ఆంధ్రప్రదేశ్‌లో మున్సిపల్ ఎన్నికల ఓట్ల లెక్కింపు ప్రక్రియలో ఉద్యోగుల పోస్టల్ బ్యాలెట్ ఓటింగ్ సరళి అత్యంత ఆసక్తికరంగా మారింది. రాష్ట్రవ్యాప్తంగా వివిధ మున్సిపల్ కార్పొరేషన్లు, మున్సిపాలిటీలలో పోస్టల్ బ్యాలెట్ల లెక్కింపు సరళిని గమనిస్తే భిన్నమైన ఫలితాలు వ్యక్తమవుతున్నాయి. దాదాపు 98 శాతం మున్సిపాలిటీలు, కార్పొరేషన్లలో అధికార తెలుగుదేశం, జనసేన, బీజేపీ కూటమి అభ్యర్థుల హవా స్పష్టంగా కనిపించింది. కూటమి ప్రభుత్వం అధికారంలోకి వచ్చిన తర్వాత ఉద్యోగుల సమస్యలను ఒక్కొక్కటిగా పరిష్కరిస్తూ ముందుకు సాగడం, బకాయిలను విడతలవారీగా చెల్లించే ప్రక్రియ చేపట్టడం ఈ ఓటింగ్ సరళిపై సానుకూల ప్రభావం చూపినట్లు రాజకీయ వర్గాలు విశ్లేషిస్తున్నాయి.
అయితే, కొన్ని కీలక ప్రాంతాలలో మాత్రం అధికార కూటమి అభ్యర్థులకు ప్రతిపక్ష వైఎస్సార్ కాంగ్రెస్ పార్టీ గట్టి పోటీని ఇచ్చింది. నెల్లూరు, విజయనగరం కార్పొరేషన్లతో పాటు ఉయ్యూరు, పెడన మున్సిపాలిటీ పరిధిలోని పోస్టల్ బ్యాలెట్లలో వైకాపా అభ్యర్థులు మెరుగైన ప్రదర్శన కనబరిచారు. మరికొన్ని చోట్ల అధికార కూటమి అభ్యర్థులతో సమానంగా ఓట్లను సాధించి దూకుడు ప్రదర్శించారు. గత ప్రభుత్వ హయాంలో ఎదురైన అనుభవాలను దృష్టిలో ఉంచుకుని ఓటర్లు తమ ఓటు హక్కును వినియోగించుకున్నప్పటికీ, కొన్ని ప్రాంతాల్లో స్థానిక సమీకరణాలు పోస్టల్ బ్యాలెట్ ఫలితాలను ప్రభావితం చేశాయి.
రాజకీయ వర్గాల కథనం ప్రకారం, రాష్ట్రవ్యాప్తంగా దాదాపు 80:20 నిష్పత్తిలో పోస్టల్ బ్యాలెట్ ఓట్లు నమోదైనట్లు ప్రాథమిక అంచనాలు వ్యక్తమవుతున్నాయి. అత్యధిక స్థానాల్లో కూటమి అభ్యర్థులు తమ ఆధిక్యాన్ని సుస్థిరం చేసుకున్నప్పటికీ, వైకాపా అభ్యర్థులు కొన్ని మున్సిపాలిటీలలో గట్టి పోటీ ఇవ్వడం ఉద్యోగ వర్గాల్లో జరుగుతున్న అంతర్గత చర్చలను ప్రతిబింబిస్తోంది. మరికొద్ది గంటల్లో సాధారణ ఓట్లతో పాటు పోస్టల్ బ్యాలెట్లకు సంబంధించిన పూర్తి స్థాయి అధికారిక వివరాలు వెలువడనున్నాయి.