హఠాత్తుగా ఎన్టీఆర్ ఫోటోలు బయిటకు వచ్చాయి. మీడియా మొత్తం ఈ రోజంతా ఆ ఫొటోలు గురించే మాట్లాడింది. ఎన్టీఆర్ ..ఆర్.ఆర్.ఆర్ సినిమాలో లుక్ ఇదేనంటూ తేల్చేసింది. అయితే ఆ ఫొటోలు ఏ సందర్బంలో తీసినవో ఎవరికీ అర్దంకాలేదు. కానీ ఇప్పుడు అసలు విషయం రివీలైంది. ‘ఫస్ట్ ఇంప్రెషన్స్’ అనే సంస్ద కోసం తీసిన ఫొటోలు ఇవి అని తేలింది.
వివరాల్లోకి వెళితే.. ఎన్టీఆర్ తన భార్య ప్రణతితో కలిసి ఉన్న ఫొటోలు సోషల్మీడియాలో వైరల్గా మారాయి. ఈ దంపతులు తాజాగా ‘ఫస్ట్ ఇంప్రెషన్స్’ సంస్థకు చెందిన భావన జస్రాను కలిశారు. పిల్లల వేలి, కాలి ముద్రలు, ఇతర మధుర జ్ఞాపకాల గుర్తులను అచ్చు వేసే పద్ధతినే ఇంప్రెషన్స్ అంటారు.
కొన్ని రసాయనాలను ఉపయోగించి ఈ బొమ్మల్ని తయారు చేస్తుంటారు. వీటి కోసం ఎన్టీఆర్ దంపతులు భావన జస్రాను సంప్రదించారు. ఈ సందర్భంగా తీసిన ఫొటోల్ని ఆ సంస్థ సోషల్మీడియాలో షేర్ చేసింది. అలా ఆ ఫొటోలు బయిటకు వచ్చాయన్నమాట.
ఎన్టీఆర్ దంపతులతో కలిసి పనిచేయడం ఆనందంగా ఉందని, వారు తమని చాలా బాగా పలకరించి, ఆతిథ్యం అందించారని తెలిపింది. ఫొటోలో ఎన్టీఆర్ శాంపిల్స్ను తన సతీమణికి చూపిస్తూ కనిపించారు. తమ పిల్లలు అభయ్రామ్, భార్గవ్ రామ్ ఇంప్రెషన్స్ కోసం వీరు అక్కడికి వెళ్లారు. ఎన్టీఆర్ గెడ్డంతో కొత్త లుక్లో కనిపించారు. ఈ ఫొటోలు కాస్త వైరల్గా మారాయి.
ఎన్టీఆర్ ప్రస్తుతం ‘ఆర్.ఆర్.ఆర్’ సినిమాలో నటిస్తున్నారు. ఎస్.ఎస్. రాజమౌళి ఈ సినిమాకు దర్శకత్వం వహిస్తున్నారు. మల్టీస్టారర్గా తెరకెక్కుతోన్న ఈ సినిమాలో రామ్చరణ్ మరో హీరో. ఇంకా హీరోయిన్స్ ఖరారు కాలేదు. డీవీవీ ఎంటర్టైన్మెంట్స్ పతాకంపై దానయ్య ఈ సినిమాను నిర్మిస్తున్నారు. ఇటీవల సినిమా తొలి షెడ్యూల్ పూర్తయింది.