సినిమా ఇండస్ట్రీలో నటీనటులు అంతా దాదాపు ఒక్కటిగానే ఉంటారని.. ఒకరి కోసం మరొకరు సహాయ సహకారాలు, అండదండలు అందిస్తుంటారని.. కులమతాలకు అతీతంగా దాదాపు చాలా మంది నటీనటులు అన్నదముల్లా కలిసి ఉంటారని చెబుతుంటారు.
గతంలో ఎన్టీఆర్, ఏఎన్నార్ నుంచి మొదలుపెడితే… చిరంజీవి, నాగార్జున, వెంకటేష్, మహేష్ బాబు, ప్రభాస్, జూనియర్ ఎన్టీఆర్, అల్లు అర్జున్, రామ్ చరణ్, రానా లు ఒకరితో ఒకరు ఎంతో స్నేహంగా ఉంటారని చెబుతారు. అయితే… ఈ విషయం తెలియకో ఏమో కానీ.. వారి వారి అభిమానులు మాత్రం చుట్టూ బౌండరీలు గీసుకుని ఉంటారనే విమర్శలు వినిపిస్తుంటాయి.
ఈ క్రమంలో పెద్దగా ఎప్పుడు వేదికలపైనా, ఈవెంట్స్ లోనూ కలిసి కనిపించినట్లు కనిపించకపోయినా… కింగ్ నాగార్జునకు, పవర్ స్టార్ పవన్ కల్యాణ్ కు ఎప్పటినుంచో మంచి అనుబంధం ఉందని.. ఇందులో పవన్ కల్యాణ్ కోసం తన వద్ద ఉన్న సినిమా టైటిల్ ను నాగార్జున త్యాగం చేశారని.. ఆ సినిమా పవన్ కెరీర్ లోనే సూపర్ డూపర్ హిట్ అయ్యిందని.. ఆ తర్వాత ఆ టైటిల్ కోసం అనుకున్న సినిమాకు మరో టైటిల్ ను నాగార్జున పెట్టుకోగా.. ఆ సినిమా కూడా సూపర్ హిట్ అయ్యిందనే విషయం ఎంత మందికి తెలుసు…? ఇది అక్షరాలా నిజం!
వివరాళ్లోకి వెళ్తే… గతంలో అన్నదమ్ముల అనుబంధం, ఉమ్మడి కుటుంబ నేపథ్యంలో ఎన్టీఆర్, ఏఎన్నార్ కలిసి గుండమ్మ కథ వంటి సినిమాలో నటించిన సంగతి తెలిసిందే. ఇదే తరహాలో హరికృష్ణతో కలిసి తాను కూడా అలాంటి ఓ సినిమా చేయాలని భావించిన నాగార్జున.. ఆ సినిమా కోసం “తమ్ముడు” అనే టైటిల్ ను రిజిస్టర్ చేయించారట.
సరిగ్గా ఆ సమయంలో… పవన్ కళ్యాణ్ సినిమా కోసం నిర్మాత శివ రామకృష్ణ ఆ టైటిల్ కోసం నాగార్జునను అభ్యర్థించగా, ఆయన సానుకూలంగా స్పందించి, ఆ టైటిల్ ను ఇచ్చేశారు.
ఆ తరువాత నాగార్జున.. హరికృష్ణతో అనుకున్న తన సినిమాకు ‘సీతారామరాజు’ అనే టైటిల్ పెట్టుకున్నారు. ఆ చిత్రం కూడా మంచి విజయాన్ని సాధించింది. ఇదే సమయంలో పవన్ నటించిన ‘తమ్ముడు’ కూడా హిట్ అయింది. దీంతో… ఇలాంటి పలు ఉదాహరణలు ఇండస్ట్రీలో పరస్పర సహకారానికి, గౌరవానికి మంచి ఉదాహరణగా చెప్పుకోవచ్చని అంటున్నారు.
సో… సినిమా హీరోల పేర్లు చెప్పి రోడ్లపై ముష్టియుద్ధాలు, సోషల్ మీడియాలో విమర్శల వార్లు చేసుకునే ఓ వర్గం అభిమానులు… ఇలాంటి సంఘటనల గురించి తెలుసుకున్న తర్వాత అయినా.. ఆ తరహా ఆలోచనలు మానుకోవాలి అని అంతా కోరుకుంటున్నారు.