ జగన్ మోహన్ రెడ్డి ఆధ్వర్యంలో జరగబోయే పార్టీ రీజనల్ కోఆర్డినేటర్ల అత్యంత కీలక సమావేశంలో ఈ మేయర్ అభ్యర్థుల ఎంపికపై పూర్తి కసరత్తు జరగనుంది. ఇప్పటికే నెల్లూరు మేయర్ అభ్యర్థిగా ఆనం విజయ్‌కుమార్ రెడ్డి పేరును ఖరారు చేసిన జగన్.. రేపటి భేటీ ముగిసిన అనంతరం గుంటూరుతో పాటు వైజాగ్, విజయవాడ, కాకినాడ వంటి కీలక నగరాల అభ్యర్థుల అధికారిక జాబితాను విడుదల చేయనున్నారు. అంబటి మౌనిక ఎంట్రీతో గుంటూరు మున్సిపల్ పోరు ఇరు పార్టీలకూ అత్యంత ప్రతిష్టాత్మకంగా మారడం ఖాయంగా కనిపిస్తోంది.